1 ᐋᐅᒄ ᐆ ᒫᐦᒑᔨ ᐙᐦ ᐄᑎᑯᒡ, ᓃᒋᔖᓂᑎᒄ, ᐹᒋ ᐊᔨᒥᐦᐋᔅᑎᒨᓈᓐ ᐋᑳ ᒑ ᒌ ᒋᐱᐦᒋᑖᑭᓂᐎᔨᒡ ᑎᐹᔨᐦᒋᒑᓯᐤ ᐅᒥᔻᒋᒧᐎᓐ᙮ ᐊᔨᒥᐦᐋᒄ ᒑ ᒌ ᒥᔑᐦᑖᐱᔨᔨᒡ ᒥᓯᐙ ᒑ ᒌ ᐅᑎᓂᑭᓂᐎᒡ ᒋᔅᑖᔨᐦᑎᒧᐎᓂᒡ ᒧᔮᒻ ᒌᔨᐙᐤ ᐊᓂᑖᐦ ᐋᐦ ᑖᔮᒄ ᑳ ᐄᐦᒡ᙮ 2 ᐹᒋ ᐊᔨᒥᐦᐋᔅᑎᒨᓈᓐ ᑭᔮᐦ ᒑ ᒌ ᑭᓂᐙᔨᒥᔨᒥᐦᑦ ᒋᔖᒥᓂᑑ ᐋᑳ ᒑ ᒌ ᓂᔑᐎᓈᒋᐦᐄᔨᒥᐦᒡ ᐊᓂᒌ ᑳ ᒥᒑᑎᓯᒡ᙮ ᐙᔥ ᓂᒧᐃ ᒥᓯᐙ ᐊᐙᓐ ᑖᑆᐦᑎᒻ ᒥᔻᒋᒧᐎᓂᔨᐤ᙮ 3 ᑎᐹᔨᐦᒋᒑᓯᐤ ᒫᒃ ᑖᑆᐅᒑᔨᐦᑖᑯᓯᐤ᙮ ᒋᑭ ᑐᑖᑯᐙᐤ ᒑ ᒌ ᒥᔥᑭᐎᑳᐳᐙᒄ ᑭᔮᐦ ᒋᑭ ᒥᔪ ᑭᓂᐙᔨᒥᑯᐙᐤ ᐋᑳ ᒑ ᒌ ᓂᔑᐎᓈᒋᐦᐄᑖᒄ ᒥᒋᒥᓂᑑ᙮ 4 ᑎᐹᔨᐦᒋᒑᓯᐤ ᒫᒃ ᓂᑎᐦᑐᑖᑯᓈᓐ ᒑ ᒌ ᑖᑆᐅᒑᔨᒥᑖᐦᒡ᙮ ᓂᒑᔥᑎᓈᐦᐆᓈᓐ ᐋᐦ ᑐᑎᒫᒄ ᐊᓐ ᑳ ᐄᔑ ᐐᐦᑎᒫᑖᐦᒡ ᑭᔮᐦ ᒫᒃ ᒨᔥ ᒑ ᑐᑎᒫᒄ᙮ 5 ᓂᓂᑐᑎᒧᐙᓈᓐ ᑎᐹᔨᐦᒋᒑᓯᐤ ᒑ ᒌ ᐐᒋᐦᐄᑖᒄ ᐊᑎᑎᐤ ᒑ ᒌ ᒋᔅᒑᔨᐦᑎᒸᒄ ᒋᔖᒥᓂᑑ ᐅᓵᒋᐦᐄᐙᐎᓂᔨᐤ᙮ ᑭᔮᐦ ᒫᒃ ᐋᑳ ᒑ ᒌ ᐱᒋᔥᑖᔨᒧᔮᒄ ᐋ ᓂᒋᔥᑭᒫᒄ ᐋᐦ ᐋᔨᒥᐦᒡ ᒧᔮᒻ ᙭ ᑳ ᐄᔑ ᐋᑳ ᐱᒋᔥᑖᔨᒨᑦ᙮

6 ᓃᒋᔖᓂᑎᒄ, ᒋᑎᐄᑎᔓᒥᑎᓈᓐ ᑎᐹᔨᐦᒋᒑᓯᐤ ᒌᓴᔅ ᙭ ᐅᑎᔑᓂᐦᑳᓱᐎᓐ ᐅᐦᒋ, ᐊᑳᐐ ᐃᔮᐱᑖᔨᒫᐦᑯᒡ ᐊᓂᒌ ᐄᔨᔨᐅᒡ ᐋᑳ ᑳ ᒥᑐᓐ ᐎᔮᔥ ᐄᑖᐱᑎᓰᔨᒡ ᑭᔮᐦ ᐋᑳ ᑳ ᐃᔮᐱᑖᔨᐦᑎᐦᒡ ᑖᓐ ᑳ ᐄᔑ ᒋᔅᑯᑎᒫᑖᐦᒡ᙮ 7 ᒋᒋᔅᒑᔨᐦᑖᓈᐙᐤ ᑭᔮᐦ ᒋᐱᐦ ᐐᐦ ᐄᔑ ᐱᒫᑎᓰᓈᐙᐤ ᐋᓐ ᑳ ᐄᔑ ᐙᐱᒥᔮᐦᒡ ᐋᐦ ᑎᔮᐦᒡ᙮ ᓂᒧᐃ ᓅᐦᒋ ᒋᐦᑎᒥᓈᓐ᙮ 8 ᓂᒧᐃ ᓅᐦᒋ ᐱᒋᔅᑎᓈᓈᓂᒡ ᐄᔨᔨᐅᒡ ᒑ ᒌ ᐊᔑᒥᔨᒥᐦᒡ ᐋᐦᐋᑳ ᐙᐙᒡ ᑎᐱᐦᐊᒧᒋᐦᒡ᙮ ᑎᔨᑯᒡ ᓂᒌ ᒥᔥᑎᐦ ᐋᐱᑎᓰᓈᓐ ᐋ ᒌᔑᑳᒡ ᑭᔮᐦ ᐋ ᑎᐱᔅᑳᒡ ᐋᑳ ᒑ ᒌ ᐋᔨᒥᐦᐄᑖᐦᒡ᙮ 9 ᐋᐅᒄ ᑳᐦ ᑎᔮᐦᒡ᙮ ᐋᑦ ᐋ ᐃᓯᓈᑯᐦᒡ ᒑ ᒌ ᓂᑐᑎᒫᑖᐦᒡ ᒑ ᒌ ᐱᒥᓃᔮᐦᒡ ᓂᒧᐃ ᑰᐦᒋ ᓂᑎᐙᔨᐦᑎᒫᑎᓈᓐ ᒑᒀᓐ᙮ ᐙᔥ ᒋᒌ ᐐᐦ ᐙᐱᐦᑏᔨᑎᓈᓐ ᒑ ᐄᑖᑎᓰᐙᑯᐱᓈ ᑭᔮᐦ ᒌᔨᐙᐤ᙮ 10 ᐊᓂᑖᐦ ᐋᐦ ᑖᔮᒄ ᑳ ᒌᐦ ᑖᔮᐦᒡ ᐋᐅᒄ ᑳ ᒌ ᐄᑎᑖᐦᒡ ᒫᓐ, “ᐊᐙᓐ ᐋᑳ ᑳ ᐐᐦ ᐋᐱᑎᓰᑦ ᓂᒧᐃ ᒋᐱᐦ ᐅᐦᒋ ᒥᔮᑭᓂᐤ ᒑ ᒌ ᒦᒋᓱᑦ᙮”

11 ᐋᐅᒄ ᐆ ᐙᐦᒋ ᐄᑎᑖᐦᒡ ᐙᔥ ᓂᐹᐦᑖᓈᓐ ᐋᐦ ᑖᒡ ᐊᓂᑎᐦ ᐋᐦ ᑖᔮᒄ ᐱᔅᒡ ᐋᐦᐋᑳ ᒥᑐᓐ ᐎᔮᔥ ᐄᑖᐱᑎᓰᔨᒡ ᒥᒄ ᐋ ᐃᔮᔨᒧᒫᒡ ᐊᐙᔨᐤᐦ᙮ 12 ᓂᔒᐦᒋᒫᓈᓂᒡ ᐅᒌ ᐄᔨᔨᐅᒡ ᑭᔮᐦ ᓂᑎᔮᒀᒫᓈᓂᒡ ᑎᐹᔨᐦᒋᒑᓯᐤ ᒌᓴᔅᐦ ᙭ ᐋᐦ ᑖᔨᒡ ᐄᔑ ᐋᐦ ᐄᑎᑎᒋᐦᒡ, ᒋᔮᒻ ᐄᔑ ᐱᒫᑎᓰᒄ ᑭᔮᐦ ᐋᐱᑎᓰᒄ ᐋᑎ ᒑ ᒌ ᐅᐦᒋ ᐱᒥᓃᓱᔮᒄ᙮

13 ᒥᓯᐙ ᓃᒋᔖᓂᑎᒄ ᒋᐐᐦᑎᒫᑎᓈᐙᐤ, ᐊᑳᐐ ᓯᔅᑭᒌᒄ ᐋ ᒥᔪᑐᑎᒫᒄ᙮ 14 ᐊᐙᓐ ᐋᐦ ᑖᒀ ᐊᓂᑎᐦ ᐋᐦᑖᐙᒄ ᐋᐦᐋᑳ ᐐᐦ ᓂᓃᐦᑎᐦᒃ ᑖᓐ ᑳ ᐄᑎᓯᓂᐦᐊᒫᑖᐦᒡ ᐃᔮᒀᒥᔅᑑᐙᐦᒄ᙮ ᐊᑳᐐ ᐃᔮᐱᑖᔨᒫᐦᒄ ᐋᒄ ᒫᒃ ᒑ ᐱᐱᒫᒫᔨᒧᑦ᙮ 15 ᒥᒄ ᐊᑳᐐ ᑐᑎᐙᐦᒄ ᒧᔮᒻ ᐋ ᐅᐦᑳᑖᒄ, ᑎᔨᑯᒡ ᒋᐱᐦ ᐃᔮᒀᒥᒫᐙᐤ ᐋ ᐐᒋᔖᓂᑐᐙᒄ᙮

16 ᓂᑎᔨᒥᐦᐋᓈᓐ ᑎᐹᔨᐦᒋᒑᓯᐤ ᐐᔨ ᐋᐦ ᑖᑦ ᐙᐦᒋᐱᔨᔨᒡ ᒋᔮᒫᔨᐦᑎᒧᐎᓂᔨᐤ, ᒨᔥ ᒋᔮᒫᔨᐦᑎᒧᐎᓂᔨᐤ ᒑ ᒌ ᒥᔨᑖᒄ ᒥᒄ ᑖᓐ ᐋᐦ ᐄᔅᐱᔨᐙᒄ ᒨᔥ ᑳᒋᒡ᙮ ᑎᐹᔨᐦᒋᒑᓯᐤ ᒥᓯᐙ ᒋᑭ ᐐᐦ ᐐᒑᐅᑯᐙᐤ᙮

17 ᓃᔨ ᑆᓪ ᒋᒥᓯᓂᐦᐋᒫᑎᓈᐙᐤ ᐋ ᐙᒋᔮᒥᑎᑯᒡ ᓃᔨ ᐙᒋᐦᒡ᙮ ᐋᐅᒄ ᐋ ᐃᓯᓈᑯᐦᒡ ᐋᒥᓯᓂᐦᐄᒑᔮᓐ ᐊᓂᐦᐄ ᓃᔨ ᐙᒋᐦᒡ ᓂᒥᓯᓈᐦᐄᑳᓐ᙮

18 ᒋᑎ ᐊᔨᒥᐦᐋᔥᑎᒫᑎᓈᐙᐤ ᒥᓯᐙ ᒑ ᒌ ᒥᔪᑐᑖᑖᒄ ᒋᑎᐹᔨᐦᒋᒑᓰᒥᓂᐤ ᒌᓴᔅ ᙭᙮