5
Bab-Dummad Israel-dulemargi gwisgunaid
Bab-Jehová soged:
1 “¡Dule-irwa-anse-gormalad, nue be an-itomalo!
¡Israel-e-dulemar, nue be bogi an-itomalo!
¡Reyneg-yaginmalad, nue be an-itomalo!
¡An bemargi yolesokalid!
Bemar Mizpaʼye-neg-nugadgi an-neggwebur-yardaklegega imaksamalad,
Bemar Tabor-yalagi an-dulamar-yardaklegega imaksamarbalid.
2 Bemar Sitim-nebagi dia-yaa-matusulidyobi an-neggweburga gusmalad.
A-ulale, an sabsur-bemar-odurdakoed.
3 An wisid, Efraín-dulemar igi-damala,
an Israel-dulemar-daed ise-wisimakarbalid.
Emide, Efraín-dulemar galagwensuli-negsichigi nanadmalad.
Israel-dulemar bela isgudmalad.
4 ”Na ibmar-isgana-imakmaladbali, geg anse gannar-dagega gumalad.
Ar galagwensuli negsichigi-nanaedi, an-geg-magar-dake e-imaked.
5 Israel-dulemar na e-san-dummarba-imakdimaladi,
na dukin-egi-yolegega imakoed.
Ar Israel-dulemar, Efraín-dulemar, na e-isguedgine dukin yolemaloed.
Judá-dulemarse-bela deyob eba gumarmogoed.
6 E-sibad-wawaadyalaba, e-molimaryalaba, an-amidii gumaloenad,
degi-inigwele, gwen an-amiosurmalad.
¡Ar an e-idu bangudoed!
7 Ar angi bela dodosmalad.
Bab-baigangad mimmi nikusmalad.
Degisoggu, bemala, be-nainumala,
niigwengi ilagwen-berguar guoed.”
Bab-Jehová soged:
8 “Gabaa-neggweburgi moli-bebe-gar be ogormar,
Ramá-neggweburgi gar-trompeta be ogormar.
Bet-Avén-neggweburgi binnasuli be
bila-onogedgi-gormakedyobi be gormakmar:
‘Benjamín-neggwebur, nue-salakar.’
9 Israel-dulemar, innikii an bemarga soged,
ibmar-guoedi an oyogoed.
Ar Efraín-neggwebur sabsur-odurdakleged-ibagi
bela olloo melledoed.
10 Judá-dulemar-e-dummagana, dule-nainu-odogedyob gued.
Degisoggu, an-urwedi, dii-dummad-noedyobi an emargi onogoed.
11 Efraín-dulemar mesagwar imakledisunnad,
e-igar-nabolemaladgi egi gwisguledisunnad,
ar ade, bab-dummadyob-imaklemaladba bur nanaed abemalad.
12 Degisoggu, an Efraín-dulemarga samuyob an guoed.
Deginbali, Judá-dulemarga sibebyob an guoed.
13 ”Efraín-neggwebur, na e-boni-nika dakargua,
Judá-neggwebur, e-boni-yaamar dakarmogua,
Asiria-yalase abarmakdemaloenad,
Asiria-e-reyse bendakleged aminamaloenad.
Degi-inigwele, Asiria-e-rey gwen e-bendakosulid,
degi, gwen Judá-neggweburga boni-yaamar nudakosurbalid.
14 An Efraín-neggweburgala, achumigur-nono-wawaadyobi an guoed,
Judá-neggweburgala, achumigur-nono-wawaad-senigwadyobi an guoed.
An-sunnagwad an gaoed,
geb an saga-saga imakoed,
dule-wargwensaale, gwen bendaknonikosulid.
15 Agine geb an gannar an-maidse nonikoed.
Na magar e-isgusad-itononimaladse an indakoed.
Na magar e-isgusad-itononimalale, degine, angi-yolesmalad na magar-itononimalale, suli-suli itodmaloed.
Degidbali, geb bela-belad an-amidii gumaloed.”