6
2b. Israel-dulemar-sabsur-odurdaklegoed
(6:1–10:15)
Israel-dulemar Bab-Dummadse-gannar-dagedgi sunmaked
1 Israel-dulemar sogdemalad:
“Dagmar, gannar anmar Bab-Jehováʼse namalo.
Bab-Dummad an-ichimaksa-inigwele, amba anmar-nudakoed.
Anmar-onaglik-imaksad-inigwele, anmar-nudakoed.
2 Ibabogwad-sorbali, anmarga burba-dulad ukoed,
ibapaagine, gannar anmar-ogwisguoed.
Geb, anmar e-asabin deyob gudii gumaloed.
3 Anmar magar Bab-Jehová-dakmarsun,
e-Igarmar-Mamaidi anmar durdakmarsun.
Igi dad-ibeler-noedyobi, Bab-Dummad anmarse magar-guoed,
dii-wiedyobi anmarse nonikoed.
Igi gebe-dii-argwaned napa-nudakdae,
deyobi anmarse nonikoed.”
Bab-Dummad Israel-dulemar-abinsaded
4 Bab-Jehová sogded:
“Efraín-dulemar, ¿igi-an bemar-saergebe?
Judá-dulemar, ¿igi-an bemar-imakergebe?
Ar bemar-an-sabed, mogir bolegoedba-ainakwialir-berguddaedyob guddaed,
boo wakudaryalaba-ainakwialir-berguddaedyob guddabalid,
deyobi, be-an-sabgued berguddaed.
5 A-ulale, an-gayaburba-barsogmaladbali, an bemar-wiosad.
An-sunmakedgine an bemar-onaglik-imaksad.
An-igar-naboged mar-aidegeyob bemar-oitononikoed.
6 Ibmar-uklemalad an abemaisulid,
bur an-sabgued an bemar-abemaid.
Ibmar-ogumakar-uklemalad an abemaisulid,
unnila dulemar magar-an-dake-gumalad an abemaid.
7 Bemar Adánʼyobi gumalad:
Bemar, anbo-igar-mesisad bichismalad.
Ar bemar, angi aibichamalad.
8 Galaad-neggwebur dulemar-ibmar-isgana-imakmalad-neggweburad.
E-dule-ibmar-imakmaladi, bela ber ablis-eogedbi gudinanaed.
9 Dule-irwa-anse-gormaladi, Siquem-neggwebursik igar-nalemaidbali,
emar-atursaega danagwen bin itos-bukwadamalad.
Igi dule-ibmar-atursamalad, yogasaar ibmar-isgana-imakmala,
deyobi, dule-irwa-anse-gormalad ibmar-isgana imakdamalad.
10 Israel-yala-naidgi, ibmar-gwen-nabirsulid an daksad:
A-yalagine, Efraín-dulemar galagwensuli negsichigi-nanabukmalad,
Israel-dulemar bela isgus bukmalad.
11 ”Judá-dulemar, be-isgued-nukad,
bemar sabsur-odurdakleged abdakdiid.”