7
Israel-dulemar Bab-Dummadgi dummad-isgusad
1 Bab-Jehová sogdebalid:
“An-dulamar an na bendakbienad,
an Israel-yar nudakbienad,
degi-inigwele, Efraín-dulemar-isgued wilub-obichad,
degi, Samaria-dulemar-isgued wilub-obichabalid.
Ar ade, wemar gakangi gudimalad.
Ar dule-atursaedyobi ibmar-atursaegala, negyaba dogmalad,
gandikidgi danagwen galimbaba ibmar-atursaddamalad.
2 Ar we-dulemar, gwen binsadasurmalad,
na e-ibmar-isgana-imakmalad angi gwen yoggumaisurye.
Ar e-ibmar-isgana-imakmaladi, bela na egi e-ebiris naid.
We-ibmar, bela an-asabin oyolenaid.
3 ”E-ibmar-isgana-imakmaladgi, e-rey-yeer-itogega imakmalad.
Degi, e-gakansamaladgi, e-dummagan-yeer-itogega imakmarbalid.
4 Bela we-dulemar, negsichigi abirgunagwarsuli yoledimaladid.
Ar we-dulemar madu-yoed-soo ginnitibisiiyob gumalad,
ar igi dule-madu-sobed bar soo-ogannoged abesurdae,
unnila madu-mued edarbesidae, deyobi we-dulemar gumalad.
5 Rey-ibagi, dummagan, vinoʼgi mumguddamalad.
Rey, galagwensuli guddamogad.
Deyobi, rey, dule-galagwensuli-mumgumalad e-aimarye na sognagusdaed.
6 Urwed-onogega, e-gwage madu-yoed-diopisur-naddaedyob naddaed.
Mutikgusale, e-urwed geb boggusiid.
Neg-oibosale, e-urwed gannar egi noardaed.
7 We-dulemar, madu-yoed-soo-diopisulidyobi gumalad.
E-dummagan-negsemamaid-obeloddamalad.
Bela deyobi e-reymar-obelosdamalad.
Degite, wemar-wargwensaale, an-amiega gwen anse gorsurmalad.
8 ”Efraín-dulemar neggwebur-baigan-angi-bengudimaladba apuruded.
Ar an-dulamar, madu wagar-nailik-akwigusadyobi gumalad.
9 Dule-baigan Israel-dulemar-e-gangued ei obelonanaid,
degite, Israel-dulemar, deyob-neg-gunaid akusunna itomalad.
Bela e-ibe e-gargangued obelosmalad,
degite, amba aku itomalad.
10 Israel-dulemar e-isguedga gwen wile-itobisurmalad,
an e-Bab-Dummad-guedgi, gwen an-amibisurmalad.
Na e-san-dummarba-imaked geg anse-dagega e-imaked.
11 ”Efraín-dulemar nuu-aku-neg-itogedyob gumalad,
gwen magar neg-itosurmalad.
Imbagwenale, Egipto-dulemarse bendakleged egisdedaed,
imbagwenar, Asiria-dulemarse bendakleged egisdedabalid.
12 Ar deyob bendakleged-egisnadmalale, nuumar-galegeyobi an egi saki obatoed.
E-isgued-ular, an ilagugle (7) sabsur odurdakoed.
13 ¡Duledar-wilesmarsun! Ar angi bangusmalad.
Angi gwisgusmaladba bergumarsunnoed.
Ar sunna an na bendakenad,
degi-inigwele, ar emardi unnila anga gakansaar sunmakmalad.
14 Anse innikigwadgi gorsurmalad,
unnila, e-gasgi bomamaidamalad.
Ibmar-gwag-nikuegala, vino-binid-nikuegala, na dukin esgi san-wionanaidamarbalid.
Degi, angi aibitedamarbalid.
15 Amba an-igargi an odurdaksad-inigwele,
amba an ega e-surgan-ogannosad-inigwele,
degite, amba angi-aibinega angi ichakwa-binsananaid.
16 Gwen anse Bab-Dummad-Bur-Biriginedse dagbisurmalad.
Warsi-biir-daklegedyob gumalad.
E-dummagan sabsur-sunmakmaladbali, es-suidgi oburgwilenai gumaloed,
degine, Egipto-dulemar egi dodonanai gumarbaloed.”