2
Bab-Jehová bela napneg-naid semaid
(Miqueas 4:1-5)
1 Amoz-machi-Isaías, Judá-yargi, degi, Jerusalén-neggweburgi neg-guoed-daksad, sogsad:
2 “Ibagan-bergued-mosale, Bab-Jehováʼse-goled-neg-yala bur yala-sunsogedga sii guoed,
yala-mulluganba bur nug-dummarba sii guoed,
dulemar-yar-baid-baidgi-bukmalad bela we-yalase duurmaknonikoed.
3 Bukidar neggwebur-bamalad nonimaloed, sognonimaloed: ‘Dagmar, anmar Bab-Jehová-yalase nakwenamar,
Jacob-e-Bab-Dummadse-goled-negse nakwenamar.
Ar Bab-Jehová, e-Igar-Maidgi anmar-odurdakoed,
adi, anmar e-igargi nanadii guegar.’
Ar ade, Sión-yalagi Bab-Jehová-igar-maid-odurdakleged nodagoed,
Jerusalénʼgi Bab-Jehová-gayaburba ainidagoed.
4 Bab-Jehová, dulemar-yar-baid-baidsik-bukmaladga igar-nabogoed,
neggwebur-bukibgi-nakulegega guoed.
Dulemar, e-es-suidmar napa-imuedga obinyemaloed,
eswar-swiswidikmalad gagan-sikedga gudoed.
Yar-gwensak, yar-baidbo bar na abin-abin urwosurmalad.
Bila-onogega bar odurdaklenai guosurmalad.
5 Jacob-wagan be dagmar,
Bab-Jehová-anmar-nidiguega, anmar imakmar.”
Bab-Jehová dule-san-dummarba-imakmaladga igar-itoged
6 Bab-Dummad, be-dulamar be obachad,
be Jacob-e-wagan obachad.
Ar be-dulamar-yargi, dad-nakwed-dorgan-niisgwagi-nerguarmaladi, bukidar bukwad.
Filistea-dulemaryob, yoo-ibmar-guoedgi-sunmakmalad-bukidar nikamalad,
Be-dulamar, ar dule-bamaladbo igar mesdamalad.
7 E-yalagi, mani-sunnabi engus bukwad,
olo-sunnabi engus bukwad,
e-ibmar-nuegan gege ebisleged.
E-yalagine, moli-bukidar nikad,
e-moli-ur-bila-onomalad gege ebisleged.
8 A-ukinbali, e-yala ibmar-bab-dummadyob-imaklemalad-sunnabi engus bukwad,
ar dulemar, e-argangi-ibmar-sobsamalad-asabin sindigale, sigdimalad,
e-googi-ibmar-obinnismalad-asabin sindigale sigdimalad.
9 Ar weyob, dulemar, e-asabin sindigar-sigedba na nug-wiodimalad,
ar dulemar, e-asabin na nug-bipii imakdimalad.
Begi-isgusadi, melle ega be elio.
10 ¡Israel-dulemar! Bab-Jehová-e-gangued-sabsur-oyoged-idu be dukumar,
e-gangued-dobesaila-dakleged-idu be dukumar,
akwasailagan-ollogan-yaba be dogmar,
e-idu be napa-yaba dukumar.
11 Dule-san-dummarba-imakmalad, sabsur-obingegsalemaloed,
dule-san-dummarba-imakmalad, san-bipii imaklemaloed.
A-ibagangi, unnila Bab-Jehová-e-nugbi odummolegoed.
12 Bab-Jehová-Bela-Gangued-Nikad ibagwengi nonikoed,
bela-dulemar-na-san-dummarba-imakmaladgi, dulegi-mesagwar-sunmakmaladgi, gwichigunonikoed,
dule-na-san-bule-bule-samaladgi, gwichigunonikoed.
A-e-nugmar bipii imaknonikoed.
13 Bela dulemar Líbano-yalagi-urwar-suigan-gwichiyob-san-imakmaladgi, gwichigunonikoed,
bela urwar-matusurmalad-bukwadyob-san-imakmaladgi, gwichigunonikoed.
Bela Basán-nebagangi sapi-dummaganyob-san-imakmaladgi, gwichigunonikoed.
14 Bela dulemar yala-dummagan-matusurmaladyob-san-imakmaladgi,
bela yala-mullu-mullugan-nuga-nikamaladyob-san-samaladgi, gwichigunonikoed.
15 Bela dulemar neg-suigan-bukwadyob-san-imakmaladgi,
bela galu-matusur-akwabiidmalad-gandikidba-bukwadyob-san-imakmaladgi, gwichigunonikoed.
16 Bela dulemar Tarsis-ulu-dummaganyob-san-imakmaladgi,
bela ulu-dummagan-yeerdaklemaladyob-san-imakmaladgi, gwichigunonikoed.
17 Dule-san-dummarba-imakmalad, nug-bipii gudoed,
dule-dogdar-obicha-san-imakmalad san-bipii gudoed.
A-ibagangi, unnila Bab-Jehová-e-nugbi odummolegoed.
18 Bab-dummadyob-ibmar-imaklemalad bela-naitinaga obelolegoed.
19 Bab-Dummad dulemar-sabsur-odurdaksokalile,
dulemar Bab-Jehová-e-gangued-sabsur-oyoged-idu,
e-gangued-dobesaila-dakleged-idu,
akwasailagan-ollogan-yaba ubodmaloed,
idu napa-ollogana-yaba dogdemaloed.
20 A-ibagine, dulemar e-bab-dummagan-nug-odummogega-orgi-sobsamaladi, manigi-sobsamaladi,
sapur-nusaga, degi, uksirga midmaloed.
21 Bab-Dummad dulemar-sabsur-odurdaksokalile,
dulemar, Bab-Jehová-e-gangued-sabsur-oyoged-idu,
e-gangued-dobesaila-dakleged-idu,
dulemar akwasailagan-ollogana-imbaba ubodmaloed,
akwasailagan-ollormalad-yaba dogdemaloed.
22 Degisoggu, melle be dulegi bensuli-gudii guo.
Ar duledi, unnila sikwas dula gudiid.
E-dula-gudiidi, unnila buu naddaed.