1 We-degigusad-sorbali, Jesús Tiberias-mata-dummad-gakaba, e-sapinganse gannar magarosad. Weyob magarosad: 2 Deun danar-bukwamalad, Simón-Pedro, Tomás Dídimoʼye-nugbalid, Galilea-yargi-Caná-neggweburgined-Natanael, degi, Zebedeo-machimala, deginbali, Jesús-sapingan-baigan-warbogwad. 3 Simón-Pedro e-sordamarga sokalid:

—An ua-ganagwelo.

Amar ega sogdemarmogad:

—Anmar beba namarmogoed.

Degine, urgi nadmarsunnad. Deun a-mutik ua bipisaar gwen gassurmalad. 4 Neg-oibodanigu, Jesús mata-dummad-gakagi gudiid. Ar e-sapingandi wissurmalad, we-dule-gudiidde Jesúsʼdeeye. 5 Jesús amarga sogded:

—An-aimar, bemar masgunned, ¿wis nikamala?

Abin-sogdemalad:

—Suli, sate.

6 Geb Jesús amarga sogded:

—Be saki ur-argan-nuedsik mimar, geb bemar ua gamaloed.

Geb degi, saki-mismargua, ua-bukidar-gasmalad. A-ular, geg saki onakguarmalad. 7 Geb degi, Jesús-na-nue-sapin-sabesailadid, Pedroʼga sokalid:

—¡We, anmar-Dummad-Jesús gudiid!

Simón-Pedro itoargu, we Dummad-Jesúsʼye, e-mordummad yosa imaksad. Ar ade, mor-esus gunaid, geb Jesúsʼse-naega demargi yog-argwannar imaksad. 8 Jesús-sapingan-baigandi urgi armalad, saki ua-ena ebipiarmalad, ar ade, dogdar mata-gakagi dikasur gunaisurmalad, unnila mor-suar dulataled-wilub-bangu (100) gunanaid.

9 Jesús-sapingan gakase aidenonimargu, soo gasii daknonimalad. Geb ua, degi, madu, soo-birgi-mai dakarmalad. 10 Jesús amarga sogded:

—Emisgwa be ua-gasmalad wis-sedamar.

11 Simón-Pedro urgi nakwisad. Geb saki ua-dummagan-ena-bukwa mata-gakase ebipialid. Ua-dummagan uka-dulagugle-gakambe-gakapaa (153) gasmalad. Ua ichesur-inigwele, saki gwen achirmaksasulid. 12 Jesús e-sapinganga sogded:

—Dagmar, mas gundamar.

Ar e-sapingan-wargwensaar gwen wis-ese-egisbi itossurmalad, ¿be doaye? Ar ade, wismalad, we e-Dummadid. 13 Geb Jesús madu-susgua, e-sapinganga madu uksad, degi, ua-susbargu, e-sapinganga uksabalid.

14 Jesús gannar-durgusad-sorba, wesega, ilapaagus e-sapinganse magarogusad.

15 Mas-guchamargua, Jesús, Simón-Pedroʼga sogded:

—Jonás-machi-Simón, be wemarba, ¿bur bule be an-sabe?

Pedro, abin-sogded:

—Eye, Dummad. Ar be wisid an be-sabed.

Geb Jesús ega sogdesun:

—Degirdi, an-dulamar-sibad-wawaad-mimmiganyob-gudiid nue be anga sedii imako.

16 Irbogwadgi gannar Jesús sogdebalid:

—Jonás-machi-Simón, ¿be an-sabe?

Pedro, abin-sogded:

—Eye, Dummad. Be wisid an be-sabed.

Geb Jesús, abin-sogded:

—Degirdi, an-dulamar-sibad-wawaadyob-gudiid nue be anga akwedii imako.

17 Gannar irbaagwadgi Jesús sogdebar:

—Jonás-machi-Simón, ¿be an-sabe?

Pedro, Jesús ega gannar-gannar irbaagus-soge-itogedba bukib-ito naded. Ega soggu: “¿Be an-sabe?”

Pedro, abin-sogded:

—Dummad, bela ibmar be wisid. An nue-be-sabed be wisid.

Jesús ega sogded:

—Degirdi, an-dulamar-sibad-wawaadyob-gudiid nue be anga sedii imako.

18 Jesús Simón-Pedroʼga sogdebar:

—Napira an bega soged, be sapingwaunni, wargwengi be mor yodaed, degi, bia-be-nabiedba be naddaed. Ar be seredgusardi, bega argan onakmaloed, degi, bega mor yomarbaloed, degine, be nabisulidba be-sedmaloed.

19 Jesús degisogsadi, sogsagusdo, Pedroʼde igi-burgoe, degi, igi Bab-Dummad-nug odummogoe. Jesús weyob-sogsagu, Pedroʼga sogdebar:

—Anba be dage.

20 Pedro aibiriargu, dakalid, Jesús-na-nue-sapin-sabedi, Jesúsʼba, degi, eba daniki. A-sapinde napi-sedomas-gunbukwa-gusmargu, Jesús-e-dikarba-sii gusadid. Weyob Jesúsʼse-egichii gusadid, dummad, ¿doa darba be ukoye? 21 Pedro a-daksagu, Jesúsʼga sogded:

—Dummad, ¿we-duledina?

22 Jesús ega sogded:

—We-dule an-gannar-dagedse amba dula-gudii an abegele, ¿be anga akar sogosi? Geg be anga akar soged.

”Bedi be anba dage.”

23 We-degisoglesadi, Jesús-sapingan-abargi nasguddo, we-Jesús-e-sapin burgosurye. Ar Jesús sogsasulid: “We-sapin burgosurye.” Sogsado: “An we-dule an-gannar-dagedse amba dula-gudii an abegele, ¿be anga akar sogosi? Geg be akar soged.”

24 We-Jesús-sapin-Juanʼye-nugad e-ibmar-daksad bemarga soged, degine, we-ibmar-gusad narmaksad. Anmar wisdo, we-ibmar-sogedi, napiragwadid.

25 Jesús ibmar-bukidar imaksabalid. A-ibmar bela gwensak-gwensak narmaklesana, bela we-napneg-naid, we-gardamar-narmaklesad-sabogegala, unnigussuliled. Be itomargua.