23
Job, Bab-Dummad-asabin san-bendaksad
1 Job, Elifaz-abin-imakded:
2 “Emi amba an naibi-itoged-abalagi sunmakoed,
amba Bab-Dummad sabsur-an-imaknaid.
3 An wisina, bia Bab-Dummad mai,
degi, an e-maidse sunna nabir moena,
4 an san-bendakegala
an bela ega ibmar sogsaled.
5 Bab-Dummad-ibmar-sogbied an wisgusaled.
Degidbali, an magar itononikiled.
6 Bab-Dummad angi sabsur-gwisguega, ¿e-gangued angi oyogergebsi?
¡Suli! Angi gwisgussuliled, unnila an-itonai gusaled.
7 Dule-innikidaedi, Bab-Dummad-asabinni sunna na san-bendaked.
Andina, anga-igar-naboged-asabin degisadegu ollorgusaled,
ibmar-oakalossuliyob an-daksaled.
8 ”Aisaar an Bab-Dummad-amidiinad.
An dad-nakwedsik nadele, an daksulid,
dad-argwanedsik nadbalile, an daksurbalid.
9 Bab-Dummad dad-nakwed-argan-sapiledsik-gunaile, an daksurbalid.
Dad-nakwed-nuedsik-gunaile, an daksurbalid.
10 Bab-Dummaddi bela an-gudiid nue-wisimakaled.
Bab-Dummad an-wilubdakye-sogele, or-swilimakaleyob an gusaled.
11 Bab-Dummad-Igarba an nue-nanadiid,
e-sogedba an nanadiid, an egi bangudisulid.
12 E-Igar-sogsagusadgi an bangudisulid.
E-ibmar-sogsadi, an-gwage-ulubgi an sediid.
13 ”Bab-Dummad na ibmar-imakbiedba imakmaid,
¿doa ega akar-sogoe?
Na e-abegedba ibmar imakmaid.
14 Bab-Dummad, igi-an-imakoye na sogsa, deyob an-imakoed.
Ibmar-baigan-bukidar ayobi, na e-abegedba imakoed.
15 Agala, an Bab-Dummad-asabin dobee itodaed.
We-ibmargi an bela binsaddibe, nue-dobe an itoddaed.
16 Bab-Dummad-Bela-Gangued-Nikadi an-niga-egwachad,
nue-dobed anga uksad.
17 We-ibmar-bela-angi-gunaidi, an-gayamakosulid,
an nunmaked-dummad-itonai-inigwele, amba an ibmar sogedsegad.”