24
1 Job sogdebalid:
“¿Ibiga Bab-Dummad-Bela-Gangued-Nikadi, dule-isgana-odurdakleged-iba nasiksuli?
Adi, dule-Bab-Dummadba-nanaimalad dakmaloenad.
2 Dule-isganamar nainu-suegala, nainu-dikar-abingunaidgi dogdedamalad,
degine, molimar-atursasmalad akwedidamalad.
3 Sergan-satemalad-ibe moli-uayasuid susdamalad.
Ome-ei-sui-burgwisad-ibe ibmar-ganikid-anar moli-bebe-nikadi susdamarbalid.
4 Dule-isganamar dule-wilemalad-igarba-abingualir, e-idu ainirmalaga imaked,
e-dobedba e-idu dukumalaga imaked.
5 Dule-wilemalad, moli-uayasuid-sapurbalidyobi wakudaryalaba negsulidganba masbina gudidamalad.
Nega-dulesulidganba e-mimmiganga mas amied.
6 Dule-wilemalad emar-nainuganse ibmar-obichad-weegala, naddamalad.
Dule-isganamar-e-uva-nainugi uva-san-babatisad weenai damalad.
7 Dule-wilemalad mutikgusale, morsurmaladbali uka-swana megiddamalad.
Atued-sulidbali dambed-abalagi neg-oiboardamalad.
8 Yalaganba dii-wiedba waradik gudidamalad,
dukued-sate gudidamalad, unnila akwa-imbaba dukubukwadamalad.
9 Dule-isganamala, goe-bab-sated e-nan-annik sumalad.
Egi-mani-ganikid-anar dule-wilemalad-ibe mimmigan sudamalad.
10 Dule-wilegana mor-satedbali, uka-swiri gudidamalad.
Emar-nainugi ibmar-gwag gwaada semaidamalad.
Degidbali, ukudbali burgwiddamalad.
11 We-dule-wilegana, olivo-gwallu-egurega e-naged-akwa obipirmaknagusdamalad.
Uva-e-nis-onogegala egi annanagus damarbalid,
degi-inigwele, ukudmaada gunanaidba burgwiddamalad.
12 Neggweburgine dule-burgwedanimamaid-e-akiginned magar itoleged.
Dule-undar-naibigusmalad aisaar Bab-Dummadse bendakleged egisnaidamalanad,
degi-inigwele, Bab-Dummad gwen bai dakdasulid.
13 ”Gwenna-gwenna dulemar igar-nued abedasurmalad, isdarsunna dakdamalad.
Igar-innikigwadba nanabisurdamalad,
ibmar-isgana-imakdiid magar itosurmalad.
14 Dule-emar-gindaked dule-wilemalad-oburgwega, degi, ibmar-abesa-gudimalad-oburgwega, oibosayala gwisguardaed.
Neg-mutikgudele, dule-ibmar-atursaedga binyiddabalid.
15 Dule-galagwensuli-e-omesulidbo-nanaed neg-mutikgued edarbedidaed,
weyob sogdidaed: ‘Dule gwen an-dakosuli.’
Deyob dukuakwaa gudidaed.
16 Dule-ibmar-atursaed mutikidba emar-negse dogdaed.
Neg-ibgindina e-negyaba dukumaidaed.
Isdar neg-ibgined dakdaed.
17 Bela we-dule-isganamargala, neg-ibginedi mutikidyob gued.
Neg-mutikid-neg-galagwensur-guardaed bur abedamalad.”
Zofar, Jobʼgi gaya-egwannonikid
18 Zofar weyob sogded:
“Dule-isganamar dii-iirmakmaiyobi gwae-gwae wakitedamalad,
e-nainu-naidi nue-ukabsales naid.
A-ulale, gwen dule e-uva-nainugi gannar bar arbabidasulid.
19 Igi dad-dummad-gaedi, neg-diopisulidi, boo-batenaid berguega-imake,
deyobi, dule-isgudimaladi burgwedse berguddamalad.
20 Dule-isganamar-bergudele, e-nangan bar egi binsaosulid.
Amar napa-urba-dogdele, nus-masga gudoed.
Dulemar gwen dule-isganamargi bar binsadii guosurmalad.
Igi sapimar olaledae, deyobi, gumaloed.
21 Dule-isganamar ome-geg-mimmi-baked, sabsur-imakdidamalad.
Degi, omegan-ei-sui-burgwismalad-sabsur imakdidamarbalid.
22 Degi-inigwele, Bab-Dummad e-garganguedba dule-isganamargi yoleged.
Bab-Dummad uluddibe, dule-isganamar geg abin gwisgued.
23 Bab-Dummad dule-bulegan-dobsuli imaked, degi, egi bensuli imaked,
degi-inigwele, Bab-Dummad amba we-dulemargi nakuleged.
24 Amar-e-nug unnila sikwas odummoleged, yog-berguar naddaed.
Dule-isganamar oros-welegeyob gumalad,
gagan-gummakeyob gummakmalad, yoga-berguar naddaed.
25 ”¿Doa anga sogosunna, an-sunmaknaidi gakanye?
Dule gege anga soged, we gakanye.”