5. DULE-YAR-BAID-BAIDGI-BUKMALAD SABSUR-ODURDAKLEMALOED
3
(3:1-15)
Bab-Jehová weyob soged:
“A-iba-nonikile, Judá-yarginmalad, degi, Jerusalén-dulemar,
yar-baid-baidse-gales-selesgusmaladi, an gannar e-yarse senonikoed.
Bela dulemar-yar-baid-baidgi-bukmalad an onmakoed,
Josafat-Nebase-ambikuega an imakoed.
Agine, an-Israel-dulamar-sabed-nukad,
an we-dulemala sabsur-odurdakoed.
Ar we-dulemar, an-dulamar yar-baid-baidse-oaisakiega imaksamalad,
an-yar-naid mimismalad.
We-dulemar ibmargi-wilubdakar an-dulamar-mimismalad.
Omegan-gamba-imaked-muchub, burwigana uksamalad.
We-dulemar na mumgumalaga,
vino-muchub, bunamala manigi uksamalad.
”Sidón-neggwebur, Tiro-neggwebur, degi, bela Filistea-yarginmalad, ¿ibiga bemar angi yolenanai? ¿Ar bemar bugedmai an-imakbimala? Ar deyob be an-imakbimalale, bemar-bugedmai-an-imakbimalad, bemargi emiskwaa aibinega an imakoed. Ar bemar an-ibe or, mani atursasmalad. Deginbali, bemar an-ibmar-nuegan be-bab-dummadgan-negse be sesmarbalid. E-yargi-dikasur-banguega bemar Grecia-dulemarga Judá-dulemar, degi, Jerusalén-dulemar uksamalad.
”Emigindi, bemar wisgubi an abedo, bemar doa-dulemarga Israel-dulemar-uksamala, amar a-yargi-bukwadgi an onogoed. Ar igi bemar an-dulamar-imaksamala, deyobi an bemar-imakmarmogoed. Judá-dulemarga be-masmala, be-bunamala, an manigi ukoed. Geb Judá-dulemar, Sabá-dulemarga ukmarmogoed. We-Sabá-dulemar dikasur yar-baidgi bukmalad.”
Bab-Jehová weyob sogsad:
“Dulemar-yar-baid-baidgi-bukwamaladga, be weyob sogmala:
‘Bila-onogega guakwaa ambikumala,
Sordamar bila-onogega be barmide,
Bela dule-bila-onomalad-bulegan urwega be guagwar bukumala.
10 Napa-imumaladgi es-suigan be sobmala,
es-doperegwadgi eswar be sobmala.’
Dule-gegegwad soge:
‘¡An dule-gandikidye!’
11 Dulemar-anmar-yar-dikarba-bukwamalad, gwae be dagmala,
Josafat-Nebase be ambikudamala.”
 
Bab-Jehová, be-dule-gandikmalad be odedage.
 
12 “Dulemar-yar-baidgi-bukwamalad, be dagmala,
Josafat-Nebase be dagmala.
A-nebagine, dulemar-yar-baidgi-bukwamaladga igar-nabogega an signonikoed.
13 Orosgi-dakleged-trigo goresale, igi es-doperegwadgi weledae,
ayobi, an we-dulemar-imakoed.
Uva-goresale e-nis-eguregala igi birgi gwirlege,
ayobi, an we-dulemar-imakoed.
Igi vino e-sigedgi engusadba dikarba aryomaidae,
ayobi, we-dulemar-e-isgusad doggus wilub-obichad.”
 
14 Neba-Decisiónʼye-nugadgine,
dulemar-bukidara onmakdanikid.
Neba-Decisiónʼye-nugadgine
Bab-Jehová-e-iba warmakdanikid.
15 Dad-ibeler-ganaid, degi, nii-ganaid bar gaosulid.
Niisgwamar bar gaosurbalid.
6. JUDÁ-DULEMAR-BENDAKLENONIKOED
(3:16-21)
16 Bab-Jehová Sión-yar-akale, achumigur-nono-wawaadyobi binnasuli gordagoed.
Jerusalén-neggwebur-akale, mar-goleyobi binnasuli sunmakdagoed.
Bela napneg-naid, nibneg-naid, giglimakdoed.
Ar Bab-Jehováʼdi e-dulamarga dukued-negga gunonikoed,
Israel-dulemarga ganguedga gunonikoed.
Bab-Jehová e-dulamargi ise-nued-binsamaid
17 Bab-Jehová e-dulamarga sogded:
“Geb degine, bemar wisgunonikoed, ani an be-Bab-Dummad-Jehová,
an-yar-Sión-islidikidgi an maid.
Jerusalén-neggwebur islidikidga gunonikoed.
Sordamar-yar-baidginmalad gandikidba bar egi ubogosurmalad.
 
18 ”A-ibagi, yarmargine, vino-osidikid aryonai gudoed,
yar-seniganagine, moli-nunismar aryomai gudoed,
Judá-dianmargine, diimar aryomai gudoed.
Anse-goled-neggine, dii aryodagoed,
we-dii, neba-Sitimʼye-nugad-ognai gudoed.
19 Egipto-yar-naidi, sabsur-Judá-dulemar-imaksamalad-nukad, bela ibitogoed.
Edom-yar-naidi, sabsur-Judá-dulemar-imaksamalad-nukad, nega-dulesulidganga binyoed.
Ar wemar, Judá-yargine dulemar-gwen-ibmar-oakalossurmalad-ibe ablis eos gusmalad.
20 Judá-yargi, degi, Jerusalén-neggweburgi, degisadegu dulemar bukwa gudoed.
21 Dulemar-ibe-ablis-eosmalad, ¿baisur an dakoe?
Suli, baisur geg an daked. An buged-mai imakedsegad.”
Bab-Jehová, Sión-yargi megnonikoed.