NAIBI-ITOLEGED-GARDA
LAMENTACIONES
GEBE-SOGLENAID
Garda-nug
Naibi-Itoleged-Garda. We-garda-e-nuga Septuagintaʼgi, Griego-gayabali, Zrénoiʼye bileged. We sogleged, “Naibi-itogedgi namaklegedye,” degi, “Wile-itolegedgi namaklegedye.”
Naibi-Itoleged-Gardagi weyob sunmaklenaid
We-gardagi, Jerusalén-neggwebur Babilonia-sordamarse-ibitosadba naibi-itogedgi sunmaknaid. Degi, Israel-dulemar Babilonia-yalase gales-ebipilesadba naibi-itogedgi sunmaknaibalid. Bab-Dummadgi bensulid-nikadgi, degi, yoedse ibagan-nuegan danikoedgi sunmaknaibalid.
We-gardagine, weyob ilemakar sunmaklenaid:
1. Naibi-Itoleged-Garda-gebe-narmaklesad (1:1-22).
2. Bab-Jehová Jerusalén-dulemarga wile-itoged uksad (2:1-22).
3. Bab-Dummad-dule-wiledakedba yoedse-bendaklegoed edarbileged (3:1-66).
4. Sión-neggwebur-sabsur-odurdakleged bergusad (4:1-22).
5. Jerusalén-dulemar-wilebukwad Bab-Dummadse-goled (5:1-22).
Be itogua.
1. NAIBI-ITOLEGED-GARDA-GEBE-NARMAKLESAD
1
(1:1-22)
Sión-neggwebur-galessiid naibi-itosiid
Sión-neggwebur dulemar-bukidar-nikagusanad,
emidi, ibiyobi walagwen-ganna sigisa.
Jerusalén-neggwebur, neggwebur-bamaladba-bur-nuga-nika-sigisanad,
emidi, ome-ei-sui-burgwisadyobi siid.
Jerusalén-neggwebur, neggwebur-bamalad-e-dummadga-sigisanad,
emidi, neggwebur-bamalad-e-maiga siid.
 
Mutikidbali, naibid-dummad-itogedbali bela-bela boed,
e-wagarbali e-ibyanis suurmakmaid.
Dulemar-nue-sabye-sogdimalad-abargi, e-gwage-baisur-ito-imakedi, wargwensaale sated.
Bela e-aimar egi aibichamalad, e-isdarmaladga gunonimalad.
 
Judá-dulemar esgoro-dubgi-atinnale,
yar-baidse gales selesmalad.
Dule-ainebarmalad-abalagi-gudidimalad,
gwen obunnoged amisurmalad.
Bela-balegindimalad, Judá-dulemar-bargasmalad,
sabsur-odurdaksamalad.
 
Sión-neggweburse-naega igarmar-mamaidi, wiles dakleged,
ar e-itoakwaa-ibagan-onolegedse dulemar bar nanasurmalad.
Bela e-yawagakmar bergus gwigwichid.
E-dule-irwa-Bab-Dummadse-gormalad bodimalad.
E-yagana, wile itodimalad.
Jerusalén-neggweburgi bela nunmakedbi neg-nagusad.
 
E-isdarmalad, e-dummaganga gunonimalad,
e-isdar-dakmalad, ibmar bur bule nikudmalad.
E-isgued-bukidar-nikad-ulale, Jerusalén-dulemar Bab-Dummadse sabsur-odurdaklenonimalad.
E-mimmigan gales aineba selesmalad, e-isdarmaladse ebipilesmalad.
 
Sión-neggwebur epenne e-yeerdaklesigusadi, bela bergunonikid.
E-dummagan, goe-sapur-gagan-maega-amididamaladyob gaamakdimalad.
E-balegindimalad-abin geggus wakitemalad.
 
Jerusalén-neggwebur, e-ibagan-isgana-nasad ebinsaed,
e-dulemar-gales-selemamaigusad, ebinsaed.
Epenne bela-ibmar-nuegan-bukidar-nikagusad, ebinsaed.
E-dulemar, e-isdarmaladse-galesmargua,
dule-bamalad gwen bendaksasulid.
E-isdarmalad, Jerusalén-dulemar-galakus-daksagua,
egi dodonai gusmalad.
 
Jerusalén-neggwebur bela-bela isgusad.
A-ulale, ib-isganaga gunonikid.
Jerusalén-neggwebur-ayaris-sii-dakarmargua, dulemar, iduar Jerusalén-nug-odummodimalad,
emidi, isdar dakmalad.
Jerusalén-dulemar na boed,
binge-itogedba na wagar odukued.
 
Bela e-mor nue-isgusad,
na e-berguoedgi binsassulid.
Ukiagwar oitolenonikid,
dule-bamalad gwen-wile daksasulid.
Emidi, soged: “Bab-Jehováʼye, an-wile-itoged be dake.
An-isdarmalad angi obichad.”
 
10 Jerusalén-neggwebur e-ibmar-nuegan-nikadi,
e-isdarad bela e-ibe susad,
E-Bab-Dummadse-goled-neggi, dulemar-Bab-Dummad-akudakmalad-ubosmalad
Jerusalén-dulemar daksamalad.
Bab-Jehová, be a-dulemarga igar-mesisanad,
mer an-igar-itoged-negse dogmaloye.
 
11 Bela Jerusalén-dulemar bodimalad, masgunned amidimalad.
Na dulagudigumalaga, e-ibmar-bur-nuegan masbina ogwaed.
Ise-boale sogmalad:
“Bab-Jehováʼye, be dake, ibiyobi an-wionanai.”
 
12 Sogdebalid: “Bemar-igarba-nadapmalad, be an-dakmala,
¿gwen-bai be an-daksuli?
Bab-Dummad-sabsur-an-wionaiyobi,
¿bia be deyob dule-wilenai daksamala?
Ar Bab-Jehová na nue-uludgua,
we-nunmaked anga barminonikid.
 
13 ”Bab-Jehová, nibneg-akale, soo barmialid.
A-soo, garmarse-bakale, an-ogumaksad.
An-iduale, saki nasiksad,
gannar sikirmakega an-imaksad.
Walagwen an-meted,
bali-bali nunmaked-itogega an-imaksad.
 
14 ”Bab-Jehová-sunnad an-isgued oatosad,
an-isgued akwa-dummad-aidikuedyob angi naid.
An-dukarba anga nasiksad,
an-gargangued nolloo imaksad.
Bab-Jehová, an-isdarmaladga an-urmaksad,
an geg amar-abin-imaked.
 
15 ”Bab-Jehová, an-neggweburgi bela sordamar-bulegan onisad.
Angi yolemalagala, dule-bamaladse gochad,
an-sapingan-oitogegala, dule-baiganse gochad.
Igi uva-nis-egurega uva-birgi annaledae,
deyobi Bab-Jehová, Judá-e-bunamala imaksad.
 
16 ”Bela we-ibmala boega an-imaked,
boedba nue an ataksurgusad.
Dule-an-gwage-baisur-ito-imaked an-walik gudisulid,
dule-wis-gadi-gadi-an-imaked, an daksulid.
Ar an-isdarmalad anmargi nakwissoggu,
an-mimmigan wargwen melledmarsunnad.”
 
17 Sión-dulemar, bendaklegegala gornanaid,
ar dule-e-gwage-baisur-ito-imaked sated.
Bab-Jehová-igar-mesnonikidba, Jacob-yar-naid-dikarba-neggwebur-bukmalad,
emidi, Jacob-e-isdarmaladga gunonikid.
Jerusalén-neggwebur ibmar-durwaga gunonikid,
ibmar-isganaga gunonikid.
 
18 “Bab-Jehová, innikigwadba ibmar-imakedid,
ar andi, e-igar-mamaidgi aibichad.
Bemar bela dulemar, nue an-itomala,
an-wile-itonaid be nue dakmala.
An-sapingana, bela-gales aineba selesmalad,
an-bunamala, bela-gales aineba selesmalad.
 
19 ”An-aimarse, an iseedi gornai gusanad,
aka bur angi aibichamalad.
An-dule-irwa-Bab-Dummadse-gormalad, an-girmar-dummagan, na dulagudigumalaga mas-amidigu,
neggweburgi burgwismalad.
 
20 ”Bab-Jehová, an-nunmak-itonaid, be dake.
An burgwe itoged.
An beba bela-bela ibsassursoggu, an-gwage suli-suli-ito naded.
Neg-magabali, an-mimmigan, es-suidgi oburgwilenanaid,
wegi negyabali, burgwed neg-gasa naid.
 
21 ”Dulemar an-gormaknaid itosmalad,
ar dule-an-gwage-baisur-ito-imaked sated.
Bela an-isdarmaladi, an-wilenaid wismalad,
be igi-an-imaksadgi wergumalad.
An igi-wilesa, deyobi wilemarmosun.
Be sabsur-odurdaklemaloye-sogsagusadi,
an-isdarmaladgi gwae be barmidasun.
 
22 ”Bab-Jehová, bela an-isdarad-e-isgumalad be dake.
An-isgusad-ular, igi be sabsur-an-odurdaksagusa,
deyobi be an-isdarmalad imakmoga.
Bato an bukidargus nunmaked-itodanikid,
nue-angi obin an itogusad.”