3
Dule-negsemamaid-isganamar sabsur-odurdaklegoed
1 Geb degine, an sogded:
“Jacob-dulemar-negsemamaid, Israel-dulemar-e-dummagan, nue be an-itomar:
Bemar bur igar-innikigwad-imaked-durdaked ¿nabirsursi?
2 Ar bemar igar-nued bur isdar dakmalad,
igar-isgana aka be yeer dakmalad.
An-dulamar be wiodimalad,
mesagwar be imakdimalad.
3 Bemar ibgwensur an-dulamar imakdimalad.
E-ukamar e-ibe be edared.
E-garmar bis-bis e-ibe be imaked.
Igi san-olomakar esmed-yagi onakledae, deyobi, an-dulamar be wiodimalad.
San-narilegedyobi, an-dulamar be imakdimalad.”
4 Bemar ibagwengi Bab-Jehováʼse gotemaloed,
edina, bemar-abin imakosulid.
Ar bemar dogdar isgusgudiidba,
a-ibagangine, bemar-idu banguoed.
Bab-Dummad-gayaburba-barsogmalad
5 Bab-Jehová weyob bemar-annik soged:
“Bemar Bab-gayaburba-barsogmalad,
dulemar-yamodimalad, igar-noaledba an-dulamar-sedimalad:
Unnila dule-bega-masgunned-ukmaladgarbi, igar-bogidikidgi be sunmakdamalad,
ar dule-bega-masgunned-uksurmaladgardi, bila-onoged be obariddamalad.
6 Degisoggu, an bar bemarga an-ibmar-sabiedi sogosulid.
Bipisaale bar an bemarga an-gayaburba sogosulid.
Bar anga-gayaburba-barsogmalad bemarga yoedse-ibmar-guoedgi sunmakosurmalad.
”An-gayaburba-barsogmalad bar sunmaksuli guoed
e-ibagan bergudoed.
7 An-gayaburba-barsogmaladi, bingedar itodmaloed.
Nergan aku neg-dake gudmaloed.
Ar bela wemar bar-ibmar sogosurmalad,
ar ade, an gwen ega ibmar sogosulid.”
8 Andi, Miqueas, Bab-Jehová-Burba nue-nika gudiid.
Igar-napiragwadi, degi, garganguedi, an nue-nika gudiid.
Adi, Jacob-dulemar ibmar-isgana-imakmaladgi an sunmakegar,
degi, Israel-dulemar-isgudiidgi an sunmakegar.
Jerusalén-neggwebur oitolesad
9 Jacob-dulemar-negsemamaid, Israel-dulemar-e-dummagan, be nue an-itomalo.
Bemar igar-innikimalad bur be obandimalad.
Bipisaale, bemar igar-maidgi binsaed-nika dasurmalad.
10 Ablis-eogedgi Sión-neggwebur be sobsamalad
igar-isgana-imaklegedba be Jerusalén-neggwebur sebukmalad.
11 Be-dummagan-negsemaladi, dule-baiganse-manigi-baklegar igar nabomalad.
Be-dule-irwa-Bab-Jehováʼse-gormaladi, manigi-bennuklegar dule-odurdakmalad,
degi, be-Bab-Jehová-gayaburba-barsogmaladi, manigi-bennuklegar dulega sunmakmalad,
aka bur Bab-Jehováʼga weyob sogdedamalad:
“¿Ar Bab-Jehováʼde anmarba gudisursi?
Degisoggu, anmar akar-guosulid.”
12 A-ulale, bemar-nukine Sión-neggwebur nainu-imuar-naidaedyob guoed.
Jerusalén-neggwebur akwamarbi ganna-ganna-bubukwa guoed.
Bab-Jehováʼse-goled-neg-e-yala, gannar sapurbi moodo naguoed.