2. BAB-JEHOVÁ BELA NAPNEG SEMAID
4
(4:1–5:15)
Sión-yala nug-dummarbaa guoed
(Isaías 2:1-5)
1 Ibagan-bergued-mosale, Bab-Jehováʼse-goled-neg-yala bur yala-biriginedga guoed,
yala-mulluganba bur nuga-nika guoed.
Dulemar-yar-baid-baidgi-bukmalad bela ase nonimaloed.
2 Dule-yar-baid-baidgi-bukmalad-bukidar-nonikoedi, sognonimaloed:
“Dagmar, anmar Bab-Jehová-yalase nakwenamar,
Jacob-e-Bab-Dummadse-goled-negse anmar namar.
Bab-Dummad, e-sunnad, e-igar-maidba anmar-odurdakoed,
degi, anmar e-igarba nanadii gumaloed.”
Ar ade, Sión-yalagi Bab-Dummad-Igar-Maid-odurdakleged danikid,
Jerusalén-neggweburgi Bab-Jehová-gayaburba ainidagoed.
3 Bab-Dummad, dulemar-yar-baid-baid-abargi dulemarga igar-nabogoed,
neggwebur-gandikmalad-bukibga, degi, dikasurmaladga igar-nabogega guoed.
E-es-suidmar napa-imuedga gudoed,
e-ila-swiswidikmalad es-dopegwadga gudoed.
Dule-yar-baid-baidginmalad, bar abin-abin urwosurmalad.
Bila-onogega, bar guagwar-gudii guosurmalad.
4 Bela dulemar bogidik e-uva-dubmar-urba-bukwa gumaloed,
degi, bogidik e-higuera-sapi-urba-bukwa gumaloed,
dule-bamaladi, gwen amar-ogwayosulid,
ar ade, deyobi, Bab-Jehová-Bela-Gangued-Nikad sogsad.
5 Ar bela dulemar e-bab-dummagan-nug ogannomalale, akarsulid,
ar anmardi, anmar-Bab-Dummad-Jehová-Bela-Gangued-Nikad-e-nugbi odummodii guoed.
Bab-Jehová, Israel-dulemar-gales-selesmalad onogoed
6 Bab-Jehová weyob sogded:
“A-ibagangine, dulemar-nailikguarmalad nuekwa an urboed.
Dulemar-yar-baid-baidse-mimilesmalad bulakwaa an oambikuoed,
degi, sabsur-imakledimalad nuekwa an oambikuoed.
7 Dulemar-nailikguarmalad napi besmaloed.
Amarde, neggweburga an imakoed.
Dulemar-yar-baid-baidse-mimilesmaladgi,
dulamar-bela-bela-gangued-nikadga an imakoed.
Ani Bab-Jehová ega Sión-yalagi yar-seoed,
degisadegu yar-semai guoed.
8 Sión-yala, Jerusalén-neggweburgi be siid,
neg-matusulid-nakulegedga be gunonikid.
Be epennegwadyobi, gannar gangued-nika be guoed,
Jerusalén, epenne be negsesadyobi, gannar be negseoed.”
Sión-yala sabsur-wilegoed, geb weligwar-itobaloed
9 Emide, Jerusalén, ¿ibiga be binnasuli gole?
¿Ar be, rey satesi?
¿Ibiga begi naibid-dummad noniki?
¿Ar bega-binsaed-uked burgwissi?
10 Sión-dulemar, ome-ugakgunaidaedyob, be binnasuli gole,
be binnasuli akiginne.
Ar be-neggweburgi be nooed,
magabali gaamakdii be guoed.
Babilonia-yalase be naoed.
Geb agine, be ollorgunonikoed,
Bab-Jehová be-isdarmaladgine be-onogoed.
11 Emigindi, dulemar-yar-baid-baidgi-bukwad-bukidar begi-gwisguega atosmalad.
Weyob sogmalad:
“Sión-yala-ibe anmar ibmar sunae.
¡Bitigi, Sión-yala galakusa an daksamalana yeerbanye!”
12 Degi-inigwele, we-dulemar Bab-Jehová-e-binsanaidi, degi, e-ibmar-imakbiedi wissurmalad.
Ar wemar wissurmalad, Bab-Jehová oros-dugmaklegedyobi e-saboleged-neggi e-urbemaloed.
13 Bab-Jehová sogdebalid: “Sión-dulemar, ¡ogusmar!
Oros-omukueyob be dulemar imaknamar.
Ar ani an moli-bebe-esgorogi-sobaledyobi gargangued an bega ukoed.
Moli-e-nag-goonasi-esgoro-gordikidgi-sobaledyobi, an bega gargangued ukbaloed.
Adi, bukidar neggwebur-bamalad napabi-nai be imakegar,
degi, bela e-ibmar-nuegan be ei subaligar.
Geb agine, a-ibmarmar anga be ukoed.
Ani an Bab-Jehová Napneg-E-Dummadga gued.”