17
Bab-Dummadse goled, an-bendakye
David, Bab-Dummadse goled.
1 Bab-Jehováʼye, an bese napiragwadgi wilesagwa-goledi, wis be an-itoge.
An bese-binnasuli-goledi, be an-itoge.
An bese-goledi, nue be itoge,
yamo an be-yardaknaisulid.
2 Bab-Dummadye, be ibmar-innikigwad-magar-daked-ular,
bee be an-bendakedga gue.
3 Be an-binsaed nue-dakdaed.
Mutikidba an nue-ulubgi-binsamaid be baramidaed.
Nue be an-wilubdaksad, ibmar-isgana be angi amissurgusad.
An na sogsad, an-sunmakedgi an begi isguosurye.
4 Be-igar-nued-mesisad-ular, dulemar-baigan-daedyobi an dasulid,
ibmar-isgana-imakedgi an nanadisulid.
5 Be-Igar-Maidba bur an nanadiid,
a-igargi gwen an bangudisulid.
6 Bab-Dummad, ar be an-abin-imakdasoggu, a-ular, an bese binnasuli goled.
Wis be an-itoge, an bese-goled nue be itoge.
7 ¡Be-sabed-sunsoged be anga oyoge!
Dulemar begi-bendakleged-amididamaladi,
dulemar-isganamarse baregilledidamaladi,
a-dulemar, be-ganguedgi be bendakdaed.
8 Ar dule-isganamar angi dummad-yolenanaisoggu,
igi be-ibyagwag na be akwe, deyobi, be an-akwemoga.
9 Ar dule-an-oburgwebimalad bato an-walik guakwaa gudimarsoggu,
igi gannir e-sakan-urba na e-mimmigan odukue, deyobi, be an-odukumoga.
10 A-dulemar, dule-wiledaked satemalad,
unnila na san-dummarba-imakedgi sunmakmalad.
11 An-isdarmalad-an-baregindimalad an-walikagusad,
angi ukiar sabsur-yolemalaga, guakwaa gudimalad.
12 Achumigur mas-gabiedyobi, an-isdarmaladde anbina gudimalad.
Achumigur e-mas-gaega balidakagwar maidaedyobi, anbina gudimalad.
13 Bab-Jehováʼye, ginebinne, an-isdarmalad-abin be nodage,
an-isdarmalad be obelodage.
Bab-Dummadye, be an-abonogega,
be-es-suidgi an-isdarmalad be oburgwedage.
14 Bab-Jehováʼye, be-gangued-nikadba, an-isdarmaladgi be an-onoge.
We-dulemar unnila we-napnegginbi ibmar-nika gudimalad.
We-dule-isganamar, be-ibmar-nuegan nue-nika gudimalad.
E-mimmigan, e-babgan-sorba, a-ibmar-nuegan abingadimarmogad.
Degine, e-wagangarmoga bela ibmar-nuegan obine abingadimarmogad.
15 Bab-Jehováʼye, andi, ibmar-oakalossurye be angi-sogsadba, an be-wagar dakoed.
Sikwas an be-wagar-daksale, bato gusbin an itogoed.