18
Bab-Jehováʼga dog-nuedye sogleged
(2 Samuel 22:1-51)
Bab-Dummad-e-mai-David, Bab-Jehováʼga we-namaked narmaksad.
Deunni, Bab-Jehová Saúlʼgi David-bendaknonigu, degi, e-isdarmaladgi bendaksabargu.
David weyob Bab-Jehováʼga sogded:
1 Bab-Jehováʼye, nue an be-sabed,
be an-niga-ogannoged maid.
2 Bab-Jehováʼye, be an-akwasailaga gued.
Be an-garganguedsoggu, an begi bensulid.
Bab-Jehováʼye, be an-neggandikidid.
Sigu-abgaedyob be an-idu bonigan-irwa gwisgued.
Be-garganguedgi be an-bendaked.
Bebi unnila bonigan-idu an-odukued-birigined maid.
Bab-Jehováʼye, be an-ollor-imakedid.
Bonigangi be an-ollor-imakdiid.
Ar an bese gotele,
an-isdarmaladgi-nakwega be an-imaked.
3 Bab-Jehováʼye, be-nug an ogannoged,
ar be-nug innikigwadba odummoleged maid.
Bab-Jehováʼye, an-isdarmaladgi an bendaklegoed.
4 Burgwed-igar nue an-ebiris gunaid.
Diwar-dummad-nomaiyobi, burgwed angi gwisgunonikid.
5 Bato an gachiyala megis-itoged,
gwillo angi-biles-maiyob an itoged,
gwen bar san-onoged an itosulid.
Burgwed-igar, an-idu saki-milesnaiyob naid.
6 An surbinsa-itodiidgi Bab-Jehováʼse an gote gusad,
Bab-Dummadse ise-gollar an imaksad.
Agine, e-neg-akale, an-itononikid.
Bab-Jehováʼse-an-gornaidi, e-uayagwar an-itosad.
7 Bab-Jehová-uludgua, neg giglimakded,
yar-sailagan-mamaidse-bakale, giglimakded.
8 Bab-Jehová-bunnodedbali waa bupurmakded,
e-gaya-yaba soo-gwabunyeded, ginnitibi soo-mialid.
9 Bab-Jehová mee mogir-egasad,
geb abali aidealid, mogir-gudureged-birgi aidealid.
10 Bab-Jehová baliwitur-querubinʼye-nugad-birgi-sii, mogir-imbaba nadapid.
Burwa-gandik-gormaidba gukumai gualid.
11 Bab-Dummad neg-gudureged-abargi nadapid.
E-irwa mor-dummad-naiyob mogir nagusad.
We-mogir dii-dummad-widanikiyob dakle sigisad.
12 Bab-Jehová-sabsur-gadedbali, mogirmar aisakided,
mogirmar dii-akwamaryob mileded,
sogunmar ginnitibi mileded.
13 Bab-Jehová nibneg-akale, mogirmar-dii-akwamaryob-milemaid-abalagine,
sogunmar-ginnitibi milemaid-abalagine, mala-gollomakmaiyob binnasuli sunmakded.
Bab-Jehová-Bur-Birigined-e-sunmaked bela neg-gaded.
14 Bab-Jehová sigu-milegeyob e-isdarmaladgi mar-odealid.
Bab-Dummad e-isdarmalad-oduurmaksad,
e-isdarmalad-oabarmakega imaksad.
15 Bab-Jehová, be-uludedbali demar-urba-napa-naid mag-dakle gunonikid.
Bab-Jehová, be-bunnodedbali, napasaila daled gunonikid.
16 Bab-Jehová nibneg-akale, anse e-argan oyononikid.
An demar-wilagi-gundilenai an-ononnonikid.
17 Bab-Jehová an-isdarad-buledgi an-bendaksad.
Bab-Jehová isdar-an-dakdimaladgi, an-ollor-imaknonikid.
An-isdarmalad-angi-obinmaladgi an-abonononikid.
18 Boniganba-an-galitonaidgi an-isdarmalad angi gwisgunonikid.
Agine, Bab-Jehová an-bendaknonikid.
19 Bab-Jehová wile-an-dakedbali, an-bendaknonikid,
neg-nuedgi an-ogwisgunonikid.
20 Bab-Jehová an ibmar-nued-imakedba anga ibmar-nued uked.
Ibmar-isgana-imakdisulidba nued angi binsaed.
21 Ar Bab-Jehová-Igar-Maidba an gudiid,
ibmar-isgana an imakdisulid,
Bab-Dummadgi an bangudisulid.
22 Ade, bela e-igar-uksad an nue-gasa gudiid,
e-Igar-Maidgi an bangudisulid.
23 Bab-Jehováʼga sogedba an gudiid,
ibmar-isgana-imaklegedgi an na san-bargas gudiid.
24 Bab-Jehová an ibmar-nued-imakedba anga ibmar-nued uked.
Ibmar-isgana-imakdisulidba nued angi binsamaid.
25 Bab-Jehová, dule-beba-bane-bane-inniki-nanadiidgine, egi be bane-bane inniki damogad.
Bab-Jehová, dule-igar-innikigwadba-nanadiidga, ega be inniki ibmar-imaked.
26 Bab-Jehová, dule-bega-gakansasulidga, be gakansasurmogad.
Be dule-emar-yardakedgardi, e-igar e-ibe be obured.
27 Bab-Jehová, dulemar na-san-bipi-imakdimalad, bonigangi-obinega be imaked.
Dule-na-san-dummarba-imakdimaladdina, be sabsur-wioged.
28 Bab-Dummad-Jehová, be dula-gudii an-imaked.
Bab-Jehová, an bonigan-abalagi-gudiidgi, san-burba-dula-gudii be an-imaked.
29 Bab-Jehová, be-an-bendakedbali, sordamar-danar-bila-onomalad an ogilogoed.
An-Bab-Dummad, be-an-bendakedbali, neggweburmar-galu-matusulid-nikad an obelogoed.
30 Bab-Dummad-e-ibmar-imakedi innikigwad imaked, e-gayaburba sunsogedid.
Bab-Jehová dule-egi-dukumaladga sigu-abgaedyob gued.
31 ¿Doa Bab-Jehováʼyob Bab-Dummadga mai? Dule sate. Unnila Bab-Jehováʼbi maid.
¿Doa Bab-Dummadyob-gangued mai? Dule sate. Unnila Bab-Jehováʼbi maid.
32 Bab-Jehováʼbi unnila anga gargangued ukmaid,
Bab-Dummadbi dobsuligudii an-imaked.
33 Bab-Dummad goe-sapur-abarmakedyob an-oabarmaked,
yar-billiganaba geg baparmakega an-imaked.
34 Bab-Jehová an-surgan ogannoged,
adi, an nabir bila-onogegar.
Bab-Jehová an-swidamar ogannoged,
adi, nabir warsi-esgoro-gordikidbiid an dopee imakegar.
35 Sigu-abgaedyob be an-irwa gwisgued,
be-garganguedgi be an-bendaked.
Be nued-angi-binsaedba nasguega be an-imaked.
36 Bab-Jehová, an nabir nanaega, melle an aimukuega, anga be neg-ollor-dummad nasiksad.
37 An an-isdarmalad-baregitegusgua, an indaksasulid, an bargadapid.
Bela an-isdarmalad-obelogedse an imaksad.
38 Bela-bela an an-isdarmalad naibi-imaksad,
degisoggu, gege bar angi gwisgu gusmalad.
An-isdarmalad anse nue-galakusmalad.
39 Bab-Jehová, bila-onogega be an-ogannosad,
an-isdarmalad anse-ibitogega be imaksad.
40 An-isdarmalad anse-galakudedba, wakinnega be imaksad.
Deyob isdar-an-dakdimalad an obelosad.
41 An-isdarmalad aisaar dule-e-bendakegala, emarse gornanai gusmalanad,
dule-e-bendaked sate gusmalad.
Bab-Jehováʼse gochamalanad,
Bab-Jehováʼdi abin-imaksasulid.
42 An-isdarmalad anse sanyob ichi-ichi gusad.
Amar ukub burwa-abin-mileddaedyob anse gusmalad,
sabsur-enalenai anse gusmalad.
43 Bab-Jehová, dule-angi-urwedimaladgi be an-bendaksad,
dule-yar-baid-baidgi-bukwamalad-e-dummadga be an-imaksad.
Dulemar-aku-an-dakmalad an-maiga gunonimalad.
44 Ibmar-imakoye an sogsale, a-dulemar, yog anba ibmar-imakar damalad.
Wemar-Israel-dulesurmaladi, an-nug odummodimalad.
45 We-Israel-dulesurmaladi, an-gaya-itosale, nig-argwate damalad,
e-dukued-yaba-bukwa-noarmalale, wawanmakdani noardamalad.
46 ¡Bab-Jehová dula-mai!
¡Bab-Jehová, unnila bebi an-bendaked maid!
¡Be-nug an odummosun!
Bab-Jehová, be an-abonogedid.
Be-nug bela-bela odummolesun.
47 Bab-Dummad anga an-isdarmalad-buged-mai imaksad,
Bab-Dummad, dule-yar-baid-baidgi-bukmalad an-maiga-gumalaga anga imaksad.
48 Bab-Dummadye, an-isdarmalad-angi-gwisguargua, be an-abonononikid.
An-isdarmaladgi-obinega be an-imaksad,
dule-ursilimaladgi be an-ollor-imaksad.
49 Degisoggu, Bab-Jehová, Israel-dulesurmalad-abargi an be-nug ogannoged,
Be-nug-odummogegala an namaked.
50 Bab-Jehová, e-rey bela-bela e-isdarmaladgi-obinega na imaked.
Na nug-imaksa-gudiidga, e-sabgued oyoged.
Davidʼga, degi, e-waganga, e-sabgued oyoged.
Degisadegu, e-sabgued ega oyodii guoed.