19
Bab-Dummad-neg-obinnisad
David we-namaked narmaksad. Namakmalad-e-iduedga soglenaid.
1 Mogir-naidi, Bab-Dummad-e-gangued-yeerdaklegedgi sunmaknaid.
Mogir-billi-aradgi bela-ibmar-naidi, Bab-Dummad-e-ibmar-obinnisad oyonaid.
2 Bela-ibmar-naidi, bane-bane ibginedbali, Bab-Dummad-e-gangued-yeerdaklegedgi na sunmaknanaid,
Bela-ibmar-naidi, bane-bane mutikidbali, Bab-Dummad-e-gangued-yeerdakleged na barsognanaid.
3 We-ibmarmar duleyob-sunmaksur-inigwele,
ibmar-bisurmar-inigwele, e-gaya-goled-itolesur-inigwele,
4 we-ibmarmar-naid-e-sunmakedi, napneggi bela itoleged,
bela napneg-dirbir-naid-ugakaase warmaked.
5 Bab-Dummad dad-ibelerga mogir-billigi neg-nasiksad.
Ar igi machered-ome-nikusad neg-oibosale, e-gabedneggi weligwar-noardae,
deyobi, dad-ibeler wakudaryalaba noardaed.
Ar Igi dule-abarmaked abarmaksokalir, yeer-itodae,
deyobi, dad-ibeler nakwiardaed.
6 Dad-ibeler mogir-billi-nagagi nakwidagogu, mogir-billi-bergunaidse argwandapdaed.
Dad-ibeler-e-ueregedgi ibdula gwen dukuosulid.
7 Bab-Jehová-Igar-Maidi, napiragwadid,
dule-burba-ogannogedid.
Bab-Jehová-Igar-Maidi, sunsogedid,
egi geg benguleged.
Bab-Jehová-Igar-Maidi,
dule-binsaedsulidaed binsaed-ibedga imaked.
8 Bab-Jehová-Islidik-Igar-Mesisad innikigwadid,
gwage-weligwar dule-saed.
Bab-Jehová-e-Igar swilidikidid,
magar-ibmar-itoge dule-imaked.
9 Bab-Jehová-dobee-nanaed-igar swilidikidid,
degisadegu mai guoed.
Bab-Jehová-igar-naboged, napiragwadid,
bela innikigwadbiid.
10 Bab-Jehová-e-Igar orba bur bule nuedid,
or-nuedba bur bule e-bina sogleged.
Bab-Dummad-e-Igar achanisba bur bule ochigwad,
achanis-aryomaidba bur bule osidikid.
11 Be-Gayaburba anga iduakwaa ibmar-soged:
“Nue salakarye.”
Ar dule a-Gayaburbaba ibmar-imakele,
bukidar ibmar-nuegan nikuoed.
12 ¿Doa e-nodiid na magar-itoge?
Bab-Jehováʼye, ibugi an begi nodidibe, an na wissulid.
Agi be an-ollorsae.
13 Deginbali, an yamo-begi-yoledaedgi, be an-ollorsabali.
We-isgued mer angi obined be sae.
Adi, dulemar bar angi sunmakosulid,
bar an isgued-dummad imakosulid.
14 Bab-Jehová, be an-edarbedid,
be an-odukuedid.
Degisoggu, an-sunmaked be yeer-itosana gadin,
ulubgi-an-binsaed be yeerdaksana gadin.