50
Bab-Dummad igar-nabononikoed
Asaf, we-namaked narmaksad.
1 Bab-Jehová, Bab-Dummadbi-maidi, goled:
Dulemar-dad-nakwedsik-bukmaladse goled,
dulemar-dad-argwanedsik-bukmaladse, onmakega goled.
2 Bab-Dummad, Sión-neggwebur-yeerdaklegedba,
dad-ibeler-gaeyob, e-maid oyomaid.
3 Anmar-Bab-Dummad-danikidi boo danisulid,
e-iduale, soo-dummadi gadanikid,
bela ibmar-ogumakdanikid.
Burwa-oored bela Bab-Dummad-ebiris danikid.
4 Bab-Dummad nibnegse gochad, napnegse gochabalid,
e-dulamarga-igar-nabolesokalid dakdamalagar.
Bab-Dummad weyob soged:
5 “Anga dule-islidik-gudimalad onmakmalo,
dulemar ibmar-ogumakar-uklegedgi anbo-igar-mesismalad, anga onmakmalo.”
6 Nibneg soged:
Bab-Dummad dulega igar-naboged-innikigwad maiye.
7 “Israel-dulemar, an-itomala,
an-sunmaksokalid nue-itomala.
An-dulamar, an begi sunmaksokalid:
Ani an be-Bab-Dummadid,
unnila, anbi Bab-Dummad maid.
8 Bemar anga ibmar-ogumakar-ukdamaladgi an yolesulid.
Bemar anga gusgu ibmar-nued-ukdamaladgi an yolesulid.
9 Be-moli-bebe-nikad-sapingana e-galugi-bukwadbina an sogsulid.
Be-sibad-machergan e-galugi-bukwadbina an sogsulid.
10 Ar bela ibmar-durgan-sapurba-bukwad, angadbiid,
bela molimar-yalaganba-bukwad, angadbiid.
11 Bela nuumar-sapurba-bukwad angi yoggusisulid,
bela ibmar-durgan-yalaganba-gudinanaed, angadbiid.
12 Degisoggu, an mas-gunbiele, an bese gochasuliled.
Ar bela we-napneg, angadbiid,
bela ibmar-we-napneggi-bukwad, angadbiid.
13 ¿Ar moli-bebe-nikad-e-san-gunnedgi an gudisi?
¿Ar sibad-machered-e-ablis-gobedgi an gudisi?
14 Anga weligwaledgi dog-nuedye be sogdage.
Anga, Bab-Dummad-Bur-Biriginedga be ibmar-imakoye-sogsad, be imakdage.
15 Bonigan-abalagi be gunaidgi, anse be gole,
an be-bendaknonikoed.
Bedi be an-nug-odummogoed.”
16 Bab-Dummad dule-isganagardina, weyob soged:
“¿Doa bega soge, An-Igar-Maid be absogoye?
¿Doa bega soge, An-Igar-Maidgi be sunmakoye?
17 Ar be durdakleged-igar abesulid.
An-gayaburba be isdarsun-daked.
18 Ar be atursamalad-dakardibe, eba be naddaed,
dule-gambasamalad nabir be daked.
19 Be-gayadina ibmar-isganagi sulibinsa sunmaked,
be-gwabindukudina, unnila, gakansaedginbi sunmaked.
20 Ar be-gwenadgi gusgu be yolegar sunmaked,
amba be-gargwenadgine be gakansabalid.
21 Bela be we-ibmar-imaksadba, an bese gochasulid.
Ande beyobye, ¿be binsasunde?
Emisgindi, an bese urwoed.
Bega an bakar ibmar sogoed.
22 Bemar an-ieddamalad,
an bega ibmar-sogsad nue egi be binsamalo.
Degisulile, anse be ibitomaloed,
dule-wargwensaale be-bendakosurmalad.
23 Dule anga dog-nuedye-sogega, ibmar-nued-ukedi, an-nug odummoged.
Dule na e-daed ogwaele, an ega abonoleged-igar oyononikoed.”