51
Bab-Dummadse isgusad-ular wilenaid
David Betsabéʼbo galagwensuli-gusad-sorba,
Bab-Dummad-gayaburba-barsoged-Natán Davidʼse arbid.
A-sorbali, David we-namaked narmaksad. Namakmalad-e-iduedga soglenaid.
1 Bab-Dummadye, be dule-wiledakedba, be wile-an-dake.
Be bela-bela-dule-sabedba, an-isgued be anga elie.
2 Bela an-ibmar-isgana-imaksad be anga obeloge.
Bela an-isgued be anga osuloge.
3 An ibmar-noar-imaksadi an magar itoged,
an-isgusad an nue wisid.
4 Bab-Jehová, beginbi, unnila beginbi an isgusad.
Be-asabin an ibmar-isgana imaksad.
Agala, be-igar-nabogedgi be-igar-mesedi innikigwadid.
Be-igar-naboged dule geg egi akarsoged.
5 An gwalulesad-akale, an dule-isgana gued,
an sapibeneggi-maigusad-akale, bato an dule-isguedid.
6 An nue-wisid, be dule-inniki-gudiid nue-sabed.
Burbale, nue-binsaed-nikadaed be an-odurdaksad.
7 An swilidik-guega, hisopo-gagangi be an-nudake.
An boo-sibudikidba bur bule sipuu guega, swilidik be an-imake.
8 Weligwar be an-imake, yeer-ito be an-imake,
be an-san-sabsur-odurdaksad gannar yeer-itoge be imake.
9 An-isgued mer be bar ebinsae,
an-ibmar-isgana-imaksad bela be osuloge.
10 Bab-Dummadye, gwage-swilidikid be anga nasike.
Burba-swilidikid be anga uke.
11 An be-walik-gudiidgi mer be an-ononnoge.
Be-Burba-Isligwaled mer be angi obane.
12 Be-abonolegedgi-weligwar-itolegedi, gannar be anga udage.
Uaya-nikadae be an-imake.
13 Geb deyobi, be-igar-maidgi-yoledimalad an be-igargi odurdakoed,
geb dule-isgudimalad gannar bese nonimaloed.
14 An-Bab-Dummad-an-abonogedye, an dule-ibe-ablis-eosadgi be an-ollorsae,
adi, an be-igar-innikigwadgi namakdii guegar.
15 Bab-Dummadye, an be-nug odummogega,
ibmar-biega be an-imake.
16 Ibmar-ukleged an bega-ukele, be yeerdakosulid.
Ibmar-durgan-ogumakar-ukleged an bega-ukele, be abingaosulid.
17 Ar begardi, dule-na-e-isguedga-wile-itogedi, ibmar-uklegedba bur-nued gued.
Bab-Dummad, dule-na-e-isguedga-bukib-itogedi, bedi isdar daksulid.
18 Be-nued-binsaedbali, Sión-neggwebur-nasgumai be imake.
A-Jerusalén-neggwebur-e-galu-dummagan be gannar ogwiche.
19 Geb be-igar-mesisadba-ibmar-bega-ukleged be abingaoed.
Ibdurgan-bela-gwagwar-ogumakar-bega-uklegedi be yeer dakoed.
Geb moli-bebe-nikad-sapingan bega-ibmar-ogumakar-ukleged-ailagi ukledoed.