52
Dule-isgudiid, binsa san-odummodiid
David we-namaked-Masquilʼye nugad.
Deunni, Edomʼgined-Doeg Saúl-owisonadgu:
David Ahimelec-negse nadye. Namakmalad-e-iduedga soglenaid.
1 Be, na-san-buled-imaked, ¿ibiga be-isguedgi be san-dummarbaa imake?
¡Bab-Dummaddi dule-sabgumaiguad!
2 Be-gwabin-duku, esbipi-nugar-datarmakaledyobid, emar-obelogedginbi binsaed,
gakanginbi sunmaked.
3 Igar-nuedba bur bule, igar-isganabina be soged.
Igar-nabiridba bur bule, gakansaedbina be itoged.
4 Gakansaed-gwabin-duku be sediid.
Be-sunmakedgi emargi-urwed be yeer itodaed.
5 Bab-Dummaddi, ilagwen-be-obelogar imakoed.
Be-negyaurgi be-onogoed, we-napneggi be-obelogoed.
6 Dule-nuegan, we-ibmar dakmaloed,
nue-dobee itodmaloed.
Weyob be-annik dodoakwaa sunmakdemaloed:
7 “We-dule-isgana, Bab-Dummadgi-bendakleged-amissulid, be dakmala.
Unnila ibmar-nue-nikadba na yeer itosad,
e-ibmar-isgana-imakedgi gwen bangussulid.”
8 Andi, Bab-Dummadse-goled-neggi olivo-sapi-durbamakar-daedyob gued.
Andi, degisadegu, Bab-Dummad-e-sabguedgi bensulid.
9 Bab-Dummad, andi be-ibmar-imaksadba be-nug-odummodii guoed.
Bede dar dule-nuedsoggu, begine an bensuli gudioed.
Dule-nuegan-abargi an bese gordii guoed.