115
Anmar-Bab-Dummad-nibneggi-maid
1 Bab-Jehová, be-nug-odummolegega bega namakleged.
Anmar-nug-odummolegega namaklesulid.
Be dule-wiledakedba, be ibmar-innikigwad-sogedba,
a-ular, bega namakleged.
2 Ar ibiga dulemar-yar-baid-baidgi-bukwamalad anmarga sogoe:
“¿Bia be-Bab-Dummad nadsunna?”
3 Anmar-Bab-Dummad nibneggi maid,
ar ibi na imakbigusa, bela imaksad.
4 Dule-baigan ibmarmar-e-bab-dummadga-imakbukwadi, manigi sobaled, orgi sobaled,
dulemar e-argangi sobsananaed.
5 We-ibmardi, gaya nikamalanad, degite, sunmaksurmalad.
Ibya nikamalanad, degite, aku-atakmalad.
6 Uaya nikamalanad, degite, itosurmalad.
Asu nikamalanad, degite, ibmar-yapanned usurmalad.
7 Argan nikamalanad, degite, ibmar ebusurmalad.
Nag nikamalanad, degite, nanasurmalad.
E-dolewar nikamalanad, degite, ibmar-soggwensaar bisurmalad.
8 E-sobmalad, deyobi gumarmogad,
bela-egi-bengusurmalad, deyobi gumarmogad.
9 Israel-dulemar, ¡mer Bab-Jehováʼgi bengumala!
Na e be-bendaked gued,
be-sigu-abgaedga gued.
10 Aarón-wagan, dule-irwa-Bab-Dummadse-gormalad, ¡mer Bab-Jehováʼgi bengumala!
Na e be-bendaked gued,
be-sigu-abgaedga gued.
11 Bab-Jehová-urbali-gudimalad, ¡mer Bab-Jehováʼgi bengumala!
Na e be-bendaked gued,
be-sigu-abgaedga gued.
12 Bab-Jehová anmar-ebinsaed,
anmargi nued binsaed,
Israel-dulemargi nued binsaed,
Aarón-wagangi nued binsaed.
13 Bab-Jehová, e-urbali-gudimaladgi nued binsaed,
dule-nuga-nikamaladgi nued binsaed,
dule-binsarmaladgi nued binsabalid.
14 Bab-Jehová bemarga bur bule mimmigan-mergumai imaksun,
be-waganga mimmigan-mergumai imakbarsun.
15 Bab-Jehová-nibneg-obinnisadi, bemargi nued-binsaena gadin.
Bab-Jehová-napneg-obinnisadi, bemargi nued-binsaena gadin.
16 Nibneg, Bab-Jehováʼgadid.
Napnegdi, Bab-Jehová dulemarga uksad.
17 Dule-burgwarmalad Bab-Jehová-nug odummosurmalad.
Dulemar-neg-urba-diglesmamaidi, Bab-Jehová-nug odummosurmalad.
18 Ar anmardi, emi-akale, Bab-Jehová-nug
degisadegu odummodii gumaloed.
¡Aleluya! ¡Bab-Jehová-nug odummolesun!