116
Bab-Dummadga-doggus-nuedye-soged
1 Bab-Jehováʼbina, an bela-belad soged.
An-ese-wilesakwaa-goledi an-itoged.
2 Ar Bab-Dummad an-itodasoggu,
bane-bane an burgwedse ese gordii guoed.
3 Burgwed-igar nue an-ebiris nagusad.
Burgwarmalad-meged-galu anbina nue-itos naid.
Degidbali, surbinsa an itoded,
gwage-nunmak an itonaded.
4 Degidgine, Bab-Jehováʼse an goted:
“Bab-Jehováʼye, wis be an-bendakye.”
5 Bab-Jehová, wile-dule-dakedid,
dule-innikidaedid.
Anmar-Bab-Dummad, ise-wile-dule-dakedid.
6 Bab-Jehová, dule-belagwadamalad akwemaid.
An nue-bela-maidgi, an-abonosad.
7 Emigindi, an bar bukib-binsaosulid, gwage-bogidik-gudii guoed.
Ar Bab-Jehová angi nued binsasad.
8 Bab-Jehová, bee be burgwedgi an-san-burba-onosad,
an-ibyanis be elisad,
galagwensuli-gudiidgi be an-onosad.
9 Degisoggu, dule-bukwamalad-abargi,
Bab-Jehová-asabin an gudii guoed.
10 An nue-bukib-itodiiye an sog-inigwele,
amba an Bab-Dummadgi bensulid.
11 An sulibinsa-itogedgi an sogsad:
Bela dulemar gakansaedbiiye.
12 Bab-Jehová bela-belad angi nued-binsasadi,
¿ibugi an bennukoe?
13 Unnila abonolesad-ular, Bab-Jehováʼga dog-nuedye-sogega, noggi an vino ukoed.
Unnila Bab-Jehová-nuggi an goloed.
14 Unnila Bab-Jehováʼga an ibmar-imakoye ise-sogar-sogsadi,
bela dulemar-asabin an imakoed.
15 Bab-Jehová dule-eba-nanaimalad-burgwedi
bela-bela yeer daked, ega ibnuedid.
16 Bab-Jehová, ani an be-maiga gued.
An be-machi-innikigwadid,
an be-maiga gudiid.
Galessiidgi be an-ollor-imaksad.
17 Bab-Jehová, an bega doggus-nuedye-sogega, ibmar-ogumakar-ukleged ukoed.
Bab-Jehová, be-nuggi an goloed.
18 Bab-Jehováʼga an ibmar-imakoye ise-sogar-sogsadi,
bela e-dulamar-asabin an imakoed.
19 Bab-Jehováʼse-goled-neg-imbagi an imakoed,
Jerusalén-neggwebur-abargi an imakoed.
Aleluya, ¡Bab-Dummad-nug odummolesun!