143
E-bendakega, degi, e-iduega Babse-goled
David, we-namaked narmaksad.
1 Bab-Jehováʼye, an bese-goled be itoge,
an-wilesakwaa-goled, be itoge.
Be-ibmar-soged-imakedba, be an-abinsae.
Be-Igar-innikigwadba, be an-abinsae.
2 Dummad, mer be anga igar-itoge.
Ar be-asabindi, dule-wargwensaale na nuedye sogosulid.
3 An-isdarmalad an-oburgwebied,
napayala bikiin an-metemalad.
Dule-dikasurgus-burgwismaladyob
negasichidgi-megega an-imaksamalad.
4 Bar an nue-bunnosurgusad,
an-gwage bogiled an-itoged.
5 Epenne ibagan-nasmalad an ebinsaded.
Belagwable be-ibmar-dummagan-imaksadgi an binsaded.
Be-ibmarmar-imaksad, nue an ebinsaded.
6 An-argan an besik oyoged,
ar igi napa-dinnagwad dii-abedae,
deyobi, an bebina soged.
7 Bab-Jehová, gwae be an-abinsae,
ar an geg-sagusad.
Be-wagar mer be angi odukue,
ar degiile, dule-napa-yaba-digarmaidyobi, an guoed.
8 Wakudaryalaba be-sabgued be anga oyoge,
ar andi begi bensulid.
Ar andi bese goled,
be anga oyoye, ibu-igarba an naoe.
9 Bab-Jehová, an-isdarmaladgi be an-ollorsae,
ar andi begi dukued amied.
10 Be-sogedba-ibmar-imakedgi be an-odurdake,
ar be an-Bab-Dummadid.
Be-Burba-nued neg-bonigan-satedba an-idue.
11 Bab-Jehová, be-nug-ular, dula-gudii be an-imake.
Be-Igar-innikigwad-ular, surbinsa-itogedgi be an-onoge.
12 Be-dule-wiledaked-ular, an-isdarmalad be ogiloge.
Bela an-balengindimalad be obeloge, ar andi be-mai gued.