144
Yar-onasguye, Bab-Dummadse-goled
David, we-namaked narmaksad.
1 Bab-Jehová-nug odummolesun,
an-akwasailaga guedid.
Bila-onoged-idu, an-surgan-ogannogedid,
urwed-idu, an-arganmar-ogannogedid.
2 Bab-Jehová, an-sabguedid, an-edarbedid,
bonigan-idu an-odukuedid,
bonigangi an-ollor-imakedid,
an-sigu-abgaedyob an egi dukuedid,
an egi bensulid-nikadid,
an-urbaligwa-nanaega dulamar-imakedid.
3 Bab-Jehová, ¿wede, dule ibusunna, egi be binsanonigu?
¿Wede, dule ibusunna, be akwenonigu?
4 Ar dule unnila gayagi buu-imaklegaledid.
Ar e-ibagan unnila negsichigwad-ukiar-nasdaeyobid.
5 Bab-Jehová, be-mogir be egae, be aidedage.
Yalamar be ebuge, waa-obupurmake.
6 Mala-ibyemakale be odege,
dule-isdardakmalad be oaisakie,
be-sigumala egi be mie,
dule-isdarmalad-oduurmakega be imake.
7 Nibneg-akale, be-gangued be anse oyoge,
dii-wiladgine be an-onoge,
dule-isganamargi be an-ollor-imake.
8 Ar sunmakdemalale, gakansaddamalad,
argan-onakwidmalale, nabiridyob ibmar-ise-sogar imakdamalad.
9 Bab-Dummad, na begala namaked-gwapidgi an namakoed.
Gar-arpa-dub-giambe-nikadba (10) an bega namakoed.
10 Bila-onolegedgi be reymar-onakwemaidid.
Be-mai-David-melle-es-suidgi-burgwega be imakedid.
11 Be an-bendake,
dule-isganamargi be an-ollorsae.
Ar sunmakdemalale, gakansaddamalad,
argan-onakwidmalale, nabiridyob ibmar-ise-sogar imakdamalad.
12 Anmar-mimmigan, e-dungumaidba sapimar-binnasuli-dungumaiyob be imako.
Anmar-bunamala, reyneg-e-buarmar-sobarmaladyob, yeerdaklege be imako.
13 Anmar-ibmar-gwag-sabomaladgi bukidar masmar-akar-akar ena-ena bukuega be imake.
Anmar-sibad-wawaadmar, mili-miliba-omelomai (1,000-1,000) be imake.
Anmar-nainugi, mili-miliba-bukuega be imake.
14 Anmar-moli-bebe-nikad-omegan, obargudiguega be imake.
Mileged-ibagan-iduar, melle milegega be imako.
Melle anmar-neg-imbabali,
bar dule, suli-suli-itogedba-gordiguega be imako.
15 Neggwebur we-ibmarmar bela nikale, egi-nued-binsalesdo.
Neggwebur, Bab-Jehová e-Bab-Dummadga-imakdiile, egi-nued-binsalesdo.