Jesocristopa Huanodsa itedsejemacca ima ahuato inanajaro
Apocalipsis
Jesocca dodosse Huano jadahi tocajadsapa dsama bedeni onini Patimo passo imenidsa huittidsacossajarodsa madijari. Aja Romanodenicca tamine Jesocristo tahimaridsa jipera tadsa Huano dama inadsa Patimohuaji dosse inajari. Nahi Patimohuaji madijaripa pina toponi cocorodsa huedsajarissa najari. Nahidsa madidsapa pina pocca huadassa nadsa Dio Corime itedsejemacca ima pohuadsa ahuato inanajaro. Nadsapa Huano pohua qqui tajaricca dsodo inajaro.
Ajijaro imapi Jesocristodsa jehe quinajaridenidsa dsodo inajaro. Motapa Romanodenicca nanajidso toquejenajari. Motapa tojicajari, mota tocassiejerajarideni ajijaro ima mittamanadsapa poccadeni jeheniji todacorani nanijine pohuadenidsa dsodo inajaro. Ia naqui Romanodenicca nanajidso iquejena-jeraraha ajijaro ima imittadsapi icca jeheniji todacorani nanijine pajirani.
Ajijaro imapi Diojine Huanodsa ahuato inanajarocca imittani. Jeso ccanibote nadsapa ajijaro dsamadsa tojaridsa-ponijinecca ima dsodo inajaro. Dsama jicanicca naqui ima dsodo inajaro.
Huano qqui tajaripa bica tanicca, oppina tanicca, jidsa tanicca, ijabojo nanicca. Pohua qqui tajari huapimapi jidsa taraha ima deni tojanicca cajini.
Ajijaro imadsapi Jesodsa: Edede Bedi, najari. Pohuadsa nama najaripa tahide jodiodeni poccadeni imasiri manaconi edede bedi Diodsa da da quiquinanapojari. Jesopa huapimacca imasiri manaconi tojadsa pohuadsa: Edede Bedi, nanaja najari Dio.
Ajijaro imadsapi Diocca huadi Satanapa ajamani tojahi ahuato tajari. Jesona deni tojajari. Pohuana huapimacca tamine tojadsa memecca namicca dossede tojajari.
1
Jesocristojine Huanodsa jidapanacca ima ahuato, nidsa dsotodecca ima ahuato inanajaro
1 Diona Jesocristodsa itedsejemacca ima ahuato inanapojaro. Manaco Jesocristopa pocca medsedenidsa ahuato inananijine. Ajijaro ima iadsa ahuato inananijine Jesocristo pocca dodosse memehuajicca dosse inaronadsapa ohuadsa huati tajari. Pohuajine qqui onajaro. Ohuapi Huano, Jesocristocca medse ojani. 2 Aji huapima ohua qqui onajaropi pajissa huati onajaro. Aji dsodo onajaropi pajissa Dio Atti Jesocristojine ohuadsa ahuato inanajaro.
3 Ajijaro ima Diojine ahuato tajarocca madija huapima mittamanahijine hua hua najaripa huatidsehema madihitohui. Mittamanajarideni naco aji dsodo naniccassa inanamanajarodeni naco huatidsehema madimanahitohui. Diojine ahuato inanajaropi tohuajirajonani.
Huanopa Jesocristodsa quequeriqquimana najari 7 najarodsa dsodo inajaro
4 Ohuapi Huano. Ajijaro occa imapi aji Asiahuajicca odsa panani 7 nanihuaji Jesocristo tahimaridsa titiqueriqquimana najarodenidsa dsodo onajaro. Diopa madihi. Nadsama madipojari. Nidsa ccajonahitohui. Ccajonadsapa tiadenidsa ima bicani inanaridsana. Pocca jonehe inanaridsana, onajaro. Dio Pohua dosse dosse nanaja nahicca huihuittari tadsajanima Pohua Corime 7 quinaha domo huajarideni naco tiadenidsa ima bicani inanaridsamanana. Poccadeni jonehe tiadenidsa inanaridsamanana, onajaro. 5 Jesocristo naco tiadenidsa najarossa inanaridsana, onajaro. Pohuapa Dio Atti nahato tadsa pajissara huati huati tajari. Pohuana tahide nahatonipojari. Pohuapa dsama huapimacca tamine deni tojajari. Huapimadsa dosse dosse najari. Jesocristo iadsa huati huana tajari. Imasiridsa imadiraha pohua emene toccajarojine icca imasiri inajicaridsajaro. 6 Pohuajine pocca cacahuanijidsa iquejenajaro. Pohuajine pocca Abi Diodsa idsepe ijijaro. Diodsa dada toqquimade, huahuati toqquimade iquejenajaro. Nadsapi Jesocristodsa ehetidse nana. ¡Pohuapa bica tahi, deni tojahi! Pocca nahatonaja huapima ecahuadsanaponijine pocca deni tojehe pajiranissa tajaro. Apaja pohuapa nama dsanapohuitohui, inana, onajaro. Pajissa nema nana.
7 ¡Ticattomama canaji!
Jesocristo meme essenima ccaronahi qqui tiquinahitohui.
Madija huapima qqui toquinahitohui.
Aja Jesocristo pohua nanadsoqquededeni naco qqui toquinahitohui.
Dsama huapimacca madijapa pohuatohui oji oji quinahitohui.
Jehe, pajissa nema nana.
8 Ia Medsede Dio Attipa: —Ohuapi Dio Dacorabote. Tahidedsama omadipojaroa aji jicaqquini bacco onanitohui −nade ia Medsede attipa. Pohuapa madihi. Nadsama madipojari. Nidsa ccajonahitohui.
Huanodsa Jesocristo ahuatojari
9 Ohuapi Huano timecotedeni ojani. Titedsejedeni Diocca cacahuehedsa iquejenajaro. Madija Dio Attidsa jiperaqquiri najaripa ia totonajidso-baqquimana najari. Naraha Jesocristojinepi ima inahananijine ipajirani.
Ohuapi passo nocconidsa dsama huittidsacossani Patimodsa ohua inebomanadsapi pina toponi cocorodsa ohuedsajarossa najaro. Dio Atti maride ojaridsadsa, Jesocristo tahimari ohuaccora-ridsadsapi Pohuadsa jiperaqquiri najaridenijine todsepe ojajaro. 10 Ia Medsedecca huada domingodsa Dio Corimecca dacorehe ohuadsa ahuatomadsa mohuini dacorehema ohuedehuaji omittajaro. Atti mohui pina jeijei mohui dacorajarissa nadsa omittajaro. 11 Atti ajama najari: —Ajijaro huapima tiadsa nohue onajaropi papeodsa dsodo taji. Aji dsama Asiahuajicca Jesocristodsa quequeriqquimana nahi 7 naridsajarodsa ima dosse tinaridsanijine. Odsa panani Epesohuaji, Esmirnahuaji, Peocamohuaji, Tiatirahuaji, Saradisiohuaji, Piradeopiahuaji, Laodiseahuaji dosse tinaridsaji −nade atti mohui tadsa. 12 ¿Nejecojari atti? onadsa piti onahuajanidsa qqui onanaja jojororo pinine dsibehi tajari orocca 7 quinaha qqui onajari. 13 Qqui onanaja jojororo pinine cacahueri nahi nocconidsa pina madija bedissa naha hua canajari. Pocca etero dequerajaro amoridsa bacco tajaro. Pohua biji mete ssossoque dsibehi tajaro pina orossa najaro. 14 Tati conepi nopo tajaro. Pina edede bedi nopohui conessa, pina ssono tetepinicca ssirini noponissa najaro. Pohua noccopa pina dsippo jororonissa najaro. 15 Pohua amori naqui dsibehi tajaro. Pina ccara tahicca onini bronce dsippo ppoconidsa tojadarijaro, dsotode jiti nadsa todsibehijarossa najaro. Pohua atti dacorajaro, pina passo dacorehema ssahaha canajarossa najaro. 16 Pohua dsepe nahatoniccadsa abadsico bedi 7 canaha cajijari. Pohua ajaridsapi jadsirecca massito cajadsireqquimera najarossa najaro qquenajaro. Pano naco dsibehi tajari pina maji itetepidsa ssiejene dacorajarissa najari.
17 Qqui onadsapa pina ohuatiajarossa najaro. Pohua amorihuaji ohuedimadsa oponajaro. Naraha pohua dsepe nahatoniccadsa ohua bara nadsa huati tajari: —Ticappina-jeraji. Ohuapi tahidedsama omadipojaroa aji jicaqquini bacco onanitohui −nade. 18 —Ohuapi camitta onani. Odsoqqueporaha onahatonidsapi omadi-dsanaponitohui. Ohuapi pipico ocajini. Najaripa dsoqquemana-pojarideni corime cacahuabaqquihicca pipico −nade Jesocristo ohuadsa. 19 Nadsapa ohua cadossejari: —Aji huapima qqui tinajarocca dsodo taji. Aji jidapana tojaridsajarocca dsodo, nidsa dsotode tojanijinecca dsodo taji. 20 Aja abadsico bedi 7 canaha odsepe nahatoniccadsa qqui tinajari, jojororo pinine orocca 7 naha qqui tinajaricca ima ahuatora taraha imapi ajima najaro: Aja abadsico bedi 7 canajaripa otahimaridsa quequeriqquimana najari 7 najaro cacahuade toquejenajaridenicca ima. Aja jojororo pinine 7 najari naco otahimaridsa quequeriqquimana najari 7 najaro −nade Jeso ohuadsa.