1 Kwa ‑dhɔ 'ö‑ "sinma ‑yö kwa Dë Atanna ‑kë, 'ö‑ ‑wɔn 'gü 'wo kwa ‑dhɛ ‑zianwo ‑a bhang ‑nu bha kaa ꞊dede ‑kaa ‑ga bha. "Kɛɛ 'sa kwa‑ 'ka "dhʋ̈ tɛan‑ ꞊dede 'ka. ꞊Ya kë ꞊dhɛ "kpʋngtaamɛ ‑nu 'wii kwa dɔ‑ ‑bha, kö Atanna dɔ 'ö 'wii‑ wo 'yö ‑kë. 2 N dhɔɔbhaamɛ ‑nu, ‑yö kë ka "yaan ꞊dhɛ 'kwa kë Atanna ‑bha 'në 'ka dɔ 'kwa‑ wo ya‑ 'gü. 'Pë 'kö 'kwa dho kë‑ 'ka ‑dhɛkpaɔ dhia" 'gü ꞊në 'kwii‑ dɔ ꞊kö 'kpakpadhö ‑së 'ka, "kɛɛ kwa‑ 'wɔn ‑zë ‑dɔ ꞊dhɛ ‑dhɛkpaɔyi 'ö Klisi ‑bha 'yënng‑ dho ‑ya 'ka dhang‑ ‑bha bha kwa ‑dho kë ꞊dhɛ ‑a 'dhö, ‑a ‑gɛn ‑mü ꞊dhɛ kwa ‑dho "yan ‑kpan ‑bha kö 'ö ‑kɔ do 'ö‑ ‑bha ꞊në 'ö‑ ‑bha. 3 Mɛ "ʋʋ mɛ 'ö ö ‑zʋ gɔn ꞊dhɛ ‑kɔ bha‑ 'dhö, ‑yö ö ‑dɩ ‑kë "slʋ̈ʋ̈slʋ̈ ‑zian ꞊në‑ ꞊mɔɔ kë "dhʋ̈ kö 'ö kë ꞊dhɛ ‑a 'dhö.

4 Mɛ "ʋʋ mɛ 'ö ö ‑gɔ ‑gban 'wɔn yaa kë ‑sü 'gü kö ‑yö Atanna ‑bha 'tɔng‑ ꞊në‑ bho sië bha, ‑a 'klɔɔ‑ ‑mü ꞊dhɛ ‑a ‑bha 'tɔng‑ bho ‑sü bha ꞊në 'wɔn yaa kë ‑sü 'ka. 5 "Kɛɛ 'sa ka ‑zë ka‑ 'wɔn ‑dɔ 'kpakpadhö ꞊dhɛ Yesu Klisi 'ö yö ‑zë 'wɔn yaa ‑tangga ‑zian 'yaa‑ ‑bha bha, ‑yö ‑nu "kpʋng ꞊taa kö 'ö kwa ꞊sɔng ‑nu ꞊në‑ bho kwa ‑bha. 6 ‑A ‑wɔn 'gü, mɛ "ʋʋ mɛ 'ö‑ pö ö ‑dɩ ‑dhɛ ꞊dhɛ wɛng wo ‑kɔ ‑yö 'ko ꞊kwɛng, ö ‑ya yö ꞊në‑ ‑bha ‑ya 'gü, ‑yö ö bo ꞊në‑ wo 'wɔn yaa kë ‑sü 'ka tongtongdhö, ‑a ‑gɛn ‑mü ꞊dhɛ 'mɛ 'ö ö ‑gɔ ‑gban 'wɔn yaa kë ‑sü 'gü kö 'yii‑ yö ꞊në‑ wo "ɛɛn 'zü kö 'yii‑ dɔ.

7 N bhang ‑nu, mɛ 'bha 'ya 'dho‑ pö 'ö ka ‑tama 'ö ka bho Atanna ‑bha zian ‑ta. 'Mɛ 'ö 'wɔn ‑së ‑kë, kö‑ mɛ ꞊në pö 'aa‑ ‑bha Atanna wëëdhö ꞊dhɛ ‑kɔ 'ö Yesu Klisi 'dhö‑ 'ka ‑a 'dhö. 8 "Kɛɛ 'mɛ 'ö 'wɔn yaa kë ‑sü ‑yö ‑kë ‑bha yë 'ka bha kö Atanna ‑bha mɛ 'yaa ‑mü. Kö Sɔtraan ‑bha mɛ ꞊në bha. ‑A ‑gɛn ‑mü ꞊dhɛ yö ꞊në‑ ‑bha yë 'dhö ‑mü 'wɔn yaa kë ‑sü 'ka. ‑Ya zü ‑bho "sɛ kë ‑yi 'ka. Atanna Gbö ‑zë ‑yö ‑nu "kpʋng ꞊taa kö ‑yö Sɔtraan ꞊në‑ kë ‑yë ‑nu 'gü see‑.

9 Mɛ "ʋʋ mɛ 'ö‑ pö ö ‑dɩ ‑dhɛ ꞊dhɛ Atanna ‑bha 'në ‑mü ö 'ka, ‑yö ö bo ꞊në‑ wo 'wɔn yaa kë ‑sü 'ka, ‑a ‑gɛn ‑mü ꞊dhɛ kö 'gügbɩɩdhɛ 'ö ꞊sii 'ö Atanna ‑ya ‑da ‑a ‑mɛ 'gü bha‑ 'gü bha ‑ya ‑mɛ 'gü. ꞊Ya kë "dhʋ̈ ‑a ‑mɛ 'yaa ꞊mɔɔ‑ ‑bha kö ‑yö 'wɔn yaa kë ‑kpɛawo ‑yö 'dho‑ 'ka, ‑a ‑gɛn ‑mü ꞊dhɛ kö Atanna ꞊në‑ Dë 'ka. 10 Atanna ‑bha 'në ‑nu waa Sɔtraan bhang ‑nu ‑a ‑nu ‑bho 'ko "piʋ̈ ‑dhɛ ꞊në bha. Mɛ "ʋʋ mɛ 'ö 'yaa ö ‑gɔ ‑gban 'wɔn ‑së ‑zë kë ‑sü 'gü 'ö 'wɔn yaa ꞊në‑ ‑kë, "ɛɛn 'ö‑ dheebhang ‑dhɔ 'yaa‑ kë, kö Atanna ‑bha mɛ 'yaa kë "dhʋ̈.

11 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑wʋ 'wo‑ pö ka ‑dhɛ ‑a zü bho ‑yi 'ka 'ka‑ ma bha yö ‑mü ꞊dhɛ ‑a ‑dhɛa ‑bha ꞊dhɛ kwa ‑dhɔ ‑yö kwa 'ko kë, 12 kö 'kwa 'dho kë ꞊dhɛ (kwa "bhɛma Adan gbö) Kaɛn 'ö gun Sɔtraan ‑bha mɛ 'ka 'ö ö 'zlaa‑ zë yi 'bha 'ka bha‑ 'dhö. ‑A 'zlaa‑ zë 'ö‑ wo bha‑ ‑gɛn ꞊në gun ‑më 'ka? ‑A ‑gɛn ꞊në gun ꞊dhɛ yö ‑zë këwɔn 'yaa gun ‑së, 'yö‑ 'zlaa‑ ‑zë pö 'aa gun‑ këwɔn 'bha ‑bha.

13 N dheebhang ‑nu, ꞊ya kë ꞊dhɛ ka ‑san ꞊ya 'mɛ 'waa 'dhang bho Yesu "dhiʋ̈ ‑a ‑nu kë, ‑a 'wɔn 'ya 'dho ka 'kɔn. 14 ‑Kɔ 'ö 'kwa ꞊mɔɔ‑ ‑bha 'kwa‑ dɔ 'kpakpadhö ꞊dhɛ 'kwa dha 'güseedhe ‑gɔ, 'kwa ꞊sii 'ö Atanna "piʋ̈ bha‑ ꞊slɔɔ yö ‑mü kwa dheebhang ‑nu ‑dhɔ 'ö kwa ‑kë bha ꞊në‑ 'ka. "Kɛɛ 'mɛ 'ö‑ dheebhang ‑dhɔ 'yaa‑ kë kö‑ ‑mɛ ‑zë ‑yö ‑tun 'güseedhe bha‑ 'gü ꞊naa bha. 15 Mɛ "ʋʋ mɛ 'ö‑ dheebhang ‑san ‑ya ‑kë, kö mɛzëmɛ ‑mü. "Kɛɛ 'sa ka‑ 'wɔn ‑dɔ ꞊dhɛ mɛzëmɛ ‑zë ꞊sii 'ö 'yaa yën 'ö Atanna ‑ya ‑da kwa 'gü bha 'yaa‑ 'bha 'gü tongtongdhö.

16 ꞊Ya 'go yö ‑zë 'gü, 'pë 'wo‑ ‑dhɛ ‑dhɔ bha‑ dɔ 'kwa‑ wo bha, kwa‑ ‑dɔ Yesu Klisi ‑bha ‑tosɛa nu 'ö‑ wo kwa ‑wɔn 'gü bha ꞊në‑ ‑bha. ‑A ‑kë "dhʋ̈ ‑sü bha‑ 'gü, ‑a ‑dhɛa ‑bha ꞊dhɛ kwaa ‑dɩ 'pö 'kwa kwa ‑dɩ nu kwa dheebhang ‑nu ‑wɔn 'gü. 17 ꞊Ya kë ꞊dhɛ 'mɛ 'ka bha 'mɛ 'ö ꞊naɔ 'dhö‑ ‑gɔ ꞊ya ö dheebhang yö kö‑ ‑bha ‑wɔn ‑yö pë 'bha ‑bha, ꞊ya ö ꞊taa zun ö dheebhang bha‑ ‑gɔ 'yii‑ ‑ta 'kun, kö Atanna ‑dhɔ ‑bha ‑a kë ‑dhɛ ꞊në 'mɛ?

18 ꞊Dhɛ 'ö "dhʋ̈ n bhang ‑nu, mɛ ‑dhɔ 'ya 'dho kwa kë kwa "dhi "ɛɛn kwa 'nɛɛ‑ "dhiʋ̈ "wɛɛwɛɛ, "kɛɛ ‑ka ‑kwaa ‑zɔn kwa këwɔn ‑nu ‑bha ꞊dhɛ mɛ ‑dhɔ ‑bha kwa kë ‑sü bha tɛan‑ ꞊dede ‑mü.

19 Yö ꞊në ꞊ya kë "dhʋ̈ 'yö 'kwa dho‑ dɔ‑ ‑bha ꞊dhɛ kwa tɛan‑ ‑zian ꞊dede ‑ta, 'yö kwa ‑zʋ 'dhö ‑kë ‑gban ‑sü 'ka Atanna wëëdhö. 20 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ꞊ya kë ꞊dhɛ kwa ‑dɩ zuëga ‑zë ꞊ya kwa zë za 'ka, 'yö Atanna ‑zë ꞊wɛ "kɛɛ kö yö ‑zë ‑yö 'kpii‑ kwa zuëga ‑zë ‑ta 'ö ‑ya mü 'zü 'ö 'wɔn ꞊gban dɔ? 21 ‑A kë "dhʋ̈ ‑sü bha‑ 'gü n ‑sëmɛ ‑nu, ꞊ya kë ꞊dhɛ kwa zuëga ‑zë 'yii kwa zë za 'ka kö kwa ‑bha ‑yö ‑së, kö "sika 'bha 'yaa kwa 'gü Atanna wëëdhö. 22 ꞊Ya kë "dhʋ̈, pë "ʋʋ pë 'ö 'kwa‑ ‑wɔn pö‑ ‑dhɛ kwa‑ ‑slɔɔ ‑a "dhiʋ̈, ‑a ‑gɛn ‑mü ꞊dhɛ kö kwa ‑dhio ‑ma ‑a ‑gɔ 'ö 'kwa‑ dhɔɔbhaawɔn ‑kë. 23 "Kɛɛ 'sa ‑dhio 'ö‑ dɔ kwa ‑ta yö ‑mü ꞊dhɛ kö 'kwa 'dhang bho ö Gbö Yesu Klisi ‑wɔn "dhiʋ̈, kö ꞊ya 'go mü kö kwa ‑dhɔ ‑yö kwa 'ko kë ꞊dhɛ ‑kɔ 'ö‑ pö‑ 'ka kwa ‑dhɛ ‑a 'dhö. 24 'Mɛ 'ö ‑dhio ma Atanna ‑ta kö‑ ‑mɛ ‑kɔ ‑ya ꞊kwɛng, kö Atanna ‑kɔ ‑ya ‑mɛ ꞊kwɛng 'pö. "Kɛɛ 'sa ‑a ‑bha 'Nii‑ 'ö‑ ‑ya kwa 'gü bha ꞊në 'kwa‑ dɔ‑ ‑bha ꞊dhɛ yöö ꞊dede ‑yö kwa 'gü.