1 N "taɔngdë ‑nu, 'ka 'dho 'to 'ö ka 'dhang bho 'mɛ 'wo dhiang zë Atanna ‑bha 'Nii‑ 'tɔ 'gü bha‑ ꞊gban "dhiʋ̈, "kɛɛ ‑kaa ‑nu 'gü dan kö‑ ‑bha 'Nii‑ 'dhö‑ ‑nu 'gü ꞊dede wo tɛan‑ 'ka 'ka‑ ‑dhɛ yö. ‑A ‑gɛn ‑mü ꞊dhɛ ‑a ‑wʋ "dhiʋ̈ ‑loo ꞊flü 'ka ‑mɛ ‑nu 'gbɛ ꞊dede ꞊wa ‑da "kpʋng ꞊taa dɔ 'kwa‑ wo ya‑ 'gü. 2 Mɛ "ʋʋ mɛ 'ö 'dhang bho‑ "dhiʋ̈ ꞊dhɛ Yesu Klisi bha ‑yö ‑bhɔ mɛbhɩɩdhe kwi 'gü ꞊dedewo tɛan‑ 'ka, 'ö dɔ mɛ kpö 'gü 'ö‑ ‑dhiang zë bha kö Atanna ‑bha 'Nii‑ ‑ya ‑mɛ 'gü. 3 "Kɛɛ mɛ "ʋʋ mɛ 'ö 'yaa 'dhang bho 'wɔn bha‑ "dhiʋ̈, 'ö 'yaa ꞊mɔɔ‑ ‑bha kö ‑ya ‑dhiang zë mɛ kpö 'gü, kö 'Nii‑ 'ö‑ ‑mɛ 'gü bha 'yii 'go Atanna "piʋ̈. Kö ‑yö ‑go Klisi 'yaɔ‑ 'ö 'ka‑ ma ꞊dhɛ ‑a nu ‑wɔn ‑dhö "kpʋng ꞊taa bha ꞊në‑ "piʋ̈, 'sa ꞊ya nu 'nu.

4 "Kɛɛ ka ‑zë, n bhang ‑nu, ka Atanna ꞊në‑ ‑bha 'ka, ka ‑kɔ ꞊ya ziö 'nu ‑a ‑wʋ "dhiʋ̈ ‑loo ꞊flü 'ka ‑mɛ ‑nu bha‑ ‑nu ‑gɔ. ‑A 'klɔɔ‑ ‑mü ꞊dhɛ 'Nii‑ 'dhɛ 'ö ka ‑zë ka 'gü bha, faan ‑ya ‑bha 'ö ‑ziö 'ka ‑a 'dhɛ 'ö 'mɛ 'waa Atanna dɔ‑ ‑nu 'gü bha‑ ‑ta. 5 'Mɛ 'wo "dhʋ̈ bha 'mɛ 'waa Atanna dɔ ‑wo wo "tʋ ‑to wo ‑zë ‑a ‑nu ‑wʋ ‑bha. ‑A ‑gɛn ‑mü ꞊dhɛ ꞊zinng 'yaa wɛng‑ ‑nu ‑a ‑nu ꞊zinng 'gü, ‑wo dhiang ‑zë ꞊dhɛ ‑kɔ 'ö woo ‑dɩ 'pö 'wo‑ zë‑ 'ka ꞊në‑ 'dhö. ‑A ‑nu "tʋ ‑to ‑a ‑nu ‑wʋ ‑bha ‑gɛn ꞊në bha. 6 "Kɛɛ kwa ‑zë kwa Atanna ꞊në‑ ‑bha 'ka. 'Mɛ 'ö‑ dɔ 'yö ö "tʋ 'to kwa ‑wʋ ‑bha, 'mɛ 'yaa‑ ‑bha 'në 'ka 'yaa ö "tʋ 'to kwa ‑wʋ ‑bha. 'Nii‑ 'ö go Atanna "piʋ̈ 'ö tɛanwɔn pö 'Nii‑ 'ka bha, ꞊zinng 'ö waa‑ 'nii‑ 'ö "kpënng‑ ‑kë mɛ ‑gɔ bha‑ ‑nu ꞊zinng 'gü kwa‑ ‑dɔ ‑kɔ bha ꞊në‑ 'gü.

7 ꞊Dhɛ 'ö "dhʋ̈, n "taɔngdë ‑nu, kwa ‑dhɔ ‑yö kwa 'ko kë. ‑A ‑gɛn ‑mü ꞊dhɛ ‑dhɔ bha ‑yö ‑go Atanna ꞊në‑ "piʋ̈. Mɛ "ʋʋ mɛ 'ö mɛ "bhɩɩ‑ ‑dhɔ ‑ya ‑kë kö Atanna ‑bha 'në ‑mü, kö ‑yö Atanna ‑dɔ. 8 "Kɛɛ 'mɛ 'ö mɛ 'bha ‑dhɔ 'yaa‑ kë bha kö 'yaa Atanna dɔ ꞊në‑ wo. ‑A ‑gɛn ‑mü ꞊dhɛ waa‑ pö ‑dhɔ, kö ‑wo ‑wɩ Atanna ꞊në‑ 'ka. 9 Kwa ‑dhɔ ‑bha Atanna kë ‑sü bha‑ ‑zɔn ‑kɔ 'ö‑ ‑zɔn 'ka kwa ‑dhɛ yö ‑mü ꞊dhɛ ‑a ‑bha 'në ga doseng 'ö‑ ‑gɔ bha 'yö‑ sü 'yö‑ bɔ kwa ‑dhɛ "kpʋng ꞊taa, kë "dhʋ̈ kö 'kwa ꞊sii 'ö‑ "dhiʋ̈todhɛ 'yaa 'dhö bha‑ ꞊slɔɔ ‑a 'saa‑ 'gü. 10 'Yii kë ꞊dhɛ yö ꞊në‑ ‑dhɔ ‑yö kwa ‑kë ‑blɛɛsü. ‑Abin! Yö ꞊në kwa ‑zë kwa ‑dhɔ ‑ya ‑kë, 'yö‑ ‑wɔn 'gü 'yö ö Gbö bɔ ꞊dhɛ "saa‑ pë 'dhö kë "dhʋ̈ kö 'ö kwaa‑ 'wɔn yaa ‑nu ‑mawɔn 'to ‑a 'saa‑ 'gü. ‑Kɔ 'ö kwa ‑dhɔ ‑ya ‑kë 'ka 'yö bha.

11 N dheebhang ‑nu, kwa ‑dhɔ ꞊ya Atanna kë ꞊dhɛ ‑kɔ bha‑ 'dhö, ‑a ‑dhɛa ‑bha ꞊dhɛ kwa ‑dhɔ ‑yö kwa 'ko kë 'pö. 12 Mɛ 'bha 'yii Atanna yö do. ꞊Ya kë ꞊dhɛ kwa ‑dhɔ ꞊në ꞊ya kwa 'ko kë kö 'kwa‑ ‑zɔn ꞊dhɛ ‑yö kwa 'gü, ꞊dhɛ ‑a ‑dhɔ 'ö kwa ‑kë bha 'duɛ‑ 'yaa‑ ‑bha.

13 ‑A 'wɔn ‑yö kwa "yaan ꞊dhɛ ‑a ‑kɔ ‑yö kwa ꞊kwɛng, kwaa ‑dɩ 'pö kwa ‑kɔ ‑ya ꞊kwɛng. 'Pë 'ö kwa ‑kɔ ‑da 'koo "dhʋ̈ bha yö ‑mü ‑a ‑bha 'Nii‑ 'ö‑ ‑ya kwa 'gü bha ꞊në‑ 'ka. 14 Yi ‑zë yi "yan ‑yö kë‑ ‑dhɛ ‑yö. Yö ꞊në‑ ‑wɔn 'gü 'yö 'yi‑ pö ꞊dhɛ kwa Dë Atanna ꞊ya ö Gbö bɔ "kpʋng ꞊taa kö ‑yö kë kwa Dhamɛ 'ka. 15 'Mɛ 'ö‑ ‑dhiang zë "dhɛɛ ‑ta ꞊dhɛ Yesu bha Atanna Gbö ‑mü tɛan‑ ꞊dede 'ka, kö Atanna ‑kɔ ‑ya ‑mɛ ꞊kwɛng, kö‑ ‑mɛ ‑dɩ 'pö‑ ‑kɔ ‑yö Atanna ꞊kwɛng. 16 Kwa ‑zë ‑dhɔ 'ö‑ ‑kë kwa 'ka bha kwa‑ ‑dɔ, 'ö 'kwa 'dhang bho‑ "dhiʋ̈.

Atanna bha ꞊në ‑dhɔ kpu 'ka, ‑a ‑wɔn 'gü mɛ "ʋʋ mɛ 'ö ‑dhɔ 'dhö‑ 'gü, kö‑ ‑mɛ ‑kɔ ‑ya ꞊kwɛng, kö yöö ‑dɩ 'pö‑ ‑kɔ ‑ya ‑mɛ ꞊kwɛng. 17 ‑Kɔ do 'ö ‑dhɔ kpu 'ka‑ ‑bha bha ꞊në 'kwa dho kë‑ 'ka 'pö "kpʋng ꞊taa, 'pë 'ö dho‑ ‑zɔn ꞊dhɛ ‑a ‑dhɔ 'ö kwa 'gü bha 'duɛ‑ 'yaa‑ ‑bha 'yö bha. ꞊Ya kë "dhʋ̈ 'yö "suʋ̈ 'yaa kë kwa 'gü ‑a ‑bha za bha‑ dɔ ‑yi 'ka. 18 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ ‑dhɔ ꞊ya kë mɛ 'gü "suʋ̈ 'yaa mɛ kë, dhaɔmɛkë ꞊dede ‑zë ‑yö "suʋ̈ bho ꞊në‑ wo mɛ 'gü. ‑A ‑gɛn ‑mü ꞊dhɛ mɛ "suʋ̈ ‑gɛn ‑mü ꞊dhɛ kö woo 'wɔn wɔ mɛ ‑ta. ‑A ‑kë "dhʋ̈ ‑sü bha‑ 'gü, "suʋ̈ ꞊ya kë mɛ 'ö‑ 'gü kö ‑dhɔ 'ö‑ mɛ 'gü bha‑ "dhiʋ̈ ꞊në 'yaa pa ‑sü 'ka.

19 Kwa ‑zë ‑a ‑dhɔ 'ö kwa ‑kë bha‑ 'klɔɔ‑ ‑mü ꞊dhɛ yö ꞊në kwa ‑dhɔ ‑ya ‑kë ‑blɛɛsü. 20 ꞊Ya kë "dhʋ̈, mɛ "ʋʋ mɛ 'ö‑ pö ꞊dhɛ Atanna ‑dhɔ ‑yö ö ‑kë, "kɛɛ kö‑ dheebhang ‑zë ‑san ‑ya ‑kë, kö 'mɛ bha ꞊suakëmɛ ‑mü; ‑a ‑gɛn ‑mü ꞊dhɛ i dheebhang kö i "yan 'dhö‑ ‑bha yö ‑zë ‑dhɔ 'yii i kë, Atanna 'kö 'bhaa‑ yö ‑a ‑dhɔ ‑dho i kë ‑kɔ ‑kë ꞊dhɛ? 21 "Kɛɛ 'sa ‑yö ‑dhio do 'bha ‑dɔ kwa ‑ta 'ö‑ pö: «Mɛ "ʋʋ mɛ 'ö Atanna ‑dhɔ ‑ya ‑kë, ‑a ‑dhɛa ‑bha 'pö ꞊dhɛ ‑a dheebhang ‑dhɔ ‑ya kë.»