1 ꞊Ya 'go yö ‑zë 'gü, n dheebhang ‑nu, ‑a 'dhɛ 'kö ‑gban "ta ‑kɔ 'ö 'ka dho "ta‑ 'ka kö ka "dhia ‑yö 'ma Atanna 'gü ‑a ‑bha, 'ya ka ꞊klang kë yö ‑zë 'ka 'nu, ka yö ‑zë kë sië, "kɛɛ 'pë 'yi‑ "piʋ̈ 'yi‑ pö ka ‑dhɛ dɔ 'kwa‑ wo ya‑ 'gü, yö mü ꞊dhɛ kö "ta ‑kɔ ‑së 'ka‑ kë sië bha‑ 'bha ꞊në ‑yö ‑da 'gü kö ‑yö 'dho‑ 'ka ‑kpɛawo. 'Wɔn 'yi bhɛa" sië ka ‑dhɛ ‑a 'gü 'ö 'yi‑ 'gü ‑gbɛʋʋ kë sië kwa Dëmɛ Yesu 'tɔ 'gü bha 'yö bha. 2 ‑A ‑gɛn ‑mü ꞊dhɛ ‑dhio ‑wʋ 'ö kwa Dëmɛ Yesu ‑ya ‑wɔ yi "dhi 'yi‑ dɔ ka ‑ta bha ‑yö ka "yaan. 3 Yi‑ ‑pö ka ‑dhɛ ꞊dhɛ 'pë 'ö Atanna 'gü ‑së, 'ö‑ ‑dhidhɛwɔn 'ka, yö ‑mü ꞊dhɛ kö 'ka ka ‑dɩ 'kun ‑së, kö mɛ 'bha 'ya 'dho pö yö ka ‑bha 'wɔn 'bha ‑wɔn 'bha 'gü, "kɛɛ kö 'ka ka ‑dɩ 'kun "kwɛɛkwɛɛ kë ‑sü ꞊në‑ ‑gɔ. 4 Yö ‑mü ꞊dhɛ kö mɛ 'ö "dhʋ̈ ꞊yaa‑ pö 'ö dhe 'sü, kö‑ 'sü ‑kɔ ‑yö kë ꞊bhlëësü Atanna wëëdhö "ɛɛn mɛ "bhɩɩ‑ ‑nu wëëdhö. 5 kö 'ka 'dho ka ‑kɔ "kan ka ‑dɩ ‑wɔn "dhiʋ̈ 'ö 'wɔn 'ö ‑gban "kwɛɛkwɛɛ kë ‑sü ‑bha bha‑ ‑kɔ ‑yö ‑ziö ka ‑gɔ ꞊dhɛ 'mɛ 'waa Atanna dɔ‑ ‑nu 'dhö. 6 'Wɔn 'ö Atanna 'gü ‑së, yö ‑mü ꞊dhɛ kö mɛ 'bha 'ya 'dho kë ‑da ꞊sɔng yaa suu bha‑ 'ka wo 'ko ‑gɔ 'kɔɔmɛ 'ka, 'ö‑ ‑mɛ ‑bha dhe bho‑ ‑gɔ ‑a ‑bha faandhɛ 'ka, "ɛɛn 'ö ‑ziö ꞊keng‑. 'Wɔn suu bha 'ya‑ ‑dhio dɔ ka ‑ta 'nu 'ya yi kɔngga ziö‑ 'ka ka ‑dhɛ "sɛɛ glɔglɔdhö. ‑A ‑gɛn ‑mü ꞊dhɛ 'mɛ 'wɔn suu bha‑ ‑kë kwa Dëmɛ ‑dho 'wɔn bho‑ 'gü. 7 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ Atanna 'yii kwa ‑dhɛ kö 'kwa ‑tosɛa kë ꞊niësü ‑zë 'gü, "kɛɛ kö 'kwa kwaa‑ kwa kë ‑sɔng zizi ‑nu bha ꞊në‑ 'zü kö 'kwa ‑ya ‑a ‑bha ‑ya 'gü. 8 ‑A kë "dhʋ̈ ‑sü bha‑ 'gü, mɛ "ʋʋ mɛ 'ö 'yii ‑dhio 'a‑ dɔ ka ‑ta bha‑ ma, kö 'yii ‑kɔ mɛ "bhɩɩ‑ ‑zë ‑wʋ 'ka, kö Atanna 'ö ö ‑bha 'Nii‑ "slʋ̈ʋ̈slʋ̈ ꞊gbaɔ ka ‑gɔ bha ꞊në‑ ‑mɛ ‑yö ‑kɔ ‑wʋ 'ka bha.

9 ‑A 'dhɛ 'kö ‑gban ka 'ko ‑dhɔ ‑bha 'ka 'kö kë ‑sü 'ö Atanna ‑bha zian ‑ta bha‑ ‑bha, ‑yö n 'gü ꞊dhɛ yö ‑zë ‑pö ka ‑dhɛ ‑gɛn 'yaa 'dhö 'zü; ‑a ‑gɛn ‑mü ꞊dhɛ yöö ꞊dede ꞊ya ka ꞊klang kë yö ‑zë 'ka. 10 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ kwa dheebhang ‑nu 'wo 'dhang bho 'pö Yesu "dhiʋ̈ ꞊dhɛ kwa 'dhö, 'wo ka ‑bha Maseduanö ‑sɛ ꞊gban "pɛpɛ 'gü ‑a ‑nu ‑dhɔ ‑yö ka ‑kë. "Kɛɛ 'wɔn 'ö yi "piʋ̈ ꞊dhɛ 'yi‑ pö ka ‑dhɛ dɔ 'kwa‑ wo ya‑ 'gü, yö ‑mü ꞊dhɛ kö ‑dhɔ 'ö ka ‑gɔ bha‑ 'bha ꞊në ‑yö ‑da 'gü kö ‑yö 'dho‑ 'ka "dhiʋ̈ ‑kpɛawo, n dheebhang ‑nu. 11 Kö 'ka ka 'gü dɔ "gbɩɩ‑ 'ka ‑tosɛa kë "yënng ꞊dhië 'gü, kö 'ka ‑ya ka ‑dɩ ‑gɔ ‑wɔn ‑nu ꞊në‑ zuën ‑ta, kö 'ka ka ‑dɩ ‑bha yë kë kö 'ka ka ‑bhöpë ꞊slɔɔ ꞊dhɛ ‑kɔ 'yi‑ ‑dhio dɔ‑ 'ka ka ‑ta bha‑ 'dhö. 12 Kë "dhʋ̈ kö 'ka kë ꞊bhlëësü 'mɛ 'waa 'dhang bho Yesu "dhiʋ̈ ‑a ‑nu 'gü, kö ka ‑kwɛɛ 'gbiin‑ 'ya 'dho mɛ 'bha kë.

13 N dheebhang ‑nu, 'yaa yi "piʋ̈ ꞊dhɛ 'wɔn 'dhɛ 'ö ‑gban 'mɛ 'wo ga Atanna ‑bha zian ‑ta ‑a ‑nu ‑bö ‑wɔn ‑bha bha 'ka kë‑ 'gü ka tii ‑bha, kö ‑wëë ‑yö bɔ ka ‑ta ꞊dhɛ 'mɛ‑ ‑nu ‑zʋ 'gɔn ‑sü 'yaa 'wɔn 'bha ‑wɔn 'bha ‑dhɛ ‑dhɛkpaɔ dhia" 'gü ‑a ‑nu 'dhö. 14 ‑A ‑gɛn ‑mü ꞊dhɛ ꞊ya kë ꞊dhɛ 'dhang ‑bho "dhiʋ̈ ‑sü ‑zë ꞊ya kë kwa ‑gɔ ꞊dhɛ ga 'ö Yesu ‑ya wo bha ‑yö kë ‑bö, kö ‑ka ‑kwa 'dhang bho‑ "dhiʋ̈ 'pö ꞊dhɛ Atanna ‑dho bɔ Yesu ‑ta 'ö waa‑ 'mɛ 'wo to‑ ‑bha zian ‑ta 'wo ga bha‑ ‑nu ‑bö 'pö.

15 ‑A 'klɔɔ‑ ‑mü ꞊dhɛ ‑wʋ 'ö kwa Dëmɛ ‑ya dɔ yi "dhi kö 'yi‑ pö ka ‑dhɛ ‑kaa ‑ga 'ö ya. ‑Ya ‑pö ꞊dhɛ ‑a nu "tʋ̈ng 'dhö dho ꞊loo 'mɛ 'ö kwa ‑bha kö kwa ‑tun "yaandhe 'ka ‑a ‑bha zian ‑ta bha, kwa ‑zë 'kwii 'dho ‑da 'mɛ ꞊wa ga 'nu ‑a ‑nu "dhiʋ̈ kö 'kwa 'dho‑ "piʋ̈. 16 "Kɛɛ kwa Dëmɛ yöö ꞊dede ‑a ‑bha ‑go dhang‑ 'gü ‑sü 'ka, Atanna ‑bha "kië ‑nu ‑gɔmɛ do‑ ‑dho ‑a "kwikan 'ö 'kwa‑ ma, 'ö‑ ‑bha "truu ‑yö ‑wɩ 'ö 'kwa‑ ma, 'yö gun ‑na 'go dhang‑ 'gü 'ö ꞊lɔɔ, 'yö 'mɛ 'wo to‑ ‑bha zian ‑ta 'wo ga bha 'wo ‑bö ꞊kö ‑blɛɛsü. 17 ꞊Ya 'go mü 'yö 'mɛ 'kwa dho 'to "yaandhe 'ka waa 'mɛ 'wo ‑bö bha mɛ ꞊gban 'kwa ‑tɔn kun kwa "kwëë, 'yö 'kwa dho dɔ kwa Dëmɛ ‑gɔ zian‑ dha 'kpong‑ 'gü, 'yö 'kwa ‑kpan ‑bha 'tëng‑ ‑ta, 'yö 'kwa gun ‑na ‑tosɛa kë ‑a "piʋ̈ ‑todhʋ̈ 'ka. 18 ‑A ‑kë "dhʋ̈ ‑sü bha‑ 'gü, ‑ka ka 'ko ‑nu ‑zʋ ‑gban ‑wʋ ‑nu bha ꞊në‑ 'ka.