5
‑A 'dhɛ 'kö ‑gban yi 'ö kwa Dëmɛ dho nu‑ 'ka waa‑ ‑a "tʋ̈ng ‑zë ‑bha, n dheebhang ‑nu, ‑yö n 'gü ꞊dhɛ yö ‑zë ‑pö ka ‑dhɛ ‑gɛn ‑zian 'yaa 'dhö. ‑A ‑gɛn ‑mü ꞊dhɛ ka yö ‑zë 'wɔn ‑dɔ 'kpakpadhö ꞊dhɛ ‑a nu ‑sü ‑dho "kan ꞊në‑ wo mɛ ꞊gban 'gü ꞊dhɛ ꞊kwaanmɛ ‑yö nu gbeng. "Tʋ̈ng ꞊dede 'ö mɛ "bhɩɩ‑ ‑nu 'wo‑ pö sië‑ 'ka ꞊dhɛ: «'Aa "sɛ ꞊ya 'waanu, 'kwa ‑ya kwa ‑dɩ 'flëë‑ 'gü bha ꞊në 'güseedhe dho "kan‑ ‑nu 'gü ‑a 'ka ꞊dhɛ ‑kɔ 'ö 'në 'kpɔ "gblʋ̈ʋ̈dhɛpiʋ̈ ‑yö zun‑ 'ka 'gbiödhe ‑nu ‑bha bha‑ 'dhö, 'yö 'waa dha‑ ‑gɔ tongtongdhö. "Kɛɛ ka ‑zë, n dheebhang ‑nu, 'kaa 'wɔn yaa 'gü kö yi 'ö bha ‑yö "kan ka 'gü ꞊dhɛ ꞊kwaanmɛ ‑yö ‑kan mɛ 'gü. Ka ‑zë ka ‑tosɛa ‑së kë sië, kwa ‑zë 'wɔnyaakëmɛ 'yaa ‑mü kwa 'ka 'zü. ‑A ‑kë "dhʋ̈ ‑sü bha‑ 'gü, 'kwa 'dho yi zë ꞊dhɛ mɛ ‑kpɛa 'dhö, ‑kwa ‑ya kwa "yaan kö 'kwa kwa ‑dɩ 'kun ‑së. ‑A ‑gɛn ‑mü ꞊dhɛ yi 'ö mɛ ‑ya zë bha ‑ya ‑zë gbeng ꞊në‑ 'gü, 'yö 'mɛ woo ‑dɩ 'pö 'wo we kpɔ wo ‑dɩ ‑gɔ bha 'wo‑ kpɔ gbeng. "Kɛɛ mɛ 'ö kwa ‑zë 'kwa ‑dhɛpuudhɛ 'gü ‑mɛ ‑nu 'ka bha, ‑ka ‑kwa kwa ‑dɩ 'kun ‑së, kö ‑dhɔ waa‑ ‑zʋ ‑yö Atanna ‑dhɛ ‑sü 'ö kwa ‑gɔ bha, 'kwa‑ ‑da kwa ‑bha ꞊dhɛ ‑piö "bhɛɛ 'dhö, kö dha ‑sü kö 'kwa ‑tosɛa ‑së kë Atanna "piʋ̈, 'ö kwa ‑zʋ 'dhö‑ 'gü bha ‑yö kë kwa ‑gɔ ꞊dhɛ ‑piö gblaa‑ 'dhö kö 'kwa‑ ‑ya kwa ‑gɔ ‑bha. ‑A ‑gɛn ‑mü ꞊dhɛ Atanna ‑yö kwa ‑da "dhʋ̈ kö 'kwa dha ꞊në wo kwa Dëmɛ Yesu Klisi 'saa‑ 'gü. 'Yii kwa ‑da kö 'ö 'wɔn ‑zë wɔ kwa ‑ta. 10 ‑A 'klɔɔ‑ ‑mü ꞊dhɛ Yesu Klisi bha ꞊në ga kwa ‑wɔn 'gü, kë "dhʋ̈ kö ‑a nu "tʋ̈ng ꞊ya ꞊loo kö kwa kwa "yaan oo, "ɛɛn kö 'kwa ga 'zü oo, kö 'kwa ‑tosɛa kë ‑a ꞊yënng 'gü. 11 ꞊Dhɛ 'ö "dhʋ̈, ‑ka ka 'ko ‑nu ‑zʋ ‑gban, kö 'ka ka 'ko ‑nu faan dɔ yi ꞊gban 'ka ꞊dhɛ ‑kɔ 'ka‑ kë sië‑ 'ka bha‑ 'dhö.
‑Dhio 'ö Pɔdhö waa‑ ö "tayɔɔ ‑nu 'wo‑ dɔ Tesadhonikö ‑mɛ ‑nu ‑ta waa‑ ‑a ‑nu ꞊tuabhonaɔ ‑nu
12 Yi ‑bhɛa ka ‑dhɛ, n dheebhang ‑nu, kö 'mɛ 'wo Atanna ‑bha yë kë sië ka kpö 'gü, 'ö 'wo‑ ‑gleng ‑da sië ka ‑bha, 'ö 'wo ka "dhiʋ̈ ‑ziö wo sië bha 'ka‑ ‑nu ‑ya ꞊bhlëë 'gü, 13 ‑kaa ‑nu ꞊bhlëë ‑ya ꞊dedewo kö‑ ‑nu ‑dhɔ ‑yö ka kë yë ‑së 'wo‑ kë sië bha‑ ‑wɔn 'gü. ꞊Ya 'go mü, (ka zuë" ‑yö kë ka 'ko "piʋ̈ ‑sɛa,) kö 'ka dhi ka 'ko ‑dhɛ ‑kpɛawo.
14 Yi ‑bhɛa 'zü ka ‑dhɛ, n dheebhang ‑nu, kö "wlaamɛ ‑nu 'wo ‑tosɛa kë sië "bhluubhludhɛ 'gü ka kpö 'gü bha 'ka ‑ya ‑nu "yan 'gü kö 'ka ka ‑kɔ ‑ya 'mɛ 'ö‑ ‑nu ‑din ꞊ya yën bha‑ ‑nu zuë" ‑ta. Kö 'ka 'mɛ "sɩ 'yaa‑ ‑nu ‑dhɛ Atanna ‑bha zian ‑ta bha‑ ‑nu ‑ta 'kun, kö ka zuë" ‑yö kë ‑sɛa mɛ ꞊gban "pɛpɛ "piʋ̈. 15 ‑Kaa kë ‑së kö mɛ 'bha 'ya 'dho 'wɔn yaa "yɔɔ bho 'ö "tɛado ‑gɔ 'wɔn yaa 'ka, "kɛɛ ‑ka 'wɔn ‑së ꞊në‑ kë ‑dhɛ mɔɔ‑ yi ꞊gban "pɛpɛ 'ka ka 'ko ‑dhɛ, "ɛɛn mɛ ꞊gban "pɛpɛ ‑dhɛ.
16 Ka ꞊nii ‑yö ‑da yi ꞊gban "pɛpɛ 'ka. 17 Kö ka 'gü 'ya 'dho ga ‑bhɛa Atanna ‑dhɛ ‑sü 'ka tongtongdhö, 18 "ɛɛn kö 'ka‑ nuɛ" bho 'wɔn ꞊gban "pɛpɛ suu 'gü, ‑a ‑gɛn ‑mü ꞊dhɛ ‑ya "piʋ̈ ꞊dhɛ 'ka yö ꞊në‑ kë "tʋ̈ng ꞊gban 'gü ka ‑bha ‑kë Yesu Klisi ‑bha 'ka ‑sü ‑wɔn 'gü!
19 'Ka 'dho zian ta ‑a ‑bha 'Nii‑ 'ö ka 'gü bha‑ ‑gɔ 'ö ö bo ‑a ‑wɔn ‑pɛng ‑dɔ ka 'ka ‑sü 'ka. 20 Kë "dhʋ̈ 'ö 'ka ‑ya ‑wʋ 'ö‑ dɔ ö ‑wʋdhiʋ̈loomɛ "dhi bha‑ ‑san 'ka! 21 "Kɛɛ ‑ka 'wɔn "pɛpɛ bha‑ ꞊gban ‑ga 'kpakpadhö ‑së 'ka, kö‑ 'dhɛ 'ö ‑së, 'ka‑ 'sü ka ‑bha 'ka. 22 ‑Ka ka ‑dɩ 'kun ‑së kö 'ka 'dho 'wɔn yaa suu "ʋʋ suu 'bha kë.
23 Atanna 'ö zuëwaanusü nu mɛ ‑dhɛ bha ‑yö bian bho ka ‑bha ‑kɔ ꞊gban ‑kɔ ꞊gban 'gü kö ‑yö ka "zu, kö ka ‑dhü ‑to "dhʋ̈ ‑sü, ka 'nii‑ oo, ka ‑wü oo, ‑wo 'to "puu 'ka kö pö 'a 'dho kë‑ ‑bha kwa Dëmɛ Yesu Klisi nu ‑yi bha‑ 'ka! 24 Atanna 'ö ka ‑dhɛ kö 'ka kë ö ‑bha 'ka bha ꞊në dho‑ kë "dhʋ̈, ‑a ‑gɛn ‑mü ꞊dhɛ yö ‑zë 'yaa "plüün 'gü "fië bho.
25 N dheebhang ‑nu, ‑ka bhɛa"‑ ‑dhɛ yi ‑wɔn 'gü 'pö.
26 ‑Ka kwa dheebhang ‑nu "pɛpɛ 'wo Yesu ‑bha 'ka mü, ‑a ‑nu ꞊gban "pɛpɛ ꞊tua bho yi ‑dhɛ 'gbɛ, kö 'ka ꞊loo ka 'kwëë‑ ꞊dhɛ dheebhang ‑zë ‑nu 'dhö.
27 A ‑bhɛa ka ‑dhɛ kwa Dëmɛ 'tɔ 'gü kö 'ka dɔ "gbɩɩ‑ 'ka 'sëëdhɛ ya‑ ‑wʋ pö kwa dheebhang ‑nu "pɛpɛ 'wo ka ‑gɔ "sɛ 'gü mü bha‑ ‑nu ‑dhɛ.
28 Kwa Dëmɛ Yesu Klisi ‑bha ‑gasitɛ bha ‑ya kë ka ‑dhɛ (yi ꞊gban "pɛpɛ 'ka)!