1 ꞊Ya 'go‑ 'dhɛ bha‑ 'gü, kwa dheebhang ‑dhebhɔ 'wo Febe ‑kë, 'ö yë ‑kë Atanna ‑bha 'kɔdhigümɛ ‑nu 'wo Sangkle ‑pö 'gü ‑a ‑nu kpö 'gü bha, 'ma‑ "kplëng bho ka ‑bha kö 'ka dɔ "gbɩɩ‑, 2 'ka‑ ‑dhɛng ‑wɔn 'kun ꞊dhɛ ‑kɔ 'wo kwa Dëmɛ ‑bha 'kɔɔmɛ ‑nu ‑dhɛng kun‑ 'ka ‑a 'dhö. ‑A 'klɔɔ‑ ‑mü ꞊dhɛ ‑a ‑kë "dhʋ̈ ‑sü bha ꞊në‑ ‑dɔ ‑yö ‑dhi Atanna ‑bha mɛ ‑nu 'ka. 'Wɔn "ʋʋ 'wɔn 'ö‑ ‑bha ‑wɔn dho zun ka ‑bha ‑a 'gü, ‑kaa kë‑ ‑dhɛ, ‑a 'klɔɔ‑ ‑mü ꞊dhɛ yöö ‑dɩ 'pö ‑yö mɛ kpö ꞊dede ‑ta 'kun ‑sü 'ka, 'ö mang ꞊dede ‑zian 'a "wɩ sië ka ‑dhɛ ya n ‑ta 'kun ‑sü 'ka 'pö.

3 ‑Ka Plisidhö waa‑ Akidhasö 'wo ‑kë n yëkëyɔɔ 'ka kwa Dëmɛ Yesu Klisi ‑bha zian ‑ta bha‑ ‑nu ꞊tua bho n ‑dhɛ. 4 ‑Wo kë wo ‑dɩ "dhiʋ̈ ‑dɔ pë ‑dhɛ ma ‑zë n ‑wɔn 'gü, kë "dhʋ̈ kö 'a dha. ‑Kaa ‑nu nuɛ" bho n ‑dhɛ 'gbɛ, mang do ‑zian 'maa‑ ‑nu nuɛ" bho sië 'wɔn 'wo‑ ‑kë bha‑ 'gü. Atanna ‑bha 'kɔdhigümɛ ‑nu "pɛpɛ 'ö 'waa Zuifö 'ka ꞊në yɛng‑ ‑nu ꞊gban 'yi‑ ‑nu nuɛ" bho sië bha. 5 ‑Ka Atanna ‑bha 'kɔdhigümɛ ‑nu 'wo ꞊loo 'ko ‑ta ‑a ‑nu ‑gɔ 'kɔɔdhö bha, ‑a ‑nu ꞊tua bho n ‑dhɛ 'pö. ‑Ka Epainɛtö ꞊tua bho n ‑dhɛ 'pö, ‑a ‑wɔn ‑yö n ‑gɔ "gbɩɩ‑, ‑a ‑gɛn ‑mü ꞊dhɛ yö ꞊në 'mɛ 'wo 'dhang bho Klisi ‑wɔn "dhiʋ̈ Azi ‑sɛ 'gü ‑a mɛ ‑blɛɛsü 'ka. 6 Dhebhɔ 'ö saan" ‑sü 'ka ka ‑dhɛ 'pö 'wo‑ Madhi ‑kë bha, 'ma‑ ꞊tua bho. 7 'Ma Andronikusö waa‑ Zunia 'ö yɛng 'yi ‑gban 'kwëë‑, 'ö 'yi ‑kaso ‑kë 'zü yi "kwëë bha‑ ‑nu ꞊tua bho 'gbɛ. ‑A ‑nu ‑duɛ ‑yö 'kpii‑ ꞊dedewo Yesu ‑bha bɔmɛ ‑nu kpö 'gü, 'ö ‑ya mü 'zü woo ‑zian ‑wo kë 'dhang ‑bho Yesu ‑wɔn "dhiʋ̈ n "dhiʋ̈.

8 ‑Ka n "taɔngdë 'ö kwa Dëmɛ ‑bha zian ‑ta, 'wo‑ ‑dhɛ Angpliatusö bha‑ ꞊tua bho n ‑dhɛ. 9 'Ma Udhibɛn 'ö ‑kë n yëkëyɔɔ 'ka Klisi ‑bha zian ‑ta bha waa‑ n "taɔngdë Sitasisö ‑a ‑nu ꞊tua bho. 10 'Ma Apedhɛsö 'ö mɛ ꞊gban ‑mɛ ꞊gban ‑wa dɔ ‑zʋ ‑gban ‑mɛ 'ka Klisi ‑bha zian ‑ta bha‑ ꞊tua bho. 'Ma 'mɛ 'wo Adhitobudhö ‑gɔ 'kɔɔdhö ‑a ‑nu ꞊tua bho 'gbɛ. 11 'Ma Edhodiɔn 'ö 'yi ‑gban 'pö 'kwëë‑ bha‑ ꞊tua bho. 'Ma 'mɛ 'wo 'dhang bho kwa Dëmɛ "dhiʋ̈ 'ö 'wo Naasisö ‑gɔ 'kɔɔdhö bha‑ ‑nu ꞊tua bho. 12 'Ma Tidhifɛnö waa‑ Tidhifɔzö 'ö‑ ‑nu ‑wëëdhɛ ꞊ya bho kwa Dëmɛ ‑bha yë ‑wɔn 'gü bha‑ ‑nu ꞊tua bho. 'Ma dhebhɔnë 'wo‑ Pɛsidö ‑kë bha‑ ꞊tua bho 'gbɛ, ‑a ‑wɔn ‑yö n ‑gɔ "gbɩɩ‑, ‑a 'klɔɔ‑ ‑mü ꞊dhɛ ‑a ‑wëëdhɛ ‑yö bho ‑sü 'ka kwa Dëmɛ ‑bha yë ‑bha ꞊dedewo. 13 ‑Ka Dhufusö 'ö kwa Dëmɛ ‑ya ‑ya bha waa‑ dhe 'ö ꞊dhɛ n dhe 'dhö 'pö bha‑ ‑nu ꞊tua bho n ‑dhɛ. 14 ‑Ka Asɛngklitö oo, Fedhegɔn oo, Ɛdhomɛsö oo, Patrobasö oo, Ɛdhömasö waa‑ kwa dheebhang 'dhɛ ‑nu 'ö wɛng‑ ‑nu 'wo 'ko "piʋ̈ bha‑ ‑nu ꞊tua bho n ‑dhɛ. 15 'Ma Fidhodhɔgö waa‑ Zudhi ‑a ‑nu ꞊tua bho. 'Ma Nedhe waa‑ ö dheebhang dhebhɔ bha‑ ‑nu ꞊tua bho. 'Ma Odɛnpasö waa‑ Atanna ‑bha mɛ ‑nu "pɛpɛ 'ö wɛng‑ ‑nu 'wo wo 'ko "piʋ̈, ‑a ‑nu ꞊gban ꞊tua bho 'gbɛ.

16 ‑Ka ka 'ko ‑nu ꞊tua bho kö 'ka ꞊loo ka 'kwëë‑ ꞊dhɛ ‑kɔ 'ö dheebhang ‑zë ‑nu ‑wa ‑kë 'ka ‑a 'dhö. Klisi ‑bha mɛ ‑nu ꞊gban "pɛpɛ ꞊wa ka ꞊tua bho 'gbɛ.

17 N dheebhang ‑nu, bhɛa" ꞊në 'a‑ wo sië ka ‑dhɛ kö 'ka dɔ "gbɩɩ‑ kö 'ka ka ‑dɩ 'kun mɛ 'wo‑ kë sië "dhʋ̈ kö Atanna ‑bha mɛ ‑nu ‑wo "kan 'kwëë‑ bha‑ ‑nu ‑gɔ. ‑A 'klɔɔ‑ ‑mü ꞊dhɛ Atanna ‑wʋ 'dhɛ 'ka‑ ma ‑blɛɛsü ‑a ‑ma 'wo‑ wo sië "gbɔng 'ka 'ö 'wo ‑wʋ "wɛɛ pö ka ‑dhɛ bha, ka ‑pö ꞊në 'wo‑ wo sië bha. ‑A ‑kë "dhʋ̈ ‑sü bha‑ 'gü, ‑ka ka ‑dɩ 'kun‑ ‑nu ‑gɔ ‑së kö 'ka "kan‑ ‑nu ‑bha. 18 ‑A pö 'a‑ wo "dhʋ̈ bha‑ 'klɔɔ‑ ‑mü ꞊dhɛ mɛ suu ‑nu 'wo "dhʋ̈ bha 'waa kwa Dëmɛ Klisi bha yö ‑zë ‑dhɔkë, ‑wo wo ‑dɩ dhɔɔbhaawɔn ꞊në‑ ‑kë. 'Yö 'mɛ ‑a ‑nu ‑zʋ 'yaa 'wɔn 'bha "piʋ̈ bha 'wo ‑wʋ ‑së ‑dhɛ "yi bho ‑wʋ "nɛɛnɛɛ ‑nu ‑pö ‑nu ‑dhɛ ‑sü 'ka 'yö 'wo‑ ‑nu ‑gɔ 'gü ꞊see‑ 'ka, 'yö 'wo‑ ‑nu wë bho Atanna ‑ta. 19 "Kɛɛ ka ‑zë ka ‑bha Atanna ꞊bhlëë ‑ya ‑sü bha mɛ ꞊gban "pɛpɛ ‑wa 'wɔn ‑dɔ. N zuë" ꞊nii ‑yö ‑da ꞊dedewo ka ‑wɔn 'gü ‑a ‑kë "dhʋ̈ ‑sü bha‑ 'gü, "kɛɛ yö ‑zë ꞊gban 'gü, ‑yö n "piʋ̈ ꞊dhɛ ka "yaaki ‑yö 'to 'daɔnnu ‑sü 'ka 'wɔn ‑së ‑dɩ ‑slɔɔ ꞊në‑ kë ‑sü ‑bha, kö 'wɔn yaa ‑zë kë ‑zʋgɔndhe ‑zian ꞊në 'ya 'dho ‑da ka ‑zʋ "piʋ̈ tongtongdhö. 20 ‑A ‑naa ‑yö n "yaan ꞊dhɛ Atanna do 'ö ‑gblü "kan Atanna 'ka bha ꞊në dho Sɔtraan 'pɔn ka ‑dhɛ 'yö 'ka "ta sü ‑a ꞊kpë "dhiʋ̈.

꞊Ya 'go yö ‑zë 'gü, kö kwa Dëmɛ Yesu ‑yö ö ‑bha ‑gasitɛ bha‑ kë ka ‑dhɛ ‑kpɛawo bha 'aa ‑yö kë!

21 Timote 'ö n ‑ta 'kun sië Atanna ‑bha yë ‑bha bha, ꞊ya ka ꞊tua bho 'gbɛ. Dhusiusö oo, Zazɔn waa‑ Sosipatɛɛ 'ö yɛng‑ ‑nu 'yi ‑gban 'kwëë‑ bha, ꞊wa ka ꞊tua bho 'gbɛ.

22 Mang Tɛɛtiusö ‑mɛ 'a 'sëëdhɛ ya‑ ‑bɛn zë 'ö 'a kwa Dëmɛ ‑bha zian ‑ta 'pö ꞊dhɛ ka 'dhö bha, 'ma ka ꞊tua bho 'gbɛ.

23 ꞊Ya 'go mü, mang Pɔdhö ‑mɛ n ‑dhɛngbhɔɔdë 'wo‑ ‑dhɛ Gayusö, 'ö Atanna ‑bha 'kɔdhigümɛ ‑nu 'wo ‑dhɛ ya‑ 'gü ‑a ‑nu ꞊gban 'wo bho 'ko ‑ta ‑a ‑gɔ 'kɔɔdhö 'pö bha, ꞊ya ka ꞊tua bho. Edhatö 'ö kë 'pö‑ ya‑ 'gü ‑mɛ ‑nu ‑bha 'wëëkɔdhiʋ̈ 'ka bha waa‑ kwa dheebhang Kaatusö, ꞊wa ka ꞊tua bho.

24 [Kö kwa Dëmɛ Yesu Klisi ‑bha ‑gasitɛ bha ‑ya kë ka ‑dhɛ "tʋ̈ng ꞊gban "pɛpɛ 'gü bha 'aa ‑yö kë.]

25 ‑Ka ‑kwa Atanna 'tɔ bhɔ, ‑a 'klɔɔ‑ ‑mü ꞊dhɛ yö ꞊në‑ "sɩ 'dhö‑ ‑dhɛ kö ‑yö ka kë "kplëë 'ka 'dhang ‑bho Yesu "dhiʋ̈ ‑sü 'gü. 'Wɔn 'ö ‑gban Yesu Klisi ‑wɔn ‑bha 'ö gun ‑bin ‑sü 'ka, 'ö Atanna yöö do ꞊në gun‑ dɔ sië, 'ö ‑bhɔ ‑a ‑bin ‑sü 'ka kwa ‑gɔ yi 'bha 'ka bha ꞊në 'a‑ ‑dhiang zë sië. 26 "kɛɛ ꞊ya "dhɛ bho‑ ‑ta kwa ‑dhɛ "tʋ̈ng ya‑ 'gü ‑a ‑wʋdhiʋ̈loomɛ ‑nu ‑gɔ 'sëëdhɛ 'gü ꞊dhɛ ‑kɔ 'ö gun‑ 'ka yöö 'ö‑ bhɔ ‑yi 'yaa 'dhö, 'ö‑ ga ‑yi 'yaa 'dhö bha‑ ‑zʋ "piʋ̈ bha‑ 'dhö. ꞊Yaa‑ ‑zɔn "sɛ ꞊gban "pɛpɛ 'gü ‑mɛ ‑nu ‑dhɛ, kë "dhʋ̈ kö ‑wo 'dhang bho ö "dhiʋ̈ kö ‑wo ö ꞊bhlëë ‑ya.

27 Kö Atanna 'ö yöö do ꞊në 'wɔndɔdhe 'dhö‑ ‑gɔ bha yö ꞊në‑ 'tɔ ‑yö bhɔ Yesu Klisi 'saa‑ 'gü ‑kpɛawo bha 'aa‑ ‑yö kë.