3
Dǫ gıgha ehkw'ı-ahodıı gha k'aodèe gı̨ı̨lı̨ı eyıts'ǫ gots'àgedıı-dǫǫ̀ gı̨ı̨lı̨ı̨
1 Dıı yatı sìı hotıì ehkw'ı hǫt'e: Dǫ gıgha ehkw'ı-ahodıı gha k'àowo wehłè dǫ hòtł'ò hanıwǫ nı̨dè, la wet'àaɂàa-deè ghǫ hòtł'ò anıwǫ hǫt'e. 2 Nǫ̀htsı̨ wecheekeè gha k'àowo elı̨ı̨ sìı weghǫ godı nezı̨-le gǫ̀hłı̨ ha nıìle. Wets'èkeè ı̨łè zǫ gǫ̀hłı̨ xè ehkw'ı eda ha, hotıì edexoehdı ha, nàowołı̨ı̨ ch'à edek'èdì xè dǫ nezı̨į̀ gıts'ǫ̀ naɂa ha, wekǫ̀ dǫ gha enìxànı̨ı̨tǫ ayį̀į̀hwhǫ ha, eyıts'ǫ nezı̨į̀ dǫ hoghàehtǫǫ elı̨ ha hǫt'e. 3 Yeèhdee-dǫǫ̀ elı̨ ha-le, wınì nàìtło ha-le, hanìkò dǫ ts'ǫ̀ wedzeè nezı̨ ha, dǫ ts'ǫ̀ nàyaehtı ha-le, eyıts'ǫ sǫǫ̀mba gha edì ha-le. 4 Edekǫ̀ nezı̨į̀ gok'èdì ha, weza gık'èı̨t'e xè nezı̨į̀ gıts'ǫ̀ naɂa gha hoghàgoehtǫ ha. 5 (Dǫ edekǫ̀ nezı̨į̀ gok'èdì k'èezǫ-le nı̨dè dànì Nǫ̀htsı̨ wecheekeè gok'èdì welì?) 6 Dǫ dıìhk'ǫ̀ą gots'ǫ wegha ehkw'ı-ahodıì ajàa sìı Nǫ̀htsı̨ wecheekeè gha k'àowo elı̨ ha nıìle, hajà nı̨dè xàhodì ade ha sǫnı, eyıts'ǫ wehłı̨ı̨ xèht'eè wesınìyaetı ha. 7 Dǫ gıgha ehkw'ı-ahodı-le sìı gıghǫ nezı̨į̀ agı̨ı̨wǫ ha hǫt'e. Hanì-le-ı̨dè edahxǫ godı nezı̨-le t'à gıghǫ gode t'à, wehłı̨ı̨ yedaèt'è ha sǫnı.
8 Eyı lanì k'aodèe ts'àgedıı gı̨ı̨lı̨ı̨ sìı ehkw'ı geeda ha hǫt'e, hanì-ı̨dè dǫ nezı̨į̀ gots'ǫ̀ nageɂa ha. Eyı dǫ hanıı sìı gıdzeè ehkw'ı ha hǫt'e, jìetì geedè ha-le, eyıts'ǫ t'asìı ghǫ egedì-le ha-le xè dǫ ghǫyageeɂà ha nıìle. 9 Nǫ̀htsı̨ wenàowoò ehkw'ıı hoghàgoètǫǫ sìı hotıì gık'èdì welì eyıts'ǫ weghǫ edınì ehkw'ı agı̨ı̨hwhǫ ha hǫt'e. 10 K'aodèe ts'àgedıı gı̨ı̨lı̨ ha nı̨dè t'akwełǫ̀ǫ̀ gogeèhdzà ha hǫt'e. T'asìı wejıı goghǫ gıgòhɂǫ-le nı̨dè, k'aodèe ts'àgedıı gı̨ı̨lı̨ ha dìì-le.
11 Eyı xèht'eè gıts'èkeè ehkw'ı geeda ha hǫt'e, hanì-ı̨dè dǫ nezı̨į̀ gots'ǫ̀ nageɂa ha. Yatıjıı t'à dǫ ghǫ gogede ha-le, edexogııhdı ha, eyıts'ǫ ehkw'ı nàhogehwho gha gııtà ha hǫt'e.
12 K'aodèe ts'àdıı elı̨ı̨ sìı wets'èkeè ı̨łè zǫ gǫ̀hłı̨ ha hǫt'e. Edekǫ̀ eyıts'ǫ edeza nezı̨į̀ gok'èdì ha hǫt'e. 13 Dǫ ts'àgedıı gı̨ı̨lı̨ı̨ sìı nezı̨į̀ edılaà ghàlageeda nı̨dè dǫ nezı̨į̀ gots'ǫ̀ nageɂa ha, eyıts'ǫ denahk'e Zezì-Krı gha gınì nàtsoò ade ha.
14 Whaà-le-t'ıì nets'àhtła ha sǫnı kò, dıı yatı weghàà k'ehoı̨ɂa gha nets'ǫ̀ eehtł'è hǫt'e. 15 T'asìı ts'ıhɂǫ̀ ı̨whąą̀ nets'ǫ̀ ahjà-le nı̨dè eyı nı̨htł'è weghàà dànì Nǫ̀htsı̨ wets'ǫ dǫ k'ehogeɂaa sìı wek'èı̨zǫ ha. Nǫ̀htsı̨ wets'ǫ dǫ sìı Nǫ̀htsı̨ edaa wecheekeè agı̨ı̨t'e; yìetł'aà whetǫǫ kǫ̀ yàıtǫ̀ lanì wecheekeè Nǫ̀htsı̨ wenàowoò ehkw'ıı k'ègedì hǫt'e. 16 Nǫ̀htsı̨ Zezì weghǫ ayìı k'èts'eezǫǫ̀ agǫ̀ǫ̀làa sìı sıì enıìyah dìì:
Dǫ k'ę̀ę̀ wègoèht'į̀ı̨,
Yedàyeh Nezı̨ı̨ ehkw'ı eghàlaı̨dà yeghǫ hadı,
yak'eet'ı̨į̀ ts'ǫ̀ wègoèht'į̀ı̨,
wegodıì dǫ hazǫǫ̀ xàɂaa ts'ǫ̀ nègı̨ı̨ɂǫǫ,
hazǫǫ̀ nèk'e wegodıì dǫ gıgha ehkw'ı-ahodı,
eyıts'ǫ enıìyah xè ı̨dòo yak'e ts'ǫ̀ nıwıìtı̨.