5
Dıı nèk'e yahtıı-wet'àaɂàa-deè hazǫǫ̀ sìı dǫ gıxèht'eè gıta gots'ǫ gììchì hǫt'e. Edèot'ı̨ gha nakweè geèhkw'e gı̨ı̨lı̨ t'à Nǫ̀htsı̨ nadąą̀ k'ehogeɂa, dǫ-hołı̨į̀ k'èxa tıts'aàdìı ełaàgehde xè Nǫ̀htsı̨ ts'ǫ̀ gık'eehk'ǫ̀. Hanì yahtıı-wet'àaɂàa-deè elı̨ı̨ sìı dǫ t'asìı k'ègeezǫ-le t'à ts'ıɂǫ̀ geedèe sìı gok'èezǫ xè etegoèhɂı̨ hǫt'e, ededı̨ sı goxèht'eè nàtso-le hǫt'e t'à. Eyıt'à edehołı̨į̀ k'èxa eyıts'ǫ dǫ gıhołı̨į̀ sı k'èxa Nǫ̀htsı̨ ts'ǫ̀ t'asìı k'eehk'ǫ̀ ha hǫt'e.
Dǫ wı̨ı̨zìı eyı la wet'àaɂàa edeghàɂà ha nıìle, Nǫ̀htsı̨ yekayaı̨htı nı̨dè zǫ yahtıı-wet'àaɂàa-deè elı̨ hǫt'e, Aaron Nǫ̀htsı̨ yį̀į̀hchì lanì. Zezì-Krı ededı̨ sı yahtıı-wet'àaɂàa-deè edèhtsı̨ nıìle. Hanìkò Nǫ̀htsı̨ yets'ǫ̀ dıı hadı,
“Nı̨ sìı Seza anet'e, dıı dzęę̀ k'e Netà whıhłı̨ hǫt'e,” yèhdı.
Eyıts'ǫ dıı hanì weghǫ dek'eèhtł'è,
“Welǫ whìle ts'ǫ̀ yahtıı anet'e, Melkızedek yahtıı-wet'àaɂàa-deè elı̨ wek'ę̀ę̀ yahtıı anet'e,” dek'eèhtł'è.
Zezì dıı nèk'e nàı̨dè ekò ededzeè t'à etse xè Nǫ̀htsı̨ ghǫnàdaetì ı̨lè. Ełaàwı ch'à edaxàyehtè ha dìì-le sìı ts'ǫ̀ yaı̨htı ı̨lè. Zezì nezı̨į̀ edetà ts'ǫ̀ naɂa xè t'aats'ǫǫ̀ yek'èı̨t'e t'à Wetà yeèhkw'ǫ hǫt'e. Nǫ̀htsı̨ Weza elı̨ kò daı̨ɂà t'à dànì Nǫ̀htsı̨ k'èats'ı̨ı̨t'ee sìı hoghàdeetǫ hǫt'e. Denahk'e elı̨ awììdlà tł'axǫǫ̀, dǫ hazǫǫ̀ yek'èı̨t'ee sìı welǫ whìle ts'ǫ̀ Edaxàgolee whelı̨. 10 Dànì yahtıı-wet'àaɂàa-deè Melkızedek wììchìı sìı k'ę̀ę̀ Zezì yahtıı-wet'àaɂàa-deè elı̨ ha Nǫ̀htsı̨ yį̀į̀hchì hǫt'e.
K'achı̨ Nǫ̀htsı̨ wets'ǫǫ̀ aahde-le
11 Eyı ghǫ ı̨łaà naxıts'ǫ̀ gohde ha dehwhǫ, hanìkò ı̨whąą̀ yatı ààhchı-le t'à weghǫ naxıts'ǫ̀ gohde ha wèhoedı-le lanì. 12 Naxı̨ hòt'a dǫ hoghàahtǫ ha ı̨lè, hanìkò Nǫ̀htsı̨ weyatıì ts'ǫǫ̀hk'e ayìı t'akwełǫ̀ǫ̀ hoghàgoetǫǫ sìı naxı̨ į̀hłı̨ k'achı̨ hoghǫ̀naxeetǫ. Ejıet'ò zǫ aahdǫ lanì, hanìkò bò dezhìı aahdè ha dìì. 13 Dǫ ejıet'ò zǫ t'à edaa sìı ı̨łaà bebìa lanì hǫt'e, eyıt'à Nǫ̀htsı̨ wegha ehkw'ı ts'eedaa yatıì yek'èezǫ-le hǫt'e. 14 Ekò bò dezhìı sìı dǫ ǫhdah gı̨ı̨lı̨ı̨ sìı gıgha hǫt'e; t'aats'ǫǫ̀ hoghàdegeetǫ t'à ayìı ehkw'ıı eyıts'ǫ ayìı hołı̨ı̨ ne sìı gık'èezǫǫ̀ aget'į̀.