4
Nǫ̀htsı̨ wets'ǫ dǫ ts'èwhı̨į̀ hòɂǫǫ hogeɂį̀ ha
1 Nǫ̀htsı̨ wexè ts'èwhı̨į̀ hòɂǫǫ sìı hots'eɂį̀ gha edeyatıì goghàı̨ɂǫǫ sìı ı̨łaà goxè wheɂǫ hǫt'e. Eyıt'à hotıì edexoahdı, naxıta ts'ǫ dǫ wı̨ı̨zìı eyı gha dek'aɂį̀ awede sǫ̀ǫ̀. 2 Gocho gıxèht'eè goxı̨ sı godı nezı̨ı̨ t'à gots'ǫ̀ gogı̨ı̨de hǫt'e, hanìkò Nǫ̀htsı̨ wegodıì gı̨į̀hkw'ǫ̀ǫ sìı gıgha ehkw'ı-ahodı-le t'à gıt'àhǫı̨hwhı-le. 3 Goxı̨ gogha ehkw'ı-ahodıı sìı Nǫ̀htsı̨ wexè ts'èwhı̨į̀ hòɂǫǫ sìı hots'eɂį̀ ha hǫt'e. Nǫ̀htsı̨ gocho gots'ǫ̀ dàdıı sìı k'ę̀ę̀,
“Sıì sek'èch'a t'à yatı nàtsoo t'à dıı haehsı̨, ‘Sexè ts'èwhı̨į̀ hòɂǫǫ sìı hogeɂį̀ hǫı̨lı̨ ha nıìle,’ ” hadı.
Hanìkò dıı nèè hòèlı̨ gots'ǫ Nǫ̀htsı̨ edılaà deghàà yeghǫnǫǫt'e ı̨lè. 4 Dzę łǫ̀hdı̨ t'à wheɂǫ ghǫ dıı hadı dek'eèhtł'è, “Nǫ̀htsı̨ edılaà hazǫǫ̀ yeghàlaı̨dà tł'axǫǫ̀ łǫ̀hdı̨ dzęę̀ k'e ts'èwhı̨į̀ nahoèhzı,” dek'eèhtł'è. 5 Hanìkò “ts'èwhı̨į̀ hòɂǫǫ” ghǫ k'achı̨ dıı hanì dek'eèhtł'è, “Sexè ts'èwhı̨į̀ hòɂǫǫ sìı hogeɂį̀ hǫı̨lı̨ ha nıìle,” dek'eèhtł'è.
6 Eyıt'à dǫ mǫ̀hdaa Nǫ̀htsı̨ xè ts'èwhı̨į̀ hòɂǫǫ sìı hogeɂį̀ ha hǫt'e wek'èts'eezǫ. Hanìkò ı̨nę̀ę dǫ godı nezı̨ı̨ egıìkw'o ı̨lèe sìı Nǫ̀htsı̨ k'èagı̨ı̨t'e-le t'à, Nǫ̀htsı̨ xè ts'èwhı̨į̀ hòɂǫǫ sìı hogıaɂı̨ nıìle. 7 Eyıt'à Nǫ̀htsı̨ k'achı̨ ı̨łàà dzę ı̨łè eyı gha wheɂǫ ayį̀į̀là, eyı dzęę̀ sìı “dıı dzęę̀ k'e” yèhdıì yıızı hǫt'e. Whaà hoòwo tł'axǫǫ̀ gocho Davıd t'à dǫ ts'ǫ̀ goı̨de hadı,
“Dıı dzęę̀ k'e weyatıì aàhkw'ǫ nı̨dè, Nǫ̀htsı̨ ts'ǫ̀ naxıdzeè dezhì aahłe-le,” dek'eèhtł'è.
8 Joshua Israel got'ı̨į̀ ekǫ ts'èwhı̨į̀ hòɂǫǫ ts'ǫ̀ agǫ̀ǫ̀là nı̨dè, Nǫ̀htsı̨ k'achı̨ dzę eyıì-le ghǫ gode ha-le ı̨lè. 9 Eyıt'à Nǫ̀htsı̨ wets'ǫ dǫ gıgha sìı Nǫ̀htsı̨ Dzęę̀ lanì deghàà ts'èwhı̨į̀ nahogeezì ha gıgha ı̨daà wheɂǫ hǫt'e. 10 Nǫ̀htsı̨ xè ts'èwhı̨į̀ hòɂǫǫ k'è goyats'eedè nı̨dè goılaà ghǫnats'et'è t'à ts'èwhı̨į̀ nahots'eezì ha hǫt'e, Nǫ̀htsı̨ edılaà ghǫnǫǫt'e t'à nahoèhzı lanì. 11 Eyıt'à Nǫ̀htsı̨ xè ts'èwhı̨į̀ hòɂǫǫ k'è hots'eɂį̀ ha nı̨dè hòtł'ò eghàlats'eeda ha hǫt'e, hanì-ı̨dè gocho dànì Nǫ̀htsı̨ k'èagı̨ı̨t'e-le k'ę̀ę̀ gogha hoìla ha-le.
12 Nǫ̀htsı̨ weyatıì sìı eda xè wek'ę̀ę̀ k'ehokw'o hǫt'e. Weyatıì sìı behcho į̀ła-ts'ǫ̀ wek'à dènı nahk'e dènı hǫt'e. Gokwǫ̀ weɂǫ̀ǫ̀ ts'ǫ̀ tàgoehwhe hǫt'e, godą̀ązhį̀ı̨ eyıts'ǫ gots'ǫ ı̨nì į̀łak'aà ayehɂı̨, gokw'ǫǫ̀ eghagoèhzǫ eyıts'ǫ hazǫǫ̀ godzazıì į̀łak'aà ayehɂį̀ xè godzeè yìı dàts'ı̨ı̨wǫǫ sìı yesınìyaehtı. 13 T'asìı hazǫǫ̀ hòèlı̨ı̨ sìı ı̨łè kò Nǫ̀htsı̨ wenaàhtǫ wheɂǫ nıìle. T'asìı hazǫǫ̀ wegha ts'ǫwhela xè wenadąą̀ wègaat'ı̨, eyıts'ǫ t'asìı hazǫǫ̀ k'èxa gosınìyaehtı ha hǫt'e.
Zezì Yahtıı-wet'àaɂàa-deè elı̨
14 Zezì Nǫ̀htsı̨ Weza gogha yahtıı-wet'àaɂàa-deè elı̨ı̨ sìı yak'e Nǫ̀htsı̨ nadąą̀ eghàlaı̨dàa sìı hòtł'ò gogha ehkw'ı-ahodıı ts'edı nı̨dè Zezì wexè ats'et'ı̨ hǫt'e. 15 Gogha yahtıı-wet'àaɂàa-deè elı̨ı̨ sìı dànì nàts'etso-le t'à dǫ ts'ı̨ı̨lı̨ı̨ sìı yek'èezǫ hǫt'e. Goxèht'eè t'asìı hazǫǫ̀ t'à weèdzà ı̨lè hǫt'e, hanìkò hołı̨ı̨ wı̨ı̨zìı wek'e wheɂǫ-le. 16 Eyıt'à edèdats'eedı-le xè Nǫ̀htsı̨ wesǫnıwǫ wehòhɂǫǫ sìı wenadąą̀ nèts'ııdè, hanì-ı̨dè etegoèhɂı̨ ha eyıts'ǫ gogha hoìla ajà nı̨dè gots'ǫ̀ sǫnıwǫ t'à gots'àdı ha.