3
Zezì Moses nahk'e elı̨
1 Eyıt'à sèot'ı̨ degaı, yak'e ts'ǫ̀ naxıkayaetıı sìı Zezì ts'ǫ̀ naxınì nàtsoò aahłe. Ededı̨ Nǫ̀htsı̨ wecheekeèdeè elı̨ı̨ xè gogha yahtıı-wet'àaɂàa-deè elı̨ı̨ sìı gogha ehkw'ı adı hǫt'e. 2 Moses Nǫ̀htsı̨ wekǫ̀ gha eghàlaı̨dà ekò Nǫ̀htsı̨ wınì k'ę̀ę̀ zǫ eghàlaı̨dà lanì Zezì ededı̨ sı amìı yį̀į̀hchìı sìı yınì k'ę̀ę̀ zǫ eghàlaeda hǫt'e. 3 Kǫ̀-gòhtsı̨ı̨-dǫǫ̀ sìı kǫ̀ nahk'e wet'àaɂà hǫt'e, eyı lanì Zezì sı Moses nahk'e weghàsǫhoedı hǫt'e. 4 Kǫ̀ hazǫǫ̀ dǫ yèhtsı̨ hǫt'e wek'èts'eezǫ, hanìkò Nǫ̀htsı̨ sìı t'asìı hazǫǫ̀ whehtsı̨ hǫt'e. 5 Moses, Nǫ̀htsı̨ wekǫ̀ gha eghàlaeda ekò yek'èı̨t'e ı̨lè. Įdaà nı̨dè Nǫ̀htsı̨ dàdı ha sìı ghǫ dǫ ts'ǫ̀ goı̨de. 6 Hanìkò Zezì-Krı, Nǫ̀htsı̨ Weza elı̨ k'ę̀ę̀ Edetà k'èı̨t'e xè ededı̨ Nǫ̀htsı̨ wekǫ̀ gots'ǫ dǫ ts'ǫ̀ K'àowo hǫt'e. Nǫǫde ts'ǫ̀ goınì dejı̨-le xè gogha ehkw'ı-ahodı ts'edı nı̨dè Nǫ̀htsı̨ wekǫ̀ gots'ǫ dǫ ats'ı̨ı̨t'e.
7 Eyıt'à Yedàyeh Nezı̨ı̨ dıı hadı hǫt'e,
“Dıı dzęę̀ k'e Nǫ̀htsı̨ weyatıì aàhkw'o nı̨dè, 8 naxıcho gı̨į̀hdzà lanì wets'ǫ̀ naxıdzeè dezhì aahłe-le. Įdèe whaà ekìı-ka nèk'e naxıcho Nǫ̀htsı̨ geèhdzà xè wek'èch'a eghàlagı̨ı̨dà ı̨lè. 9 Ekǫ segeèhdzà ı̨lè, eyıts'ǫ dı̨ènǫ xo ts'ǫ̀ gıdaà enıìyah łǫ hòwhıhtsı̨ı̨ sìı gıaɂı̨ ı̨lè. 10 Eyı ts'ıhɂǫ̀ naxıcho ekìıyeè k'e geedaa sìı gıts'ǫ̀ sek'èch'a xè dıı haehsı̨ ı̨lè, ‘T'aats'ǫǫ̀ ededzeè t'à ts'ıɂǫ̀ geedè eyıts'ǫ senàowoò k'ègeezǫ-le.’ 11 Gıts'ǫ̀ sınì-le t'à dıı yatı nàtsoo whıhtsı̨, ‘Edı̨į̀ sexè ts'èwhı̨į̀ hòɂǫǫ sìı hogeɂį̀ hǫı̨lı̨ ha nıìle,’ ” hadı dek'eèhtł'è.
12 Eyıt'à sèot'ı̨ı̨, naxıdzeè yìı hołı̨ı̨ awede sǫ̀ǫ̀ eyıts'ǫ naxıgha ehkw'ı-ahodı-le t'à Nǫ̀htsı̨ edaa sìı wets'ǫǫ̀ naahdè sǫ̀ǫ̀. 13 Hanìkò ı̨łaà “dıı dzęè” ts'edı et'ıì dzę taàt'eè ełınì nàtsoò ałaahɂı̨. Hałaahɂı̨ nı̨dè naxıta dǫ wı̨ı̨zìı weghǫyahoeɂà t'à Nǫ̀htsı̨ ts'ǫ̀ wedzeè dezhì ade ha nıìle. 14 T'akwełǫ̀ǫ̀ dànì hotıì gogha ehkw'ı-ahodıı sìı nǫǫde ts'ǫ̀ ts'ıtǫ̀ nı̨dè, Zezì-Krı wexè ı̨łè lats'ı̨ı̨t'e hǫt'e. 15 Dıı hanì dek'eèhtł'è k'ę̀ę̀,
“Dıı dzęę̀ k'e Nǫ̀htsı̨ weyatıì aàhkw'ǫ nı̨dè, naxıcho gı̨į̀hdzà lanì wets'ǫ̀ naxıdzeè dezhì aahłe-le,” dek'eèhtł'è.
16 Nǫ̀htsı̨ gots'ǫ̀ goı̨de gıìkw'o ı̨lè ekò Nǫ̀htsı̨ k'èch'a eghàlagı̨ı̨dà. Moses dǫ hazǫǫ̀ Egypt nèk'e gots'ǫǫ̀ xàgoèwaa sìı eyı et'ıì agı̨ı̨t'e! 17 Dı̨ènǫ xo gots'ǫ̀ Nǫ̀htsı̨ gots'ǫ̀ wınì-le sìı amìı agı̨ı̨t'e? Dǫ Nǫ̀htsı̨ k'èch'a hołı̨ı̨ hogèhtsı̨ t'à ekìı-ka nèk'e ełaàgı̨ı̨dèe sìı eyı agı̨ı̨t'e. 18 Nǫ̀htsı̨ amìı ts'ǫ̀ yatı nàtsoo t'à dıı hadı, “Edı̨į̀ sexè ts'èwhı̨į̀ hòɂǫǫ sìı hogeɂį̀ hǫı̨lı̨ ha nıìle.” Dǫ gık'èı̨t'e-le sìı gots'ǫ̀ hadıì xàyaı̨htı ı̨lè. 19 Gıgha ehkw'ı-ahodı-le t'à Nǫ̀htsı̨ wexè ts'èwhı̨į̀ hòɂǫǫ sìı hogeɂį̀ ha dìì wek'èts'eezǫ hǫt'e.