आमोस नी किताब
आमोस नी किताब
परिचय
इनी किताब मा आमोसन ओगळ हुयने वाळी वातोन खोबोर छे। अमोस एक गुवाळीयो 1:1 आरु एक किसान 7:14 हुतो। तव परमेश्वर हेरे सी आपसो कागळीयो बोनने करीन बुलायो। आमोस तोकोआ नावन सोहर सी हुतो, जो यहुदान दोखेवरा मुलको मा हुतो, पुन हेरा जादा सी जादा खबर बोखवरी वावी इसराएल मुलुक जुगु होती। आमोस तेत्यार भोगवानो वोगे गोथी वात करीयो, जोत्यार उज्जियाह यहुदान राजा हुतो। आरु योराबाम इसराएलन दुसरो राजा हुतो। यो आन्दास सी ईशु मसीह आवने पेहेल 750 सालो वात छे।
आमोस पेहला दुय पाठ मा थुड़ाक मुलकोन विरुद् नियावोन भोगवानो वोगी गोथी वात कोर्यो, पुन जादा खोबर इसराएल जुगु होती। यो इसराएल जुगु घोनी वारु वातोन टेम होतो। तेनी वारु वातोम होये परमेश्वर काजे विसरी गोया आरु गोरब्या मानसो सारे भुन्डो वेवहार कोर्या 2:6। ओतरान कोरीन परमेश्वरन नियाव हेनुक गुलाम बोनावीन लीन जानो होतो 7:17। ओळी वी परमेश्वर वायदु कोर्यु कि होये इसराएलन मानसो काजे हेनु आखा देसो पोर ओळी जिक हात कोरने मा मोदोत् कोरसे जेनु पोर होये पेहले राज कोरला 9:12।
रुपरेखा
1. पेहला पद मा आमोस आपसा वाराम देखाड़े।
2. ओळी पाठ 1 एने 2 ने दिसरा भाग मा, हुयो घोना मुलको पोर नियाव सोमवाड़े।
3. पाठ 3:9-11 इसराएलन नियाव आरु गुलामीन वाराम वात कोरे।
4. आखरी पाठ 9:12-15 मा, परमेश्वर वाचला विश्वासी इसराएल मा पोछु लावनेन वायदु कोरे।
1
1 तकोआ गांव मा रोवने वावु आमोस जु गाडरा बुकड़ान गुवायाम गोथु होतु, हेरा ये बुले छे जु तेना योहुदान राजा उज्जियाह क, आरु योआसन पुर्यो इसराएलन राजा यरुब्बामन दाहड़ाम, भुकोम गोथु दुस साल पेहले, इसराएलन वाराम दोरसोन देखिन कोवे: 2 योहोवा सियोन सी कुराटो देसे, आरु योरुसालेम गोथु आपसो बुल सोमवाड़से; तोत्यार तोत्यार गुवायान चारवाय कोलेपसे, आरु कार्मेलन चोटी चुयनाय जासे।
इसराएल न पड़ोसी राजन दण्ड
3 यहोवा ओसु कोवे : दोमिस्कन ताव तावोन गुनान कोरता हांव हेरो डोन नी छुड़ो; काहकि चे गिलादोन लुहड़ाक होव गेरन्ये कोरीन कुसनी नाखला छे। 4 एरकरीन हांव होजाएलन राजान किला मा आगठो लागाड़ीस, आरु हेरेसी बेन्हदोदन राजान बोंगला वी नाश होय जासे। 5 हांव दोमिस्कन साकळीयाक तुड़ नाखीस आरु आवेन नावोन घाटिम रोवने वावाक आरु बेतएदेन घोर मा रोवने वावा राजा डोन आपन्या घोरानाक नास कोरीस; आरु अरामन मानसे बान्दवाय होईन कीर जासे, योहोवान योत् बुल छे। 6 योहोवा ओसु कोवे: गाजान ताव तावोन गुनान कोरता हांव हेरो डोन नी छुड़ो; काहकि चे आखा मानसे बांदवाय मा कोरीन ली गोया कि हेनुक एदोमोन होकोम कोर देजे। 7 एरकरिन हांव गाजान मोटला भितड़ाम आगठो लागाड़ीस आरु हेरेसी हेरा मोटलो किला नास होय जासे। 8 हांव ओशदोदोन रोवनेवावाक आरु ओसकोलोनोन राज कोरन्या घोरानाक वी नास कोरीस; हांव आपसो हात एक्रोनोन विरुद् चालाड़ीस, आरु वाचला पोलिस्ती मानसे नास होयसे, परमेश्वर योहोवान यो बुल छे। 9 योहोवा ओसु कोवे: सोरोन तिन काय पुन च्यार गुनान कोरता हांव डोन आपनो नी छुड़ो; काहकि चे आखा मानसोक बोन्दी बोनावीन एदोमोन होकोम कोर देदा आरु भाइस्योन वायदाक फोम नी कोर्या: 10 एरकरीन हांव सोरोन मोटला भितड़ा पोर आगठो लागाड़ीस, आरु हेरेसी हेरो मोटलो घोर वी नास होय जासे।
एदोम
11 योहोवा ओसु कोवे: एदोमन ताव तावोन गुनान कोरता हांव हेनाक डोन आपने नी छुड़ो; काहकि होयु आपसा भाईस्योक तोलवार लिन मार देदु आरु थुड़ीक वी गिन नी कोर्यु, पुन रिसो सी हेनुक एक पोट्यु फाड़तुत् रोयु, आरु आपसी रिस घोना दाहड़ा जुगु बोनाविन राख्यु। 12 एरकरिन हांव तेमान मा आगठो लागाड़ीस, आरु हेरेसी बोसरान मोटलो किला वी नास होय जासे।
अम्मोन
13 ओम्मोन योहोवा ओसु कोवे ओम्मोनन ताव तावोन गुनान कोरता हांव हेनाक डोन आपने नी छुड़ो काहकी चे आपसी काकोड़ काजे वोदाड़ने जुगु गिलादोन भारपाये बायरान पेट काजे चिर नाख्या। 14 एरकरिन हांव रोब्बा न मोटला भितड़ा मा आगठो लागाड़ीस, आरु हेरेसी मोटलो किला वी नास होय जासे। तेनु लोड़ाईन दाहड़ाम हुहड़ु होयसे, चु आंजी पुन भुत्यान दाहड़ु होयसे; 15 आरु हेन्दरु राजा आपसा मुख्या भेव गुलामी मा जासे, योहोवान योत् बुल छे।