लैव्यव्यवस्था की किताब
लैव्यव्यवस्था नी किताब
पुरावो
लैव्यव्यवस्था न किताब उना कानून सी बनली छे जिनीक परमेश्वर मूसा न लारे इस्राएलीया न क आपलो हुतो। याँ कानून बलिदान चढ़ावने आरू मिलाप वाळा तम्बू मा पूजा न नियम ठायको करने सी जुड़ायलो छे। लैव्यव्यवस्था न मतलब छे लैविया सी जुड़ली जो इस्राएल न त्यो गोत्र जिनाक परमेश्वर पुजारा बनने आरू मंदिर न देख भाळ करने करीन नेवाड़लो हुतो। रीतिभातिन रूप सी अकोल वाळा न माननो छे कि लैव्यव्यवस्था न किताब, आरू पांच ग्रंथन दिसरी किताबीया (उत्पत्ति, निर्गमन, गिनती आरू व्यवस्थाविवरण) मूसा कागळीयान लारे लिखी हुती। असो मालम पड़े कि यो ग्रंत बी इनी वात क सार देखाड़े, काहकी लैव्यव्यवस्था 1:1 मा लिकलो छे कि परमेश्वर यी वात मूसा सी कयलो हुतो। काहय गिनवानोन यो बी माननो छे कि यी किताब वेगला वारान लिखला चापड़ा सी हुयीन 5 वी या 6 वी शताब्दी ईशू मसीह आनेन पेहले बाबुल मा तियार हुयली हुती।
लैव्यव्यवस्था न किताब मा हामू भणजे कि परमेश्वर पुजारान क काहय भाँतिन बलिदान चहढ़ावनेन हुकुम आपीयो।इनु मायीन काहय बलिदान लोगहन क पापन करता चहढ़ावता हुता। दिसरो बलिदान मरजी सी, काहलो मनुसन परमेश्वरन करता चहढ़ाय सकता हुता। हर हालोत मा यो छाको हुतो कि भेंट चुखी आरू आरगो हुयनो जुळे, कि त्यो मनुसन तरफ सी वारू सी वारू हय। यो उजेन्तो परमेश्वरन चुखापन क देखाड़तो हुतो। किताबन आखरी भाग मा यो समझाड़ मेलोयो, कि इस्राएली आरू पुजारा कसा चुखा रय सके या कसा विटुळ सी चुखा हुय सके। इनी किताबन खास वात यी छे कि परमेश्वर चुखलो छे, आरू इनी किताब मा आपला सारा नियमन पाळन करीन एस्राएली परमेशवरन हजुवरी मा रय सकता हुता।
रूपरेखा
1. लग अलग बलिदान चढ़ावनेन नियमन हुकूम आपलो छे। 1–7
2. हारून आरू हेका पोर्यान क ठानुक आपनेन पुरावो छे। 8–10
3. चुखलो आरू विटुळ खानान आरू बिमारियान वारा मा नियम आपलो छे। 11–16
4. खानो, तिहवार वारू आव भाव आरू आरामन सालोन वारा मा अलग अलग हुकूम देखाड़ छान्डियो। 17–27
1
होम बलि न नियम
1 योहोवा न मूसा क मिलाप वाळा तम्बू मा सी बुलावीन हेका सी कयो, 2 इसराएलीयो सी कय कि कदाम तुमरे मा सी कोय मनुस यहोवा क लियन पशुन चढ़ावो चढ़ावे, ती पाळनिया पशु गाडरा- बुकड़ा माईन एक हुयनो जुवे। 3 कदाम त्यो पाळनीया पशु मा सी होमबली करे, ती ओका मा काहय बी पाप नी हय उको मिलाप वाळा तम्बून झपला पर चढ़ावे कि योहोवा हेको मान लेय।
4 त्यो आपसा हाथ को होमबलि क पशुन मूनका पर मेले, आरू त्यो हेका लियन पछतावो करने करीन मान लेसे। 5 तव त्यो उना केवड़िया को योहोवा भगवान क सामने बलि करे; आरू हारून क पोर्या जो पुजारो छे त्या लुहूय को साते ली जाईन उनी वेदी न च्यारो मेर छिड़क देय जो मिलाप वाळा तम्बून झपला पर छे। 6 ओळते त्यो खाल निकाळीन उना पशुन टुकड़ा-टुकड़ा करे; 7 तव हारून पुजारान वेदी पर आग्ठी मेले, आरू आग्ठा पर लाकड़ा जावीन मेले; 8 आरू हारून क पोर्या जो पुजारा छे त्या मूनका आरू चरबी क सात मा पशुन टुकड़ा क उनी लाकड़ी पर वेदीन आग्ठी पर हसे उको सजावीन मेले; 9 आरू त्यो ओका आतड़ा आरू पाय को पानी सी धुवे। तव पुजारो सब को वेदी पर धपाड़ देय कि त्यो होमबलि योहोवा भगवान क लियन वारू गंधायने वाळो बलिदान बने। 10 कदाम त्यो गाडरो या बुकड़ान होमबलि चढ़ावे, त्यो पूरो आरेगलो नर पशु हय उको चढ़ावे। 11 आरू त्यो उको योहोवा न ओगळ वेदी पर उत्तर न तरफ बलि करे; आरू हारून क पोर्या जो पुजारा छे पशु क लुहूय को वेदीन चारो मेर छिड़की देय। 12 आरू त्यो मूनका आरू चरबी क सात मा ओका टुकड़ा-टुकड़ा करे, आरू पुजारो ईनु आखान क उनी लाकड़ी पर सजावीन मेले जो वेदी रहवसे; 13 त्यो ओका आतड़ा आरू पाय को पानी सी धुवे। आरू पुजारो वेदी पर धपाड़े कि त्यो होमबलि हुय जाय आरू योहोवा भगवान जुगु गंधायने वाळो बलिदान बने। 14 “कदाम त्यो यहोवा क लियन चिल्लान होमबलि चढ़ावे, ती हुली नीते पेरवान क चढ़ावो चढ़ावे। 15 पुजारो ओको वेदी क साते ली जाईन हेका गळा क मुयड़ीन मूनको धड़ सी अलग करे, आरू वेदी पर धपाड़े; आरू उका सारा लुहूय को उनी वेदी क धड़े पाड़ देय; 16 आरू त्यो ओकी गळान थयली को पाखड़न क सात निकाळीन वेदी क पूरबन तरप रुखड़ो न्हाकनेन जागा पर न्हाक देय; 17 आरू त्यो ओका पाखड़ान वीच मा सी फाड़ देय, पुन अलग-अलग नी करे। तव पुजारो उको वेदी पर उनी लाकड़ीन उपर मेलीन जो आग्ठा पर हसे उको धपाड़े कि त्यो होमबलि आरू यहोवा क लियन गंधायने वाळो बलिदान बने।