14
Mwanadamu avyalwaye ni mchetu
maishage sigo mare, tsona ga tele tabu.
Iye nkubumuka dza ruwa, chisha akanyala,
nkuuka mairo dza chivurivuri na kukoma kuishi.
Nawe kpwadze unavugula matso kulola mutu dza iye,
na kumreha kotini alumbane na uwe?
Ni ani awezaye kutuluza chitu swafi kula kpwa chitu chikolo?
Takuna ngʼo.
Siku za kuishi mwanadamu zapimwa,
na isabu ya mieziye unayo uwe,
na uchimuikira miphaka ambayo kaweza kuitsupa.
Phahi lola kanda, aphahe kuoya,
ili ahamirwe ni sikuze, dza muhendadzi-kazi.
 
Mana muhi una kuluphiro,
hata uchikatwa, nkutsephula tsona
na tsephuze tazindasira.
Dzagbwe miziye nkukala mikare mo mtsangani,
na chisichiche nkuuma,
ela uchiphaha mzizimo wa madzi,
nkutsephula dza muhi mtsanga.
10 Ela mwanadamu nkufwa nao ukakala mwishowe,
nkudosa roho, na ikakala ndio mwisho.
11 Dza madzi ga ziyani gaumavyo,
na madzi ga muho ganavyokoma kujera na kuuma.
12 Ndivyo mwanadamu, afwapho kauya tsona,
hata mlunguni ndiphosira, mwanadamu kandalamuka
au kulamuswa kula mwakpwe usingizini.
13 Kalapho ungenifwitsa kuzimu,
na kunifwitsa hadi tsukizizo zidigirike
ungenipangira wakati wa kunitambukira!
14 Dze, mutu achifwa anaweza kuuya moyo tsona?
Mutu mimi ningegodzera, siku zosi za utumishi wangu,
hata wakati wangu wa kuvugulwa ukafika.
15 Ungeniiha, nami ningeihika,
ungeaza kuona cho chiumbe urichoumba na mikonoyo.
16 Ndipho ungeweza kuolanga nyago zangu,
ungechunguza dambi zangu,
17 uasi wangu ungefungirwa mkobani,
na ungebwiningiza uyi wangu.
18 Ela dza mwango umomonyokavyo na kufwikitsika,
na dza vira dziwe rigomokavyo phatuphe,
19 madzi nkurisa go mawe,
na mvula kulu nkutsukula mtsanga,
ndivyo uangamizavyo kuluphiro ra mwanadamu.
20 Uwe ukumshinda mwanadamu siku zosi, naye akaangamika,
ukumgaluza umbore ra uso na kumphirika mtsangani.
21 Anae achihewa ishima ye kamanya,
na achitserezwa cheo ye kana habari.
22 Iye asikirago ni maumivu ga mwiriwe,
na kudzisononekera ye mwenye.”