15
Elifazi anamjibu tsona Ayubu
1 Ndipho Elifazi, Mtemani achimjibu Ayubu achiamba,
2 “Dze, mutu wa ikima nkujibu na maneno ga upuzi,
na kuodzaza ndaniye na phepho ra mlairo wa dzuwa?
3 Takuna mutu wa ikima awezaye kugomba dza vyo ugombavyo,
au kutuluza maneno gasigoriwa ni mshoka.
4 Ela uwe kumuogopha Mlungu,
na unazuwiya atu kumuabudu Mlungu.
5 Mana uyio unafundza kanwayo,
nawe ukutsambula gara gagombwago ni ajanja.
6 Kanwayo mwenye inakulamula, si mimi,
madomogo mwenye ganashuhudiya chinyumecho.
7 Kpwani we ndiwe mutu wa kpwandza kuvyalwa?
Au we wavyalwa kabila ya myango?
8 Dze, wasikira mashauri ga siri ga Mlungu?
Kpwani unaona ikima ni yako macheyo?
9 Unamanya riphi husirorimanya?
Na ni riphi hurimanyaro ambaro tariwazi kpwehu?
10 Huna enye komvwi na atumia sana,
avyere kuriko sowe.
11 Dze, ko kuhurizwa uhurizwako ni Mlungu ni kudide?
Au ko kukala anagomba nawe kpwa upore takutosha?
12 Mbona ukatsukirwa mwako moyoni?
Mbona unahutumburira matso?
13 Ukatsukirwa hata unaihenda rohoyo ikale chinyume cha Mlungu,
na kugomba maneno dza higo.
14 15:14 Ayubu 25:4–6Mwanadamu ni ani, hata akale swafi?
Au iye yevyalwa ni mchetu ni chitu chani, hata akale wa haki?
15 Ichikala Mlungu kakuluphira atakatifue,
na ko mlunguni si kuswafi mbereze,
16 dze ye mwanadamu amtsukizaye na ariye mkolo,
ahendaye uyi dza anwaye madzi?
17 Niphundza nami ndakueleza
na nkuambire gara nchigoona,
18 (garigogombwa ni atu a ikima
ambago aambirwa ni akare aho bila kufwitswa.
19 O akare machiyao ndio ariohewa yo tsi,
na takuna mjeni ariyetsapa kahi-kahi yao).
20 Mutu mui nkugaya maishage gosi,
mutu aoneraye ayae nkugaya miakaye yosi ariyoikirwa.
21 Sauti za kuogofya nkuodzala mwakpwe masikironi
wakati akaongokerwa, andavamiwa ni nyo atekao nyara.
22 Iye kakuluphira kukala andauya kula jizani,
chisha nkugodzwa ni upanga.
23 Iye nkudengereka kuendza chakurya, kuno anaamba, ‘Chi kuphi?’
Anamanya kukala siku ya jiza i phephi naye.
24 Tabu na kulumira vinamtiya wuoga,
vindamshinda dza mfalume ariye tayari kpwa viha.
25 Kpwa mana akagolosa mkpwonowe apigane na Mlungu
na kpwenderera kumʼbera iye Mwenye Nguvu Zosi.
26 Kpwa kudziunula anazola mairo kumshambuliya Mlungu,
kuno akagbwiririra ngao ndziho.
27 Dzagbwe usowe ukanona,
na chibiruche chikaodzala mafuha,
28 ela andaishi midzi ya magandzoni,
kahi ya nyumba ambazo tazisagalwa ni mwanadamu,
zirizopangirwa kukala ndulu za mawe.
29 Kandakala tajiri tsona
na maliye taindadumu
wala taindakala nyinji kpwenye yo tsi.
30 Iye kandachimbira ko jizani,
dzuwa rindaihenda yo mitseye inyale,
na pumuzi za Mlungu zindamphyera.
31 Asidzichenge kukuluphira chitu chisicho na mana,
mana kandariphiwa chochosi.
32 Andariphiwa kabila ya wakatiwe,
na pandaye taindawanda.
33 Andakala dza mzabibu ambao zabibuze zikakutika kabila ya wakatiwe,
dza mzaituni uchiokuta maruwa.
34 Mana atu asiomuogopha Mlungu, taandakala na chivyazi,
na moho undaocha makalo ga hinyo amendzao kuhongbwa.
35 Aho nkupanga fujo na kuhenda mai
na mioyo yao nkupanga handzo.”