16
Ayubu anadzihehera
1 Ndipho Ayubu achijibu achiamba,
2 “Násikira mambo manji dza gago,
mwimwi mosi mnaniyuga tu, tamniphoza marenda.
3 Maneno genu gasigo na mana gandasira rini?
Au ni chitu chani chinachokuhendani mujibu?
4 Mimi piya ningegomba dza vyo mgombavyo,
kalapho munatsupira gaga garigoniphaha
ningegomba maneno chinyume chenu
na kusukasuka chitswa changu.
5 Ningekutiyani nguvu kpwa gara nigombago,
na maneno gangu ga kuphoza marenda gangehuriza utsungu wenu.
6 Hata nchigomba chisha sonono yangu taisira,
na hata nchinyamala chisha takuniphunguzira sonono.
7 Kpwa kpweli Mlungu akaniremweza,
atu angu osi akaaolaga tsetsetse.
8 Uwe ukahenda mwiri wangu kukala mifupha mihuphu,
vivi atu anaona kukala nkahenda dambi.
Mwiri wangu wenye mikunya-mikunya unashuudiya chinyume changu.
9 Akanimwamula kpwa tsukizize, akanimena
na kuningʼatira meno,
adui wangu akanitumburira matso.
10 Atu akanahula kanwa zao kunizemerera,
akaniwanga makofi kpwa chibero,
anadzikusanya phamwenga chinyume changu.
11 Mlungu akanitiya mikononi mwa enye dambi,
na kunilavya kpwa atu ayi.
12 Nákala sina maneno, ela achinivundza vipande-vipande,
wanigbwira singo achinibunda-bunda na photsi,
achinihenda kukala ni mlengbwa.
13 Atue a maha akanizangira,
anaahula figo zangu bila ya kunionera mbazi,
anamwaga chihumbo utsungu changu photsi.
14 Iye ananilumiza mara kpwa mara,
ananishambuliya dza sujaa.
15 Nikadzishonera nguwo za magunia nikavwala,
nami nkamwaga nguvu zangu vumbini.
16 Matso gangu gakadobera kpwa ndiro,
na jiza rikagbwira mwangu kopheni.
17 Dzagbwe mikono yangu taidzangbwehenda fujo,
na mavoyo gangu ga swafi.
18 Uwe tsi, usibwiningize milatso yangu,
na chiriro changu nachisiphahe phatu pha kuoya.
19 16:19 Ayubu 19:25Hata vivi shaidi wangu a mlunguni,
na iye ndiye nihehera a dzulu.
20 Asena angu ananibera,
ela matso gangu ganammwagira Mlungu matsozi.
21 Naaza kala phana mutu wa kunihehera mbere za Mlungu,
dza vira mutu aheheravyo msenawe.
22 Mana miaka michache indatsapa,
nindaphiya charo ambacho tachiuywa.