21
Ayubu anaamba
atu ayi ndio aongokerwao
Phahi Ayubu wajibu achiamba,
“Phundzani vinono maneno gangu,
na muchihenda hivyo mundaniphoza marenda.
Nivumirirani, nami nigombe,
na bada ya kugomba, zidini kunibera.
Kpwani ko kulalamika kpwangu kunahusu mwanadamu?
Kpwa utu wani nivumirire?
Nilolani na muangalale,
muzibe kanwa zenu na mafumba.
Nchigafikiriya gaga, gananitiya wuoga,
na kunikakamisa mwiri.
Mbona atu ayi anaishi,
kufikira utumia na kukala enye uwezo?
Nkuona ana aho anaimarishwa mbere zao,
na chivyazi chao mbere za matso gao.
Midzi yao i salama, ko kuogofyerwa takuko,
na yo fwimbo ya Mlungu taidzulu yao.
10 Ndzau zao zinavyaza bila kuremwa,
Ndama zao zinavyala bila ya kuvoromosa.
11 Nkulongoza ana aho dza chaa cha mfugo,
na ana aho nkuvwina.
12 Nkuimba na tamburini na zeze,
na kuhamirwa ni sauti ya chivoti.
13 Nkuishi maisha ga kuongokerwa,
nao nkulazwa mbirani na amani.
14 Ela nkumuamba Mlungu, ‘Huukire hipha!
Tahuna haja ya kumanya njirazo.
15 Ni ani ye Mwenye Nguvu Zosi, hata humuhumikire?
Na hata huchimvoya hundaphahani?’
16 Dze, kuongokerwa kpwao taku mwao mikononi?
Ushauri wa atu ayi u kure nami.
 
17 Taa za atu ayi waziona kano ngaphi zikazimwa?
Nyo enye nkuphahwa ni mafwa?
Kpwani Mlungu nkuatiya adabu wakati akaatsukirirwa?
18 Kpwani nkuphepheruswa ni phepho dza makodza ga kuuma,
au dza wiswa uphepheruswavyo ni chikulukulu?
19 Mwimwi mkuamba, ‘Mlungu nkuika makosa gao na kutiya adabu ana ao.’
Naatiye adabu nyo enye, ili agamanye enye.
20 Richa aone kubanangbwa kpwao na matso gao enye,
na aphokere tsukizi za ye Mwenye Nguvu Zosi.
21 Anajali utu wani kuhusu atu aho bada ya aho kufwa,
miezi yao ariyopangirwa ndiphosira?
22 Kuna mutu ndiyemfundza Mlungu marifwa?
iye ndiye ahukumuye hata nyo ario dzulu.
23 Mutu mmwenga nkufwa wakati achere na nguvuze,
achere na raha na salama,
24 wakati mwiriwe unanyinyiha,
na mifuphaye ichere na mafuha.
25 Wanjina nkufwa na fundo ra moyo,
wakati bado kadzangbwetata manono gogosi.
26 Osi nkulala mtsangani
na kubwiningizwa ni mabulu.
 
27 Lola, ninamanya maazo genu,
na mipango yenu ya kunihendera mai.
28 Mana munaamba, ‘Yo nyumba ya ye mkpwulu i kuphi?
Ga kuphi go mahema ambago kala gachikala atu ayi?’
29 Kpwani tamudzangbweuza acharo?
Na tamudzangbwekubali ushuhuda wao,
30 kukala atu ayi andarichwa wakati wa mafwa
na kutivywa siku ya tsukizi za Mlungu.
31 Ni ani ndiyemuambira uyiwe chingʼangʼa,
au kumripha kpwa go mai arigohenda?
32 Wakati anaphotsukulwa kuphirikpwa mbirani,
mbiraye nkuikirwa arindzi.
33 Atu anji nkuphiya ko mbirani,
anjina nkutanguliya jeneza, anjina nkurilunga nyuma
na yo mitsanga ya mbira nkumuhamira.
34 Kpwa hivyo mundaniphozadze marenda na maneno gasigo na mana?
Majibu genu tagana kpweli, ni handzo tu.”