22
Elifazi anaamba
uyi wa Ayubu ni mkpwulu
uyi wa Ayubu ni mkpwulu
1 Phahi Elifazi, Mtemani wajibu achiamba,
2 22:2–3 Ayubu 35:6–8“Dze, mwanadamu anafwaida yani kpwa Mlungu?
Kpwa kpweli mutu wa ikima nkudzifwaidi mwenye.
3 Ko kukala u wa haki, kunamfwahani ye Mwenye Nguvu Zosi?
Na andaphahani uchihenda njirazo zikale bila lawama?
4 Dze, Mlungu anakudemurira na kukuamula
kpwa kukala unamuogopha?
5 Nyo uyio ni mkpwulu,
na dambizo tazina mwisho!
6 Uwe wadai madeni kula kpwa nduguzo,
na uchiafuta nguwo zao zikale mzamana, nawe uchiaricha chitsaha.
7 Kuaphere madzi aho ariokala akaremwa,
na ariokala na ndzala uchialafya chakurya.
8 Uwe wahumira uwezoo kuhenda yo tsi ikale yako,
ta vivi unaishi mumo.
9 Uwe warema kuterya magungu,
na uchionera anachiya.
10 Kpwa hivyo mihambo ikakuzunguluka,
na ukagbwirwa ni chiwewe gafula,
11 mwangao ukakala jiza hata vino kuona,
na mafuriko gakakubwiningiza.
12 Si Mlungu a dzulu mlunguni?
Hebu lola zo nyenyezi zirivyo dzulu sana!
13 Ela we ukuamba, ‘Mlungu anamanya utu wani?
Dze, anaweza kuamula kahi ya chilungulungu cha jiza?
14 Akazibwa ni maingu maziho hata kahuona,
iye ananyendeka ko dzulu mlunguni.’
15 Dze, undalunga yo njira ya kare
ambayo yalungbwa ni atu ayi?
16 Aho ahalwa kabila ya wakati wao kufika,
misingi yao yatsimbwa ni mafuriko.
17 Amuamba Mlungu, ‘Huukire hipha,’
na ‘Ye Mwenye Nguvu Zosi anaweza kuhuhenderani?’
18 Dzagbwe ni iye ariyeodzaza nyumba zao na vitu vinono,
ela mashauri ga atu ayi ga kure nami.
19 Enye haki nkuhamirwa aonapho atu ayi anatiywa adabu,
na nyo asio na lawama nkuabera na kuamba,
20 ‘Kpwa kpweli maadui gehu gakaangamizwa,
na go arigosaza gakaphya na moho.’
21 Kubaliana na Mlungu, ili ukale na amani,
kpwa njira iyo uongokerwe.
22 Kubali malagizo kula mwakpwe kanwani,
na uike manenoge mwako moyoni.
23 Uchimuuyira ye Mwenye Nguvu Zosi, uchigbwa maguluni,
na kuusa gasigokala ga haki kure na hemaro,
24 uchiika zahabuyo mtsangani,
na zahabu kula Ofiri kahi-kahi za mawe ga myuhoni,
25 na ichikala ye Mwenye Nguvu Zosi ndiye yo zahabuyo,
na fezayo ya samani,
26 phahi undahererwa ndani ya iye Mwenye Nguvu Zosi,
na kuunula usoo kpwa Mlungu.
27 Undamvoya naye andakusikira,
nawe undausa hatizo.
28 Chila ndichoamuwa kuchihenda chindaongokerwa,
na mwanga undangʼarira njirazo.
29 Mana Mlungu nkuatsereza enye kudzikarya,
ela nkutivya anaodzitsereza.
30 Nkumuokola iye asiye na lawama,
iye andakutivya kpwa kukala mikonoyo ni miswafi.”