26
Ayubu anatogola ukulu wa Mlungu
1 Ndipho Ayubu achijibu achiamba,
2 “Uwe ukaniterya mimi nisiye na uwezo!
Uwe ukanitivya mimi mnyonje!
3 Ukanipha ushauri mnono mimi nisiye na ikima,
na kunishirikisha ujuzi munji urio nao!
4 Ni ani ariye kuterya kugomba maneno gano,
na ni roho ya ani ichiyohumira kanwayo kugomba?
5 Roho za aho ariofwa zinakakama,
zo zisagalazo tsini ya madzi.
6 Kuzimu ku laza mbere za Mlungu,
na Abadoni* 26:6 Abadoni manaye ni ubanangi. Ni dzina ranjina ra kuzimu. taina mfwiniko wowosi.
7 Iye anakudula vurini dzulu ya phatu phasipho na chitu,
na anagbwadzika dunia dzulu ya phatu phasipho na chitu.
8 Iye nkufunga madzi ndani ya mainguge maziho,
na maingu tagaahuka kpwa uzihowe.
9 Nkubwiningiza uso wa mwezi wa dzungo,† 26:9 Tafusiri zanjina zinaamba anabwiningiza uso wa chihiche cha endzi.
kpwa kuutandazira ingure.
10 Iye waika mwisho wa matso dzulu ya uso wa madzi,
nao unaonekana dza mviringo uzungulukao dunia,
phapho ndipho phenye mphaka wa mwanga na jiza.
11 Nguzo za mlunguni nkukakama,
na kuangalala kpwa kudemurirwa ni Mlungu.
12 Kpwa uwezowe wahuriza bahari,
na kpwa kuelewakpwe wamkata Rahabu vipande-vipande.
13 Kpwa msehowe ko mlunguni kpwakala kpwereru,
mkpwonowe wadunga yo nyoka iriyokala inachimbira.
14 Lola, ihi ni miphaka ya njiraze,
naswi hunasikira vichache kumuhusu!
Ni ani awezaye kuchielewa chiguruguru cha uwezowe?”