27
Ayubu anaamba
andaenderera kukala muaminifu
andaenderera kukala muaminifu
1 Ayubu waenderera kugomba achiamba,
2 “Kpwa kpweli dza Mlungu aishivyo, iye ariyeniusira haki yangu,
iye Mwenye Nguvu Zosi ariyehenda roho yangu ikale na sonono,
3 wakati wosi ndiokala moyo
na pumuzi ya Mlungu ndiphokala mwangu pulani,
4 madomo gangu tagandagomba uyi,
na lilimi rangu tarindagomba handzo.
5 Vino niambe kukala mwimwi mu sawa, hata!
Mimi nindaamba sina makosa hata nifwe vivyo.
6 Nindagbwiririra haki yangu, nami sindaitsuhula,
Sindadziona mkosa siku zosi za maisha gangu.
7 Richa adui wangu akale dza ye mui,
na iye aunukaye chinyume changu akale dza asiye na haki.
8 Kpwani ana kuluphiro rani ye asiyemuogopha Mlungu wakati rohoye inatuluzwa,
wakati Mlungu anahala uzimawe?
9 Dze, Mlungu andaphundza chiriroche,
wakati anatsupira mashaka?
10 Dze, andahamirwa ni iye Mwenye Nguvu Zosi?
Dze, andamuiha Mlungu wakati wosi?
11 Richa nikufundze kuhusu uwezo wa Mlungu,
sindafwitsa njira za iye Mwenye Nguvu Zosi.
12 Lolani, mwi enye mkadzionera,
mbona vino mnagomba maneno gasigo na mana?
13 Uhu ni mtalo wa mutu mui apangirwao ni Mlungu,
na urisi ambao atu makatili nkuphaha kula kpwa iye Mwenye nguvu Zosi.
14 Anae achikala anji mwisho wao ni upanga,
chisha chivyaziche tachindakala na chakurya cha kukola.
15 Hara ndiotiya, andaolagbwa ni ukongo mui,
na magungu gao tagandaaririra.
16 Dzagbwe anakusanya feza dza vumbi,
na kudziikira nguwo nyinji dza ndulu ya ulongo,
17 iye andaikusanya ndulu, ela a haki andazihumira,
na asio na lawama andaganya zo feza.
18 Nyumba adzengayo ni dza muhambo wa dzwidzwidzwi,
dza chibanda chodzengbwa ni mrindzi.
19 Atu ayi nkulala matajiri,
ela angʼazapho matso, utajiri wao taupho.
20 Vitu vya kuogofya vindamwedzera dza mafuriko,
usiku chikulukulu nkumuhala.
21 Phuto kula mlairo wa dzuwa nkuphepherusa kula phakpwe kaya,
nao taapho tsona.
22 Nkumpiga bila ya mbazi,
wakati anajeza kuchimbira nguvuze.
23 Phuto nkuazemerera wakati anazola,
na kuatishira kpwa nguvuze za kubananga.