1 ދާއޫދުގެފާނުގެ އަބްޝާލޫމް ކިޔާ ދަރިކަލަކު ހުންނެވިއެވެ. އެ ދަރިކަލުންގެ އަންހެން ކޮއްކޮގެ ނަމަކީ ތާމާރު އެވެ. ތާމާރު އަކީ ވަރަށް ރީތި އަންހެން ކުއްޖެކެވެ.

އަދި ދާއޫދުގެފާނުގެ ބޭފުޅުންގެ ތެރޭގައި އަމްނޫންއޭ ކިޔާ ފިރިހެން ދަރިކަލަކުވެސް ހުއްޓެވެ. އަމްނޫން އޭނާގެ އެއްބަފާ އަންހެން ކޮއްކޮ ތާމާރުއާ ހިތާވެއްޖެއެވެ. 2 އޭރު ތާމާރު އަކީ ބިކުރުވެރި ކުއްޖެކެވެ. އަމްނޫން ހުންނަނީ އެކުއްޖާ އާހެދި މޮޔަވެފައެވެ. މިކަމާހެދި އޭނާ ބަލިވެއްޖެއެވެ. އަދި އޭނާއަކަށް އެކުއްޖާއާއެކު އެކަހެރިކޮށް ބައްދަލު ކުރެވޭނެ ކަމުގެ އުންމީދެއް ނެތެވެ.

3 އަމްނޫނުގެ ރައްޓެއްސަކަށް ޔޫނަދަބު ކިޔާ މީހަކު ހުއްޓެވެ. އޭނާއަކީ ދާއޫދުގެފާނުގެ ބޭބެ ޝިމްޢީގެ ދަރިއެކެވެ. ޔޫނާދާބު އަކީ ވަރަށް ހިޔަޅު ބުއްދި ހުންނަ މީހެކެވެ. 4 ޔޫނާދާބު އަމްނޫން ގާތު ބުންޏެވެ. ”ކަލޭ ދުވަހެއް ދުވަހަކަށް ތިޔަ ދަނީ ހުލިވެ ހުސްވަމުން. ކަލޭތީ ރަސްގެފާނުގެ ދަރިކަލެއް. ތިހެން އޮވެ ހުލިވަމުން ތިޔަ ދަނީ ކީއްވެތަ؟“

އަމްނޫން ޔޫނާދާބުގާތު ބުންޏެވެ. ”އެއީ އަހަރެން ތާމާރު ދެކެ ލޯބިވާ ވަރުން ވެގެން އުޅޭ ގޮތެއް. އެކަމަކު ތާމާރު އެއީ އަހަރެންގެ އެއްބަފާ އަބީޝަލޫމުގެ ކޮއްކޮއެއް.“

5 ޔޫނާދާބު އަމްނޫނުގެ ގާތު ބުންޏެވެ. ”ކަލޭ ބަލިވެގެން ކަމަށް ހަދައިގެން އެނދަށް އަރާ އޮށޯވެ އޮވޭ. ކަލޭގެ ބައްޕާފުޅު ވަޑައިގަތީމާ ދަންނަވާ، ކޮއްކޮ ތާމާރު ލައްވައި ކާން ހައްދާ ދޭށޭ. ކަލޭ އޭނާ ކައްކާތަން ބަލަން ބޭނުމޭ، އަދި އޭނާގެ އަތުންލަވާ ދީނީމާ ތިމަން ގަދަވެދާނެޔޭ.“

6 އެހެންވެ އަމްނޫން ބަލިވެ ކަމަށް ހެދިގެން އެނދުގައި އޮށޯވެއްޖެއެވެ. ދާއޫދު ރަސްގެފާނު އަމްނޫނަށް ގޮވާލަން ވަޑައިގަތުމުން އޭނާ އެކަލޭގެފާނަށް ދެންނެވިއެވެ. ”އަޅުގަނޑުގެ ކޮއްކޮ ތާމާރު އައުމުގެ ހުއްދަ ދެއްވާ. އަދި އޭނާ ލައްވާ ދެ ކޭކު އަޅުއްވައި ދެއްވާ. އޭނާ އަޅުގަނޑު ބަލަން އޮއްވައި ކޭކު ފިހުނީމާ އޭނާގެ އަތުން އަޅުގަނޑު އެ ކޭކު ކައިފާނަން.“

7 ދެން ދާއޫދުގެފާނު ތާމާރުގެ ގެޔަށް މީހަކު ފޮނުއްވައިފިއެވެ. އެމީހާ ގޮސް ތާމާރު ގާތު ބުންޏެވެ. ”ކަލޭގެ ބޭބެ އަމްނޫނުގެ ގެޔަށް ގޮސް އޭނާއަށް ކާއެއްޗެއް ތައްޔާރު ކޮށްދީ.“

8 އެހެންވެ ތާމާރު އޭނާގެ ބޭބެ އަމްނޫނުގެއަށް އަތުވެއްޖެއެވެ. އޭރު އަމްނޫން އޮތީ އެނދުގައެވެ. ތާމާރު އޭނާގެ އަތުން ފުށްމޮޑެ ކޭކު އަޅާތަން ބަލަން އޮތެވެ.

9 ދެން ތާމާރު ކޭކު ތަވައިން ނަގައި އަމްނޫނަށް ކާން ހަދައި ދިނެވެ. އެކަމަކު އަމްނޫނެއް ނުކެއެވެ. އަމްނޫން އޭނާގެ ޚާދިމުންނަށް އަމުރު ކުރިއެވެ. ”ކަލޭމެން ބޭރަށްދޭ.“ އެހެންވެ އެމީހުން އެތަނުން ނުކުމެގެން ހިނގައްޖެއެވެ.

10 ދެން އަމްނޫން ތާމާރު ގާތު ބުންޏެވެ. ”ކާއެއްޗެހި ހިފައިގެން މި ކޮޓަރިއަށް އާދޭ. އައިސް ކަލޭ އަތުން އަހަންނަށް ކާންދީ.“

އެހެންވެ ތާމާރު ތައްޔާރު ކުރި ކޭކުތައް ހިފައިގެން އޭނާގެ ބޭބެ ނިދާ ކޮޓަރިއަށް އަތުވެއްޖެއެވެ. 11 އޭނާ އަމްނޫނަށް ކާންދޭން ފެށިތަނާ އޭނާ ތާމާރުގެ އަތުގައި ހިފަހައްޓައިފިއެވެ. އަދި ބުންޏެވެ. ”ކޮއްކޯ! އާދޭ އަހަންނާއެކު އެއްދާން ކުރަން.“

12 ތާމާރު ބުންޏެވެ. ”ނޫން ބޭބޭ! ތިޔަކަންތައް ކުރަން އަހަންނަށް މަޖުބޫރު ނުކުރޭ. ތިޔަ ފަދަ ލަދު ހުތުރު ކަންތައް ނުކުރޭ. އިސްރާއީލްގައި ތިޔަފަދަ ވިޔާ ނުދާ ކަމެއް ކޮށްގެން ނުވާނެ. 13 އޭރަކުން އަހަރެންނަކަށް މި ލަދަކުން ދުވަހަކުވެސް ސަލާމަތެއް ނުވެވޭނެ. އަދި ބޭބެއަކީ ވަރަށް ނުބައި ދަށުދަރަޖައިގެ މޮޔައެއްކަމަށް މީހުން ދެކޭނެ. ބައްޕާފުޅަށް ދެންނެވީމާ އަހަރެމެން ދެމީހުން ކައިވެނި ކުރަން ހުއްދަ ދެއްވާވެސް ފާނެ.“

14 އެކަމަކު އަމްނޫން ތާމާރުގެ ބަހެއް ނޭހިއެވެ. އޭނާ ތާމާރަށް ވުރެން ބާރުގަދައެވެ. އެހެންކަމުން އޭނާ ތާމާރާއެކު ގަދަކަމުން ޖިންސީ ގުޅުން ހިންގައިފިއެވެ.

15 ދެން ކުއްލިއަކަށް އަމްނޫން ތާމާރު ދެކެ ވަރަށްބޮޑަށް ފޫހިވެއްޖެއެވެ. އޭނާ ތާމާރު ދެކެ ކުރީގައި ލޯބިވީހާ ބޮޑަށް މިހާރު އޭނާ ދެކެ ނަފްރަތު ވެއްޖެއެވެ. އަމްނޫން ތާމާރުއާ ދިމާލަށް ބުންޏެވެ. ”މިތަނުން ނުކުމެ ރައްކާވޭ!“

16 ތާމާރު އަމްނޫގެ ގާތު ބުންޏެވެ. ”ތިޔަހެން ނުހަދާ! އަހަރެން ތިޔަ ގޮތަށް ފޮނުވާނުލާ. އޭރުން އެކުރެވެނީ ތިޔަ ކުރި ފާފައަށް ވުރެން ބޮޑު ފާފައެއް.“ * 13‏:16 ތައުރާތުގައި ވާގޮތުގައި އަންހެނެއްގެ އިއްފަތްތެރިކަން ގެއްލުވާލާ މީހާ އެއަންހެނާއާ އިންނަން ޖެހެއެވެ. އެއީ އިއްފަތްތެރިކަން ގެއްލިފައިވާ އަންހެނަކާ އެދުވަސްވަރު އެއްވެސް ފިރިހެނަކު ކާވެންޏެއް ނުކުރާނެތީ އެވެ.

އެކަމަކު އަމްނޫން ތާމާރުގެ އާދޭހެއް އަޑެއް ނޭހިއެވެ. 17 އަމްނޫން އޭނާގެ ޚާދިމަށް ގޮވާފައި އެންގިއެވެ. ”މި އަންހެނާ އަހަރެންގެ ކޮޓަރިން ބޭރަށް ނެރެ ދޮރު ތަޅުލާ!“

18 އެހެންވެ އަމްނޫނުގެ ޚާދިމު އައިސް ތާމާރު އެކޮޓަރިން ނެރެފައި ދޮރު ތަޅުލައިފިއެވެ. ތާމާރު ހުރީ އަތްދިގު ހެދުމެއް ލާފައެވެ. އެއީ ރަސްގެފާނުގެ ބިކުރުވެރި އަންހެންކުދިން ލައި އުޅޭ ހެދުމެކެވެ. 19 ތާމާރު އެ ހެދުން ވީދާލައި ބޮލަށް އަޅިއަޅައި ދެއަތުން މޫނުފޮރުވައިގެން ރޮމުން ރޮމުން ހިނގައްޖެއެވެ.

20 ތާމާރު ދިއުމުން އޭނާގެ ބޭބޭ އަބްޝާލޫމް އޭނާ ކުރެން އެއްސެވެ. ”ކަލޭގެ ބޭބެ ކަލެއަށް ކުރީ ކީތް؟ އޭނާ ކަލޭގެ ގަޔަށް އެރީތަ؟ ދެން ކޮއްކޯ! ތިޔަ ވާހަކަ ނުދައްކާތި. އަމްނޫންއަކީ އަހަރެމެންގެ ބޭބެއެއް. އެހެންވީމާ ތިކަންތައް ދެން މާ ބޮޑުކަމަކަށް ނަހަދާ!“

ދެން އޭނާގެ ބޭބެ އަބްޝާލޫމްގެ ގޭގައި އުޅެން ފަށައިފިއެވެ. އޭނާ އުޅެމުން ދިޔައީ ހުސްހަށިބައިކަންމަތީ ނުހަނު ހިތްދަތިކަމާއެކުގައެވެ.

21 ދާއޫދު ރަސްގެފާނަށް މި ޚަބަރު ލިބިގެން ވަރަށް ކޯފާވެއްޖެއެވެ. 22 އަދި މިކަމާ އަބްޝާލޫމް އޭނާގެ ބޭބެ އަމްނޫން ދެކެ ވަރަށް ނަފްރަތު ވެއްޖެއެވެ. އޭގެފަހަކުން އޭނާ ރަނގަޅަކަށް ވެސް ނުބަޔަކަށް ވެސް އަމްނޫންއާ އަނގަޔަކުން ނުބުނެއެވެ. އަބްޝާލޫމް މިހާވަރަށް މި ނަފުރަތުވީ އަމްނޫން އޭނާގެ ކޮއްކޮގެ އިތްފަތް ނަގާލައި އަގުވައްޓާލީމައެވެ.

23 އޭގެ ދެއަހަރު ފަހުން އަބްޝާލޫމްގެ ކަންބަޅިތަކުގެ ކެހެރިކޮށަން އޭނާގެ ޚާދިމުން އަފްރާއީމުގެ ކައިރީގައި އޮންނަ ބަޢަލް ހާސޫރުގައި ތިއްބެވެ. އަބްޝާލޫމް ރަސްގެފާނުގެ އެންމެހާ ދަރިކަލުންނަށް އެރަށަށް ވަޑައިގަތުމަށް ދައުވަތު ދެއްވިއެވެ. 24 އޭނާ ރަސްގެފާނު އަރިހަށް އައިސް ދެންނެވިއެވެ. ”އަޅުގަނޑުގެ ކަންބަޅި ކެހެރި ކޮށަން ބަޔަކު އެބައާދޭ. އިއްޒަތްތެރި މަނިކުފާނުގެ އެންމެހައި އަރިހުބޭކަލުން ޚާދިމުން ގޮވައިގެން އެ ޙަފުލާއަށް ވަޑައިގެން ދެއްވާ.“

25 ދާއޫދު ރަސްގެފާނު އަބްޝާލޫމަށް ވިދާޅުވިއެވެ. ”ނޫން ދަރިފުޅާ! އަހަރެމެން އެންމެން ގޮސްގެން ކަމަކު ނުދާނެ. އޭރުން އެކަން ވާނީ ކަލެއަށް ވަރަށް ބޮޑު ތަކުލީފަކަށް.“

އަބްޝާލޫމް އެތައް ވަރަކަށް ދެންނެވީމަ ވެސް ދާއޫދުގެފާނު ވަޑައިގަންނަވާކަށް އެއްބަސްފުޅެއް ނުވިއެވެ. އެކަމަކު އެކަލޭގެފާނު އޭނާއަށް ހެޔޮ އެދިވަޑައިގެންނެވިއެވެ.

26 އަބްޝާލޫމް ދެންނެވިއެވެ. ”ކަލޭގެފާނު ވަޑައިނުގަންނަވަންޏާ އަޅުގަނޑުގެ ބޭބެ އަމްނޫން އަޅުގަނޑާއެކު ފޮނުއްވާ.“

ދާއޫދު ރަސްގެފާނު އަބްޝާލޫމް ކުރެން އެއްސެވިއެވެ. ”އޭނާ ގެންދަން ކަލޭ ތިޔަ އުޅެނީ ކީއްކުރަން؟“

27 އެންމެފަހުން އަބްޝާލޫމް އެތައް ވަރަކަށް ދަންނަވައިގެން ރަސްގެފާނު އެކަލޭގެފާނުގެ އެހެން ދަރިކަލުންތަކަކާއެކު އަމްނޫން ވެސް ދިއުމުގެ ހުއްދަ ދެއްވައިފިއެވެ.

28 ދެން އަބްޝާލޫމް އޭނާގެ ޚާދިމުންނަށް އެންގިއެވެ. ”ހުޝިޔާރުވެ އަމްނޫނަށް ބަލަންތިބޭތި. އޭނާ މަސްތުވީމާ އަހަރެން އަންގާލާނަން. ދެން ކަލޭމެން ގޮސް އަމްނޫނަށް ހަމަލަދީ މަރާލާ. ކަލޭމެން ކުރަނީ އަހަރެން އެންގި ކަމެއް. ކަލޭމެންނަށް އެކަމުގެ އަދަބު ލިބިދާނެތީ ބިރެއް ގަންނާނެ ކަމެއްނެތް. ހިތްވަރުގަދަ ފަހުލަވާނުންގެ ގޮތުގައި ކަންތައް ކުރޭ!“

29 އެހެންކަމުން އަބްޝާލޫމް އެންގިގޮތަށް އޭނާގެ މީހުން ގޮސް ކަންތައް ކޮށްފިއެވެ. އެމީހުން އަމްނޫން މަރާލައިފިއެވެ. ދާއޫދުގެފާނުގެ އެހެން ދަރިކަލުންތައް އަވަހަށް ބަޣަލު† 13‏:29 ބަޣަލު އަހާއި ހިމާރު ގުޅުން ހިންގައިގެން ލިބޭ ދަރިއެއްތަކުގެ މައްޗަށް ސަވާރުވެ އެތަނުން ފިލައިގެން ހިނގައްޖެއެވެ.

30 އެބޭފުޅުންނަށް ގެޔަށް ވަޑައި ނުގެންނެވެނީސް ކަންތައް ވީގޮތުގެ ޚަބަރު ރަސްގެފާނަށް ލިބިވަޑައިގެންފިއެވެ. ޚަބަރު އައި ގޮތަކީ، ”އަބްޝާލޫމް ރަސްގެފާނުގެ ހުރިހާ ބޭފުޅުން މަރާލައިފި. ދިރި ހުރި އެކަކުވެސް ނެތް.“ މިގޮތަށެވެ.

31 ދެން ދާއޫދު ރަސްގެފާނު ހެދުންކޮޅު ވީއްދަވައި ބިންމައްޗަށް ވެއްޓި ވަޑައިގެންފިއެވެ. ރަސްގެފާނުގެ ކާރީގައި ތިބި އަރިހުބޭކަލުން ވެސް ހެދުން ވީދައިފިއެވެ.

32 އެވަގުތު ދާއޫދުގެފާނުގެ ބޭބެ ޝިމްޢީގެ ދަރި ޔޫނާދާބު އައިސް ދެންނެވިއެވެ. ”ރަސްގެފާނުގެ ހުރިހާ ބޭފުޅުންނެއް މަރެއް ނުވޭ. މަރުވީ އަމްނޫން އެކަނި. އޭނާގެ ކޮއްކޮގެ އިއްފަތްތެރިކަން އަމްނޫން ފޭރިގަތް ދުވަހުން ފެށިގެން އަބްޝާލޫމު އައީ އަމްނޫނުގެ ކިބައިން ބަދަލު ހިފަން ރާވަމުން. 33 އަޅުގަނޑުގެ މަސާހިބު، ރަސްގެފާނު! އެއްގޮތަކަށްވެސް ހީފުޅު ނުކުރައްވާ ކަލޭގެފާނުގެ ހުރިހާ ބޭފުޅުން އަވަހާރަވެއްޖެޔޭ. އަވަހާރަވީ އަމްނޫން އެކަނި.“

34 ދެން އަބްޝާލޫމް ފިލައިފިއެވެ.

އެވަގުތު ސަހަރުގެ ދޮރުމަތީގައި ހުރި ދޮރުވާނަށް ފަރުބަދަތަކުގެ ތެރެއިން ހޫރުއަނީމާ ދިމާއިން ބައިގަނޑެއް އަންނަތަން ފެނިއްޖެއެވެ. އޭނާ ގޮސް ރަސްގެފާނުގެ އަރިހު އެވާހަކަ ދަންނަވައިފިއެވެ. 35 ދެން ޔޫނާދާބު ދާއޫދުގެފާނަށް ދަންނަވައިފިއެވެ. ”ބައްލަވާ! އަޅުގަނޑު ދެންނެވީ ހަމަ ރަނގަޅަށް ނޫންތޯ. ރަސްގެފާނުގެ ބޭފުޅުން އެތިބަ އަންނަނީނޫންތޯ.“

36 ރަސްގެފާނުގެ ބޭފުޅުން ޔޫނާދާބު ބުނިފަދައިން އަތުވެއްޖެއެވެ. އޭރު އެމީހުން ހަރުއަޑުން ރޮނީއެވެ. ދާއޫދުގެފާނާއި އަރިހުބޭކަލުން ވެސް ބާރަށް ކީރިތި ކުރައްވަނީއެވެ. 37 ދާއޫދުގެފާނު އެތައް ދުވަހެއް ވަންދެން އެކަލޭގެފާނުގެ ދަރިކަލުން އަމްނޫން މަރުވުމުގެ ހިތާމައިގައި ކީރިތި ކުރެއްވިއެވެ.

އޭރު އަބްޝާލޫމް ހުރީ ޖަޝޫރުގެ ރަސްގެފާނު، އައްމީހޫދުގެ ދަރިކަލުން ތަލްމާއީ ގާތަށް ގޮހެވެ.

38 އަބްޝާލޫމް ޖަޝޫރަށް ގޮސް ފިލައިގެން އުޅޭތާ ތިން އަހަރު ވެއްޖެއެވެ. 39 އޭރު ދާއޫދު ރަސްގެފާނަށް އަމްނޫން މަރުވުމުގެ ހިތާމަ ފިލާވަޑައިގެންފިއެވެ. އެކަމަކު އަބްޝާލޫމް ނެތުމުން އެކަމާ ހިތާމަފުޅު ކުރައްވަން ފައްޓަވައިފިއެވެ.