1 Mɑ piyɑ, mɑ ŋmɑɑ-mɛɣɛ tǝnɛ ɩnǝɣɩ sɩ pǝ́ lɑ nɑ ɩ́ tɑɑ lɑ ɩsɑɣɑtʋ. Amɑ ye pǝ tɩɩ yelɑɑ nɑ nɔɣɔlʋ lɑ ɩsɑɣɑtʋ, ɩlɛ tǝ wɛnɑ tɑ tɔm tɑɣɑnlʋ kɛ Tɑcɑɑ kiŋ. Ɩnǝɣǝlɛ Yesu Kilisiti wei ɩ kɛ́ tɑmpɑnɑ tǝŋlʋ tɔ. 2 Pǝ tɑɣɑ pʋlʋ, Yesu Kilisiti ɩnǝɣɩ pɑ lɑpɑ kɔtɑɣɑ sɩ pǝ́ tɑɣɑnɩ tɑ́ ɩsɑɣɑtʋ, nɑ pǝ tɑɣɑ tɑ́ tike tɑ́ ɩsɑɣɑtʋ, ɑmɑ nɑ yǝlɑɑ tǝnɑ tǝpɑɩ ɩsɑɣɑtʋ tɔtɔɣɔ.

3 Ye tǝ tǝŋǝɣɩ Ɩsɔ kʋheelitu ɩlɛ tɩɩ cɛkǝnɑ sɩ tɑmpɑnɑ tǝ nyǝmɑ́ Ɩsɔ. 4 Ye nɔɣɔlʋ tɔmɑ sɩ ɩ nyǝmɑ́ Ɩsɔ, nɑ pǝyele pʋntʋ ɩɩ tǝŋǝɣɩ ɩ kʋheelitu, pʋntʋ kɛ́ pɔpɔtʋ kɛ́, nɑ tɑmpɑnɑ fɛɩ ɩ kiŋ. 5 Amɑ wei ɩ tǝŋǝɣɩ Ɩsɔ kʋyɔɣɔtʋtʋ tɔ pʋntʋ sɔɔlǝnɑ Ɩsɔ nɑ tɑmpɑnɑ tǝkpɑtɑɑ. Mpi pǝ yeki nɑ tǝ nyǝŋ sɩ tɑ́ nɑ Ɩsɔ tǝ kpɛntɑɑ yɑɑ tǝ tɑ kpɛntɩ tɔɣɔlɛ. 6 Ye wei ɩ yɔɣɔtɑɑ sɩ ɩ́ nɑ Ɩsɔ pɑ kpɛntɑɑ, pʋntʋ ɩ́ tɔ tɔntɛ nte Yesu kɑ tɔmɑ tɔ.

7 Mɑ tɑɑpɑlɑɑ, pǝ tɑɣɑ kʋsǝsɩɩtʋ kʋfɑtʋ nɑtǝlǝɣɩ mɑ ŋmɑɑ tɑkǝlɑɣɑ sɩ mɑ heeliɣi-mɛ. Amɑ kʋsǝsɩɩtʋ kʋpǝntʋ nti pǝ heelɑ-mɛɣɛ hɑtuu kɑncɑɑlɑɣɑ tɔɣɔ. Nɑ kʋsǝsɩɩtʋ kʋpǝntʋ ntǝɣǝlɛ tɔm nti ɩ́ tɛmɑ nɩɩʋ tɔ. 8 Pɑɑ nɑ mpʋ pǝ wɛ ɩsɩɩ kʋsǝsɩɩtʋ kʋfɑtʋ tɔɔ kɛ́ mɑ ŋmɑɑ-mɛɣɛ tɑkǝlɑɣɑ, pǝ hʋlɑ tǝ tɑmpɑnɑ kɛ Kilisiti kiŋ nɑ mǝ kiŋ tɔtɔ. Sǝkpɛtʋɣʋ kɛɛlɑɑ nɑ tɑmpɑnɑ kɔkɔ tɛmɑ nɑʋ tǝnyɑɩɩ.

9 Ye wei ɩ yɔɣɔtǝɣɩ sɩ ɩ wɛ tǝnɑŋŋ tɑɑ nɑ pǝyele ɩ tɑɑ kpɑɑnɑ ɩ yʋlʋtʋɣʋntǝlɛ, sǝkpɛtʋɣʋ tɑ cɛtɑ pʋntʋ tɔɔ se. 10 Amɑ ye wei ɩ sɔɔlǝɣɩ ɩ yʋlʋtɔɣɔntǝlɛ, pʋntʋ wɛnnɑ tǝnɑŋŋ tɑɑ, nɑ pʋlʋ mpi pɩɩ pǝsɩ nɑ pǝ́ tusi lɛlʋ nɑ ɩ́lɛ́ ɩ́ lɑ́ ɩsɑɣɑtʋ tɔ pǝ fɛɩ ɩ kiŋ. 11 Amɑ sǝkpɛtʋɣʋ nyɑlǝnɑ wei ɩnɩ ɩ tɑɑ kpɑɑnɑ ɩ yʋlʋtɔɣɔntǝlɛ tɔ ɩ tɔɔ. Kʋ tɑɑ kɛ́ ɩ tɔŋ, ɩ tɑ cɛkǝnɑ ɩ tǝpote. Mpi tɔ, sǝkpɛtʋɣʋ yʋlʋsɑ ɩ ɩsɛ tɔ se.

12 Mɑ piyɑ, pǝ hɩɩsɑ mǝ ɩsɑɣɑtʋ kɛ Kilisiti tɔɔ tɔɣɔ mɑ ŋmɑɑ tɑkǝlɑɣɑ nɑ mɑ́ heeliɣi-mɛ. 13 Cɑɑnɑɑ mɛ mǝ nyǝmnɑ wei ɩ kɑ wɛ hɑtuu kɑncɑɑlɑɣɑ tɔ, pǝ tɔɔ kɛ́ mɑ ŋmɑɑ tɑkǝlɑɣɑ sɩ mɑ́ heeliɣi-mɛ. Ɩfepiyɑ mɛ, mǝ kǝlɑ Ɩsɑɣɑʋ tɔɣɔ mɑ ŋmɑɑ tɑkǝlɑɣɑ sɩ mɑ́ heeliɣi-mɛ.

14 Piyɑ, mǝ nyǝmɑ́ Tɑcɑɑ tɔɣɔ mɑ ŋmɑɑ tɑkǝlɑɣɑ nɑ mɑ́ heeliɣi-mɛ. Cɑɑnɑɑ mɛ, mǝ nyǝmɑ́ wei ɩ kɑ wɛ hɑtuu pǝ kɑncɑɑlɑɣɑ tɔ, pǝ tɔɔ kɛ́ mɑ ŋmɑɑ tɑkǝlɑɣɑ nɑ mɑ́ heeliɣi-mɛ. Ɩfepiyɑ, mǝ wɛnnɑ tomɑ, nɑ Ɩsɔ Tɔm cɑkɩ mǝ tɑɑ, nɑ ɩ́ kǝlɑ Ɩsɑɣɑʋ, pǝ tɔɔ kɛ́ mɑ ŋmɑɑ-mɛɣɛ tɑkǝlɑɣɑ.

15 Ɩ́ tɑɑ sɔɔlɩ ɑntulinyɑ, pɑɑ mpi pǝ tɩɩ kɛ́ ɑntulinyɑ nyǝm mɑɣɑmɑɣɑ tɔ, ɩ́ tɑɑ sɔɔlɩ. Ye nɔɣɔlʋ sɔɔlɑ ɑntulinyɑ, pʋntʋ tɑ sɔɔlɩ Tɑcɑɑ tɔtɔ. 16 Pǝ tǝnɑ mpi pǝ kɛ́ ɑntulinyɑ nyǝm tɔɣɔlɔ, yʋlʋtɔnʋɣʋ kʋnyɩɩlǝŋ ɩsɑɣɑŋ, nɑ yʋlʋ nɑɑkʋɣʋ pʋlʋ nɑ pǝ ɩsǝsɛɛmlɛ kpɑɩ́ tɔ, pǝ tɑɣɑ Tɑcɑɑ kiŋ kɛ pǝ lɩɩnɑɑ. 17 Antulinyɑ nɑ pǝ tǝnɑ mpi yǝlɑɑ nɑɑkɩ ɩ tɑɑ nɑ pɑ́ nyɩɩlǝɣɩ tɔ pǝ tɔŋnɑ tɛm kɛ́. Amɑ wei ɩ lɑkɩ Ɩsɔ luɣu nyǝntʋ tɔ pʋntʋ cɑkǝnɑ tɑm.

18 Mɑ piyɑ, ɑntulinyɑ tɛm wʋsɑɑ kɛ́. Ɩ́ tɛmɑ nɩɩʋ sɩ Kilisiti kolontu kɑ lɩɩ. Tɔʋ, kɑɣɑnɑ ɩ kolontunɑɑ mpɛ pɑ lɩɩ pɑɣɑlɛ kɛ́ tǝnyɔɔ. Pǝ tɔɔ kɛ́ tǝ nyǝmnɑɑ sɩ pǝ wʋsɑ tɛm kɛ́. 19 Yǝlɑɑ pɑnɛ pɑ tɑɑ kɛ́ tɑ nyǝ́mɑ nɑ tɑmpɑnɑ se, pǝ tɔɔ kɛ́ pɑ lɩɩ tɑ́ tɑɑ. Ḿpʋ́ɣʋ́ mɛɛ, ye pɑɑ kɛ́ tɑ́ nyǝ́mɑ, pɑ tɑɑ lɩɩ tɑ́ tɑɑ se. Amɑ pɑ lɩɩ tɑ tɑɑ kɛ́ sɩ pǝ́ hʋ́lɩ́ teu sɩ pɑ tɑɑ nɔɣɔlʋ tɑɑ kɛ́ tɑ́ nyǝŋ nɑ tɑmpɑnɑ.

20 Ye mɛ ɩlɛ Feesuɣu Nɑŋŋtʋ wei Kilisiti tisɑ pɑɑ mǝ tɑɑ wei ɩ tɔɔ tɔ ɩnǝɣɩ ɩ́ hikɑɑ, nɑ mpʋ pǝ yelinɑ mǝ tǝnɑ ɩ́ nyǝmɑ́ tɑmpɑnɑ. 21 Ye mpʋ pǝ tɑɣɑ ɩsɩɩ ɩ́ tɑ́ nyɩ tɑmpɑnɑ tɔɣɔ mɑ ŋmɑɑ-mɛ sɩ mɑ́ heeliɣi-mɛ. Amɑ ɩsɩɩ ɩ́ nyǝmɑ-yɛ, nɑ ɩ́ nyǝmɑ́ tɔtɔ sɩ pɔpɔtʋ nɑtǝlɩ tǝ fɛɩ tɑmpɑnɑ tɑɑ tɔ pǝ tɔɔ kɛ́.

22 Aweɣelɛ pɔpɔtʋ ɩlɛ? Wei ɩ yɔɣɔtǝɣɩ tǝfoo sɩ Yesu tɑ́ kɛ́ Kilisiti tɔ pʋntʋ ntɛ́ pɔpɔtʋ. Nɑ ɩnǝɣǝlɛ Kilisiti kolontu. Pʋntʋ kpɛŋnɑ Tɑcɑɑ nɑ ɩ Pǝyɑɣɑ kɛ́ nɑ ɩ́ kisi. 23 Ḿpʋ́ɣʋ́ mɛɛ, ye wei ɩ́ kisɑ Pǝyɑɣɑ, pʋntʋ kisɑ Tɑcɑɑ tɔtɔɣɔ. Nɑ ye wei ɩ́ nyǝmɑ́ Pǝyɑɣɑ, pʋntʋ nyǝmɑ́ Tɑcɑɑ tɔtɔɣɔ.

24 Pǝ tɔɔ kɛ́ ɩ́ kɑ́ lɑ kookɑlɩ nɑ ɩ́ tɔkɩ tɔm nti ɩ nɩɩ hɑtuu kɑncɑɑlɑɣɑ tɔɣɔ mǝ tɑɑ kɛ́ teu. Ye ɩ tɔkɑ wenti ɩ́ nɩɩ kɑncɑɑlɑɣɑ tɔɣɔ mǝ tɑɑ ɩlɛ mǝ nɑ Pǝyɑɣɑ nɑ Tɑcɑɑ ɩ́ kɑ́ kpɛntɩ nɑ ɩ́ cɑɣɑ mpʋ. 25 Kilisiti tɔmɑ sɩ ɩ kɑ́ hɑ-tʋɣʋ mpi tɔɣɔlɛ weesuɣu ŋku kʋ kɑɑ tɛ́ tɔ.

26 Mpɑ pɑ pɛɛkǝɣɩ sɩ pɑ́ puɣusi-mɛ tɔ, pɑ tɔɔ kɛ́ mɑ ŋmɑɑ-mɛɣɛ tǝnɛ ɩnɩ sɩ mɑ́ heeliɣi-mɛ. 27 Ye mɛ ɩlɛ Kilisiti tisɑ ɩ Feesuɣu kɛ mǝ tɔɔ kɛ́. Nɑ ɩ Feesuɣu wɛʋ mǝ kiŋ tɔ nɔɣɔlʋ ɩɩ nɔkǝɣɩ-mɛɣɛ nɑtǝlǝɣɩ hʋ́lʋ́ɣʋ́ tɔtɔ. Feesuɣu hʋlǝɣǝnɑ-mɛɣɛ pǝ tǝnɑ nɑ tɑmpɑnɑ kɛ kʋ sɛɣɛsǝɣɩ, kɩɩ sɛɣɛsǝɣɩ pɔpɔtʋ. Pǝ tɔɔ ɩlɛ ɩ́ tǝŋ Feesuɣu kʋsɛɣɛsǝtʋ nɑ mǝ nɑ Kilisiti ɩ́ kpɛntɩ mpʋ.

28 Nn mɑ piyɑ, mǝ nɑ Kilisiti ɩ́ kpɛntɩ nɑ ɩ́ cɑɣɑ mpʋ, nɑ tɩɩ tʋ-ɩ nɑɑni kɛ́ wɑɑtʋ wei ɩ kɑ lɩɩ tɔ, tǝ kɑɑ kuu fɛɛlɛ kɛ ɩ ɩsɛntɑɑ kɛ́ kʋyɑŋku ɩ kɑ́ kɔɔ tɔ. 29 Ɩ́ nyǝmɑ́ teu sɩ siɣisuɣu kɛ Kilisiti nɑ́ tǝŋǝɣɩ, mpʋ tɔtɔɣɔ ɩ́ kɑ́ nyɩ sɩ yǝlɑɑ tǝnɑ mpɑ pɑ tǝŋǝɣɩ siɣisuɣu tɔ pɑ kɛ́ Ɩsɔ piyɑ kɛ́.