AWULAA
TƆM TAKƎLAƔA NAALƐ NYƎŊKA
Kʋtʋlʋtʋ
Yutɑ nyǝ́mɑ nɑ Ɩsɛɣɛlɩ nyǝ́mɑ tɔm kɛ pɑ kɛɛsǝɣɩ tɑkǝlɑɣɑ kɑnɛ kɑ tɑɑ. Pɑ kɛɛsǝɣɩ kɑ tɑɑ kɛ́ ɩsǝnɑ Ɩsɔ yǝlɑɑ lɔ Ɩsɔ nɑ pɑ sʋʋ tɩɩŋ lɑɑtʋ tɑɑ tɔ. Ɩlɛnɑ Ɩsɔ nɑ́ɑ́ yele nɑ Asilii nyǝ́mɑ yoonɑ-wɛ. Kolontunɑɑ kuu pɑ yǝlɑɑ nɑ pɑ wɛnɑʋ tǝnɑ nɑ pɑ ɑcɑlɛɛ pǝsɩ ncɑɑ. Pǝ yelɑ Yutɑ nyǝ́mɑ tike ɩlɛnɑ pɛlɛ pɑ tɑɣɑnɩ lɑɑtʋ tɑɑ kɛ́ hɛlʋɣʋ tɔtɔ. Ḿpʋ́ɣʋ́ Pɑpiloni wulɑʋ nɑ kɔmɑ nɑ ɩ́ kuu pɛlɛ nɑ ɩ́ tɛɛnɑ.
Ɩsǝnɑ pɑ fɑɣɑ Awulɑɑ II tɑkǝlɑɣɑ tɔ:
Wulɑʋ Sɑlʋmɔŋ kɑwulɑɣɑ fɑɣɑʋ, titite 1–17
Yutɑ kɑwulɑɣɑ tɔm, titite 18–24
Pɑpiloni wulɑʋ yɔkʋɣʋ kɛ Yosɑlɛm Ɩsɔ tǝsɛɛlɛ, titite 25
1
Ahɑsiyɑ sǝm tɔm heeluɣu
1 Wɑɑtʋ wei Akɑpɩ sǝpɑ, ɩlɛnɑ Mowɑpʋ nyǝ́mɑ kisi sɩ Ɩsɛɣɛlɩ nyǝ́mɑ ɩ́ tɑɑ tɑsɑ kɑwulɑɣɑ tɔɣɔʋ kɛ pɑ tɔɔ.
2 Ḿpʋ́ɣʋ́ kʋyɑkʋ nɑkʋlɩ, wulɑʋ Ahɑsiyɑ lɩɩ ɩ kɑwulɑɣɑ ɑtɛ nɑ ɩsɔ kutuluɣu nyʋɣʋ tɑɑ, nɑ ɩ́ hoti nɑ pǝ́ kʋ-ɩ sɔsɔm. Ɩlɛnɑ ɩ́ tili sɩ: Ɩ́ polo ɩ́ yɑɑ Ɩkoloŋ nyǝ́mɑ tʋɣʋ Pɑɑlɩ-Sepu. Ɩ́ pɔɔsɩ-kʋ sɩ mɑɑ sɩ yɑɑ mɑɑ kʋlɩ? 3 Ntɛnɑ Tɑcɑɑ ɩsɔtɑɑ tillu nɔɣɔlʋ ɩ kʋsɩ Ilii sɩ: Polo nɑ ń pɔɔsɩ wulɑʋ tillɑɑ mpɛ sɩ, ɩsɩɩ Ɩsɛɣɛlɩ Ɩsɔ fɛɩ kɛlɛ nɑ ɩ́ puki Ɩkoloŋ nyǝ́mɑ tʋɣʋ kɛ pɔɔsʋɣʋ nɑ? 4 Pǝ tɔɔ, ɩsɩɩ wulɑʋ sǝpɑ, ɩ kɑɑ kʋlɩ.
Ɩlɛnɑ Ilii nɑ́ɑ́ polo ɩsɩɩ Tɑcɑɑ kʋsʋɣʋ-ɩ tɔ. 5 Ḿpʋ́ɣʋ́ tillɑɑ mǝlɑ kpɑkpɑɑ. Ɩlɛnɑ wulɑʋ pɔɔsɩ-wɛ sɩ: Ɩ́ mǝlɑɑ suwe? 6 Ntɛnɑ pɛlɛ sɩ: Apɑlʋ nɔɣɔlʋ ɩ kɑtǝnɑ-tʋ sɩ, tǝ́ mǝlɩ nɑ tǝ́ heeli-ŋ sɩ Tɑcɑɑ pɔɔsǝɣɩ-ŋ sɩ: Ɩsɩɩ Ɩsɛɣɛlɩ Ɩsɔ fɛɩ kɛlɛ nɑ ń puki Ɩkoloŋ nyǝ́mɑ tʋɣʋ kɛ pɔɔsʋɣʋ nɑ? Pǝ tɔɔ tɔ, ɩsɩɩ n sǝpɑ n kɑɑ kʋlɩ.
7 Kɛlɛnɑ wulɑʋ sɩ: Apɑlʋ wei ɩ heelɑ-mɛɣɛ tɔm ntɩ tɔ, ɩsǝnɑ tɔɔ kɛ́ ɩ wɛɛ?
8 Ḿpʋ́ɣʋ́ tillɑɑ mpɛ sɩ: Yooyoonɑɑ hʋntʋ toko kɛ ɩ suuwɑ, nɑ ɩ́ lǝlɑ tɑmpɑlɑ kɛ ɩ tǝnɑɣɑ tɑɑ.
Ntɛnɑ wulɑʋ mɑ kɑpukɑ sɩ: Hei, Ɩsɔ kʋyɔɣɔtʋtʋ tɛlǝsʋlʋ Ilii kɛ́.
Ahɑsiyɑ mɑɣɑsǝɣɩ sɩ ɩ́ kpɑ Ilii
9 Mpʋɣʋlɛ wulɑʋ kʋsɑ yoolɑɑ nɩɩlɛ nɑ nɑɑnʋwɑ, nɑ pɑ nyʋɣʋ tʋ sɩ: Ɩ́ kpɑ hɑtoo pʋɣʋ nyʋɣʋ tɑɑ, timpi Ilii kɑ wɛɛ tɔ, nɑ ɩ́ kpɑ-ɩ. Pɛlɛ pɑ tɑlɑ ɩ kiŋ, ɩlɛnɑ pɑ nyʋɣʋ tʋ tɔ sɩ: Ɩsɔ kʋyɔɣɔtʋtʋ tɛlǝsʋlʋ yoou, wulɑʋ sɩ ń tii lɔŋ.
10 Ntɛnɑ Ilii sɩ: Timpi mɑ kɛ́ Ɩsɔ kʋyɔɣɔtʋtʋ tɛlǝsʋlʋ tɔ, mɑ sǝlǝmǝɣɩ sɩ, kɔkɔ ɩ́ lɩɩnɑ ɩsɔtɑɑ, nɑ kɑ́ nyɑɣɑ nyɑnɑ nyɑ́ yoolɑɑ.
Ɩlɛnɑ kɔkɔ tiinɑ ɩsɔ, nɑ kɑ́ nyɑɣɑ-wɛ. 11 Ḿpʋ́ɣʋ́ wulɑʋ tɑsɑ kʋsʋɣʋ kɛ yoolɑɑ lɛlɑɑ nɩɩlɛ nɑ nɑɑnʋwɑ, nɑ pɑ nyʋɣʋ tʋ sɩ: Ɩ́ polo Ilii wɑɑlɩ. Ɩlɛnɑ nyʋɣʋ tʋ tɔmɩ-ɩ sɩ: Ɩsɔ kʋyɔɣɔtʋtʋ tɛlǝsʋlʋ yoou, wulɑʋ sɩ ń tii lɔŋ tǝcɑʋ.
12 Ntɛnɑ Ilii sɩ: Timpi mɑ kɛ́ Ɩsɔ kʋyɔɣɔtʋtʋ tɛlǝsʋlʋ tɔ, mɑ sǝlǝmǝɣɩ sɩ kɔkɔ ɩ́ lɩɩnɑ ɩsɔtɑɑ, nɑ kɑ́ nyɑɣɑ nyɑnɑ nyɑ́ yoolɑɑ.
Ɩlɛnɑ Ɩsɔ tisi kɔkɔ kɛ kpɑkpɑɑ, nɑ kɑ́ nyɑɣɑ-wɛ. 13 Ḿpʋ́ɣʋ́ wulɑʋ tɑsɑ yoolɑɑ nɩɩlɛ nɑ nɑɑnʋwɑ kʋsʋɣʋ kɛ tɔm tooso nyǝm, nɑ pɑ nyʋɣʋ tʋ. Nyʋɣʋ tʋ tɑlɑ Ilii kiŋ, ɩlɛnɑ ɩ luŋ ɑkulɑ nɑ ɩ́ wiinɑ-ɩ sɩ: Hɑɩ, Ɩsɔ kʋyɔɣɔtʋtʋ tɛlǝsʋlʋ, kenti mɑ́ nɑ mɑ yǝlɑɑ tɑ tɔɔ. 14 Mɑ nyǝmɑ́ sɩ kɔkɔ lɩɩnɑ ɩsɔtɑɑ nɑ kɑ́ nyɑɣɑ yoolɑɑ kɑncɑɑlɑɣɑ nyǝ́mɑ nɑ pɑ nyʋɣʋ nyǝ́mɑ nɑɑlɛ. Ɩlɛ hɑɩ, tɑɑ kɔnɑ tɑɣɑ mpusi ɩnɩ.
15 Ḿpʋ́ɣʋ́ Ɩsɔ ɩsɔtɑɑ tillu heelɑ Ilii sɩ: Tǝŋ-wɛ, tɑɑ nyɑ́.
Ɩlɛnɑ Ilii tǝŋ-wɛ nɑ ɩ́ tii. 16 Nɑ ɩ́ tɔ wulɑʋ sɩ: Tɑcɑɑ yɔɣɔtɑɑ sɩ, timpi n kʋsɑ tillɑɑ sɩ, pɑ́ polo pɑ́ pɔɔsɩ Ɩkoloŋ nyǝ́mɑ tʋɣʋ Pɑɑlɩ-Sepu kɛ tɔm, ɩsɩɩ Ɩsɔ fɛɩ Ɩsɛɣɛlɩ tɑɑ tɔ, n kɑɑ kʋlɩ, ɩsɩɩ n sǝpɑ.
17 Ḿpʋ́ɣʋ́ Ahɑsiyɑ sǝpɑ tɑmpɑnɑ ɩsɩɩ Tɑcɑɑ kɑ heeluɣu Ilii tɔ. Amɑ ɩ tɑɑ fɛɩnɑ ɑpɑlʋpǝyɑɣɑ. Ɩlɛnɑ ɩ neu Solɑm lɛɛtɩ ɩ lonte. Yutɑ wulɑʋ Sosɑfɑtɩ pǝyɑlʋ Solɑm kɑwulɑɣɑ pǝnɑɣɑ nɑɑlɛ nyǝŋkɑ tɑɑ kɛlɛ.
18 Pɑ kɛɛsɑ wulɑʋ Ahɑsiyɑ tɔm lɛntǝnɑɑ tǝnɑɣɑ Ɩsɛɣɛlɩ ɑwulɑɑ tɑkǝlɑɣɑ tɑɑ.