1 Wɑɑtʋ wei pǝ kɔmɑ nɑ Tɑcɑɑ kpɑɣɑ Ilii nɑ kɑcuculɑɣɑ tɔ, ɩsǝnɑ pǝ lɑpɑ tɔɣɔlɔ.

Kʋyɑkʋ nɑkʋlǝɣɩ Ilii nɑ Ilisee pɑ lɩɩ Kilikɑɑ nɑ pɑ́ tǝŋǝɣɩ tǝmɑ. 2 Pǝ kɔmɑ nɑ pǝ kɛɛsɩ ɩlɛnɑ Ilii tɔ Ilisee sɩ: Tɑcɑɑ tiliɣi-m Petɛɛlɩ. Cɑɣɑ cǝnɛ, nɑ mɑ́ kɔɔ.

Ntɛnɑ Ilisee sɩ: Mɑ tuukinɑ Tɑcɑɑ sɩ mɑ kɑɑ yele-ŋ.

Ɩlɛnɑ Ilii nɑ Ilisee pɑ́ polo Petɛɛlɩ. 3 Ḿpʋ́ɣʋ́ tǝnɑ Ɩsɔ kʋyɔɣɔtʋtʋ tɛlǝsǝlɑɑ pɔɔsɑ Ilisee sɩ: Sɑŋɑ Tɑcɑɑ kpɑkǝɣɩ nyɑ́ cɑɑ tɔ, n nyǝmɑ́ mpʋ? Ilisee sɩ: Ɛɛ, mɑ mɑɣɑmɑɣɑ mɑ nyǝmɑ́ mpʋ. Mɩɩ tɑɑ heeli-m.

4 Ḿpʋ́ɣʋ́ Ilii tɑsɑ tɔm sɩ: Tɑcɑɑ tiliɣi-m Yeliko. Ɩlɛ cɑɣɑ cǝnɛ, nɑ mɑ́ kɔɔ.

Ntɛnɑ Ilisee tuu sɩ: Mɑ tuunɑ Tɑcɑɑ sɩ, mɑ kɑɑ yele-ŋ.

Ɩlɛnɑ Ilii nɑ Ilisee pɑ tǝnɑ pɑ́ tɛɛ Yeliko. 5 Kɛlɛnɑ tǝnɑ Ɩsɔ kʋyɔɣɔtʋtʋ tɛlǝsǝlɑɑ pɔɔsɩ Ilisee sɩ: Sɑŋɑ Tɑcɑɑ kpɑkǝɣɩ nyɑ́ cɑɑ tɔ, n nyǝmɑ́ mpʋ? Ilisee sɩ: Ɛɛ, mɑ nyǝmɑ́ mpʋ. Mɩɩ tɑɑ heeli-m.

6 Ḿpʋ́ɣʋ́ Ilii tɑsɑ-ɩ heeluɣu sɩ: Tɑcɑɑ tiliɣi-m Yɑɑtɑnɩ nɔɣɔ. Cɑɣɑ cǝnɛ, nɑ mɑ́ kɔɔ.

Ntɛnɑ Ilisee tuunɑ Tɑcɑɑ sɩ: Mɑ kɑɑ yele-ŋ.

Ɩlɛnɑ Ilii nɑ Ilisee pɑ́ tɛɛ tǝnɑɣɑ pɑ tǝnɑ. 7 Ḿpʋ́ɣʋ́ Ɩsɔ kʋyɔɣɔtʋtʋ tɛlǝsǝlɑɑ ɩsɩɩ nɩɩlɛ nɑ nɑɑnʋwɑ tǝŋɑ-wɛ, nɑ pɑ́ sǝŋ tɑɑlǝm. Nɑ Ilii nɑ Ilisee pɛlɛ pɑ wɛ kʋteŋ tɔɔ. 8 Ɩlɛnɑ Ilii wɔɣɔsɩ ɩ kpɑɩ nɑ ɩ́ mɑ lʋm tɔɔ, nɑ pǝ́ hɛɛ mpɑɑʋ. Nɑ pɑ́ tɔ́ kɑnyǝŋɑ tɔɔ nɑ pɑ́ tɛsɩ.

9 Pɑ nɑɑlɛ pɑ tɛsɑɑ, ɩlɛnɑ Ilii pɔɔsɩ Ilisee sɩ: Pepeɣe n cɑɑ sɩ mɑ́ lɑ-ŋ nɑ pǝ́cɔ́ Tɑcɑɑ kpɑɣɑ-m?

Ntɛnɑ Ilisee sɩ: Mɑ cɑɑ sɩ mɑ́ hiki nyɑ́ feesuɣu tomɑ kɛ tɔm nɑɑlɛ. 10 Mpʋɣʋlɛ Ilii sɩ: Mpi pǝ wɛ kɑtɛ tɔɣɔ n sǝlǝmǝɣɩ. Pɑɑ nɑ mpʋ tɔ, ye Tɑcɑɑ yelɑɑ sɩ ń nɑ́ mɑ tǝkpɑɣɑlɛ, ɩlɛ n hikɑ mpi n sǝlǝmǝɣɩ tɔɣɔlɛ. Amɑ ye pǝ tɑɣɑ mpʋ, ɩlɛ n lɑŋɑɑ kɛlɛ.

11 Ilii nɑ Ilisee pɑ tɔŋnɑ mpʋ, ɩlɛ kɔkɔ kɛɛkɛ nɑ pǝ kpɑɣɑnǝŋ pǝ yɑsɑ-wɛɣɛlɛ. Nɑ kɑcuculɑɣɑ kpɑɣɑ Ilii kɛ kpɑkpɑɑ. 12 Ilisee nɑ́ mpʋ, ɩlɛnɑ ɩ́ sʋʋ kɑpusi mɑpʋ sɩ: Hɑɩ, mɑ cɑɑ, hɑɩ, mɑ cɑɑ. Ɩsɛɣɛlɩ kɛɛkɛ nɑ ɩ sɑɑlʋ tɛɛwɑ.

Ilii tɛɛwɑ nɑ pǝ sɑɑlɩ ɩlɛnɑ Ilisee cǝlɩ ɩ wontu kɛ tɔm nɑɑlɛ nɑ lɑŋwɑkǝllɛ. 13 Pǝ wɑɑlɩ kɛ́ ɩ kpɑɣɑ kpɑɩ wei Ilii pɛtɑ-ɩ tɔ, nɑ ɩ́ mǝlɩ nɑ ɩ́ sǝŋ Yɑɑtɑnɩ pɔɣɔ nɔɣɔ. 14 Ḿpʋ́ɣʋ́ Ilisee mɑpɑ kpɑɩ ɩnǝɣɩ lʋm tɔɔ, nɑ ɩ́ kiisi sɩ: Ilii Ɩsɔ Tɑcɑɑ wɛ le?

Ɩlɛnɑ lʋm fɑɣɑ, nɑ Ilisee tɛsɩ. 15 Mpʋɣʋlɛ Yeliko Ɩsɔ kʋyɔɣɔtʋtʋ tɛlǝsǝlɑɑ mpɑ pɑɑ sǝŋɑ tɑɑlǝm tɔ, pɑ loosɑ mpi Ilisee lɑpɑ mpʋ tɔ. Ɩlɛnɑ pɑ́ tɔ sɩ: Tomɑ wenɑ ɑ kɑ wɛ Ilii tɑɑ tɔ, nɔɔnɔɔ ɑ mǝlɑ Ilisee kiŋ. Ɩlɛnɑ pɑ́ sǝŋɩ-ɩ, nɑ pɑ́ luŋɩ-ɩ, 16 nɑ pɑ́ tɔ sɩ: Tǝ wɛnɑ yǝlɑɑ ɑpɑlʋtʋ nyǝ́mɑ nɩɩlɛ nɑ nɑɑnʋwɑ. Tɩɩ tili-wɛ nɑ pɑ́ pɛɛkɩ nyɑ́ cɑɑ. Ntɑnyɩ Tɑcɑɑ Feesuɣu kpɑɣɑ-ɩ mpʋ tɔ, kʋ pɛtɑ-ɩ pʋɣʋ nɑkʋlɩ kʋ nyʋɣʋ tɑɑ, yɑɑ tɛtɛkǝlɛ tɑɑ kɛ́ tiiliɣi.

Ɩlɛnɑ Ilisee kisi sɩ pɑ́ tɑɑ tili. 17 Pɑ cɑɑlɑ-ɩ teu, ɩlɛnɑ ɩ́ cɑŋ nɑ ɩ́ tisi, nɑ pɑ́ tili pɑ yǝlɑɑ nɩɩlɛ nɑ nɑɑnʋwɑ nɑ pɑ́ pɛɛkɩ Ilii kɛ kʋyɛɛŋ tooso, pɑ tɑ nɑ-ɩ. 18 Pɑ mǝlɑɑ nɑ pɑ́ mɑɣɑnɑ Ilisee kɛ tǝnɑ, ɩlɛnɑ ɩ́ tɔ́ sɩ: Mɑɑ heelɑ-mɛ sɩ ɩ́ tɑɑ polo.

19 Ḿpʋ́ɣʋ́ Yeliko nyǝ́mɑ tɔmɑ Ilisee sɩ: Hɑɩ, tɑ cɑɑ, tɑ ɩcɑtɛ wɛ teu. Amɑ tǝ lʋm wɑkǝlǝɣɩ ɑlɑɑ, nɑ pǝ́ lɑkɩ nɑ tɔlɑ hɔlǝsǝɣɩ*fɑ*. ɑhɔlǝsǝɣɩ: Piipilinɑɑ lɛlɑɑ nɑ tɛlǝsɑɑ sɩ: Lʋm kɛ́ ɩsɑɣɑm nɑ tɛtʋ kɛ kɑɑlʋlɑɣɑ. 20 Ntɛnɑ Ilisee sɩ: Ɩ́ tʋ tɔm kɛ nyɑnɑɣɑ kʋfɑlɑɣɑ tɑɑ, nɑ ɩ́ kɔnɑ-m.

Ḿpʋ́ɣʋ́ pɑ kɔnɑ-ɩ. 21 Ilisee mʋwɑ tɔm mpɩ ɩlɛnɑ ɩ́ polo nɑ ɩ́ tʋ-wǝɣɩ hite tɑɑ nɑ ɩ́ tɔ sɩ: Tɑcɑɑ sɩ mɑ tɑɣɑnɑ mǝ lʋm. Pǝ kɑɑ tɑsɑ mǝ yǝlɑɑ nɑ mǝ tɔlɑ kɛ wɑkǝlʋɣʋ.

22 Ɩlɛnɑ lʋm mpɩ pǝ́ lɑ teu kɛ hɑlǝnɑ sɑŋɑ kɛ́ teitei ɩsɩɩ Ilisee yɔɣɔtʋɣʋ tɔ.

23 Ḿpʋ́ɣʋ́ Ilisee lɩɩ Yeliko nɑ ɩ́ kpɑɑkɩ Petɛɛlɩ. Ɩlɛnɑ piyɑ lɩɩ ɩcɑtɛ tɑɑ nɑ sɩ́ tʋʋkɩ-ɩ sɩ: Nyʋnlɛɛsʋɣʋ kpɑ, nyʋnlɛɛsʋɣʋ kpɑ.

24 Ntɛnɑ Ilisee pǝsɩ nɑ ɩ́ tǝŋsɩ-sǝɣɩ mpusi, nɑ tɑɑlɛ wontu ɩsɑɣɑtʋ nti pɑ yɑɑ sɩ Wusi tɔ, tǝ́ lɩɩ nɑɑlɛ nɑ tǝ́ cǝlɩ piyɑ nɩɩlɛ nɑ nɑɑlɛ. 25 Pǝlɛ pǝ wɑɑlɩ kɛ́ Ilisee kpɑwɑ Kɑmɛɛlɩ pʋɣʋ tɑɑ. Ɩ lɩɩ tǝnɑ, ɩlɛnɑ ɩ́ mǝŋnɑ Sɑmɑlii.