1 Mɑ mɑɣɑmɑɣɑ mɑɑ sǝnɑ ɩlɛɣɛ, Mete tʋ Tɑliyusi kɑwulɑɣɑ pǝnɑɣɑ kɑncɑɑlɑɣɑ nyǝŋkɑ tɑɑ kɛ́. 2 Ḿpʋ́ɣʋ́ ɩsɔtɑɑ tillu tɔmɑ sɩ: Mɑɑ heeli-ŋ tɑmpɑnɑ tɔm.

Pɛɛsɩ ɑwulɑɑ sɔsɑɑ tooso kɑ́ tɔkɩ kɑwulɑɣɑ kɛ́ nɑ pɑ́ kɑɑsǝɣɩ tǝmɑ. Kɑntǝkɑɣɑ nyǝ́mɑ kɑ́ kǝlɩ kɑncɑɑlɑɣɑ nyǝ́mɑ kɛ wɛnɑʋ. Ɩlɛnɑ liɣiti nyǝŋ kuu pǝ tǝnɑ nɑ ɩ́ kʋlɩ Kǝlɛɛkɩ kɑwulɑɣɑ tɔɔ. 3 Amɑ yoolu nɔɣɔlʋ ɩ kɑ́ tɔɣɔnɑ Kǝlɛɛkɩ kɑwulɑɣɑ sɔsɑɣɑ, nɑ ɩ́ lɑkɩ ɩsǝnɑ ɩ sɔɔlɑɑ tɔ. 4 Ɩ kɑwulɑɣɑ pɩɩkɩ teu, ɩlɛnɑ kɑ́ fɑɣɑ tɔm liɣiti. Ɩlɛnɑ yǝlɑɑ lɛlɑɑ tɑlɑ-kɛ. Ɩlɛ pɑ kɑɑ wɛɛnɑ tomɑ ɩsɩɩ kɑncɑɑlɑɣɑ nyǝŋ.

5 Ilim mpǝtǝŋ wulɑʋ kɑ́ lɑ tomɑ kɛ sɔsɔm yɑɑ. Amɑ ɩ kʋpɑɣɑlɑɑ tɑɑ nɔɣɔlʋ kɑ́ kǝlɩ-ɩ nɑ ɩ́ lɛɛkɩ kɑwulɑɣɑ. 6 Pɩɩsɩ kɑ́ cɔɔ pǝcɔ, ɩlɛnɑ Icipiti wulɑʋ nɑ Silii nyǝŋ pɑ́ pɛɛlɩ nɔɣɔ. Icipiti nyǝŋ kɑ́ hɑ Silii nyǝŋ kɛ ɩ pɛɛlɔ. Amɑ pǝ kɑɑ tɑɑŋɩ. Alʋ ɩnɩ nɑ ɩ pɑɑlʋ, nɑ ɩ pǝyɑɣɑ, nɑ ɩ cɑɑ pɑɑ sɩ. 7 Ɩlɛnɑ ɑlʋ ɩnɩ ɩ cɑlɑɣɑ tʋ nɔɣɔlʋ, ɩ́ kpɑɣɑ ɩ cɑɑ lonte. Ɩlɛnɑ ɩ́ polo pɑ koloosi ɑcɑlɛɛ tɑɑ, nɑ ɩ́ yoonɑ-wɛ nɑ ɩ́ kǝlɩ-wɛ. 8 Hɑlɩ ɩ kɑ́ kuu pɑ tɩɩŋ nɑ pɑ wontu nti pɑ lupɑ wʋlɑ nɑ liɣitee nyǝɣǝtʋ tɔ, nɑ ɩ́ ponɑ Icipiti. Ɩlɛnɑ yoou hɛɛ pɩɩsɩ pɑɣɑlɛ. 9 Ɩlɛnɑ Silii wulɑʋ yoonɑ Icipiti nyǝŋ, nɑ ɩ́ kpisi-ɩ nɑ ɩ́ mǝlɩ ɩ tɛtʋ tɑɑ.

10 Amɑ ɩ pǝyɑlɑɑ kɑ́ koti yoolɑɑ kɛ tintikɑ tintikɑ kɛ sɔsɔm. Pɑ tɑɑ lɛlʋ nɑ ɩ yoolɑɑ pɑɑ wɑtɩ kolontunɑɑ ɩsɩɩ lʋm. Ɩlɛnɑ ɩ́ mǝlɩ, nɑ pɑ́ tɑɣɑnɩ pɑ tɔɔ kɛ́ kʋlʋɣʋ. Hɑlǝnɑ pɑ́ tɑnɑ-wɛɣɛ wulɑʋ koluŋɑ ɩcɑtɛ. 11 Pɑ́ɑ́nɑ́ kɑ́ kpɑ Icipiti wulɑʋ. Ɩlɛnɑ ɩ́ kpɑɣɑ ɩ yoolɑɑ nɑ ɩ́ kpɑ Silii nyǝ́mɑ tɔɔ. Pɑɑ kǝlɩ-wɛ, nɑ pɑ́ kpɑ pɑ yoolɑɑ tuutuumɑ. 12 Pɑɑ nɑ Icipiti wulɑʋ kɑ kʋwɑ pɑ tɑɑ kɛ́ yoolɑɑ iyisi iyisi, nɑ ɩ́ hɔ ɩ tɩ tɔ, ɩ kɑɑ lɑ ɑkɑ. 13 Pɩɩsɩ cɔɔ pǝcɔ ɩlɛnɑ Silii wulɑʋ kpɑɣɑ yoolɑɑ kʋfɑmɑ. Pɛlɛ pɑ kǝlɑ kʋpǝmɑ kɛ pɑɣɑlɛ, nɑ pɑ yoou wontu tǝnɑ. Nɑ pɑ́ polo Icipiti nyǝ́mɑ wɑɑlɩ. 14 Wɑɑtʋ ɩnɩ ɩ tɑɑ kɛ́ pɑɣɑlɛ kɑ́ kʋlɩ Icipiti nyǝ́mɑ tɔɔ. Hɑlɩ nyɑ́ yǝlɑɑ tɑɑ mʋsʋntʋnɑɑ kɑ́ kʋlɩ ɩ tɔɔ sɩ, pɑ yoosiɣi ɩsǝnɑ n nɑwɑ toosee tɑɑ tɔ. Amɑ pɑɑ kpisi. 15 Ɩlɛnɑ Silii wulɑʋ tuusi nɑ ɩ́ tɑ́ koluŋɑ ɩcɑtɛ, nɑ pɑ́ lo hɑpǝlɛ nɑ pɑ́ lɛɛkɩ-tɛ. Icipiti yoolɑɑ kɑ́ kpisi, pɑɑ pɑ tɑɑ ɑkɑnɑɑ mɑɣɑmɑɣɑ, pɛlɛ pɑ tɑɑ fɛɩnɑ toŋ. 16 Silii nyǝ́mɑ kɑ́ lɑ ɩsǝnɑ pɑ nɔkɑɑ tɔɣɔ. Nɔɣɔlʋ kɑɑ tɑŋ-wɛ, hɑlɩ pɑɑ kpɛnnɑ Ɩsɛɣɛlɩ nyǝ́mɑ. Pɑɑ ŋmɑkǝlɩ-wɛ nɑ pɑ́ wɑkǝlǝɣɩ-wɛ. 17 Pɑɑ mɑɣɑsɩ pɑ tɑɑ sɩ pɑ́ nɑ Icipiti wulɑʋ pɑ́ pɛɛlɩ nɔɣɔ nɑ pɑ́ hikinɑ-ɩ nɑ tǝnɑ. Hɑlɩ pɑɑ hɑ-ɩ pɑ pɛɛlɔ. Amɑ pǝ kɑɑ lɑ. 18 Pǝlɛ pǝ pɑɑsi ɩ́ kɑ́ kɛɛsǝnɑ Kǝlɛɛkɩ tɛtʋnɑɑ mpɑ pɑ wɛ teŋku nɔɣɔ tɔ pɑ tɔɔ. Amɑ wulɑʋ nɔɣɔlʋ ɩ kɑ́ sǝŋsɩ-ɩ. Ɩlɛ ɩ kɑ́ lǝsɩ ɩ nyǝm nɑ ɩ́ tʋ ɩ niŋ tɑɑ. 19 Ɩlɛnɑ ɩ́ mǝlǝnɑ ɩ koloosi ɑcɑlɛɛ tɔɔ nɑ ɩ́ kǝlɩ-ɩ nɑ ɩ́ sɩ nɑ pǝ́ sɑɑlɩ. 20 Wulɑʋ wei ɩ kɑ́ lɛɛtɩ ɩ lonte tɑɑ tɔ ɩ́lɛ́ ɩ kɑ́ sɩɩ lɑmpuu mʋlʋ kɛ Ɩsɛɣɛlɩ tɑɑ. Amɑ pɩɩ lɑ wɛɛ nɑɑlɛ ɩlɛnɑ pǝ kʋ-ɩ. Amɑ pǝ kɑɑ wɛɛ yoou tɑɑ yɑɑ pɑ muɣulɑ-ɩ.

21 Yʋlʋ wei pɑɑ tʋɣʋnɑ nɑ ɩ tɑ nǝɣǝsǝnɑ kɑwulɑɣɑ tɔɣɔlʋ tɔ. Ɩnɩ ɩ kɑ́ cɑɣɑnɑ ɩ lonte. Hɛɛsʋɣʋ wɑɑtʋ kɛ ɩ kɑ́ kɔɔ nɑ ɩ́ lɛɛkɩ kɑwulɑɣɑ nɑ ɑcilɑɣɑtʋ. 22 Ɩ kɑ́ kʋ yoolɑɑ tǝnɑɣɑ nɑ pǝ kpɛŋnɑ Ɩsɔ yǝlɑɑ nyʋɣʋ tʋ. Nɔɣɔlʋ kɑɑ kpɑ ɩ tɔɔ. 23 Yǝlɑɑ kɑ́ polo ɩ kiŋ sɩ ɩ́ nɑ-wɛ pɑ́ pɛɛlɩ nɔɣɔ. Amɑ ɩnɩ ɩ kɑ́ muɣuli-wɛ. Pɑɑ nɑ ɩ yǝlɑɑ fɛɩ pɑɣɑlɛ tɔ, ɩ toŋ kɑ́ sɔɔsǝɣɩ tɑm kɛ́. 24 Hɛɛsʋɣʋ wɑɑtʋ kɛ ɩ kɑ́ cɔɔ tɛtʋ tɑɑ. Ɩ kɑ́ lɑ mpi ɩ cɑɑnɑɑ tɑɑ lɑ tɔ, ɩsɩɩ wontu kuuu nɑ tǝ tɑlʋɣʋ. Hɑlɩ ɩ kɑ́ mɑɣɑsɩ ɩsɩɩ ɩ tii koloosi ɑcɑlɛɛ tɔɔ. Amɑ pǝ kɑɑ tɑɑŋɩ kɛ́.

25 Ɩ toŋ nɑ ɩ ɑpɑlʋtʋ tɔɔ ɩ nɑ ɩ yoolɑɑ tuutuumɑ pɑɑ polo Icipiti wulɑʋ wɑɑlɩ. Amɑ ɩ́lɛ́ ɩ yoolɑɑ kǝlɑ ɩnɩ ɩ nyǝ́mɑ kɛ toŋ nɑ pɑɣɑlɛ. Pɑɑ yoonɑ-ɩ nɑ pɑ́ kpisi-ɩ. Mpi tɔ, ɑcilɑɣɑtʋ kɛ pɑɑ lɑnɑ-wɛ. 26 Ɩ nɑ mpɑ pɑ kɑɑ nyǝnɑɣɑ tɔ, mpɛ pɑɑ lɩɩnɑ ɩ wɑɑlɩ. Ɩlɛnɑ ɩ yoolɑɑ yɑ nɑ pɑ tɑɑ pɑɣɑlɛ sɩ. 27 Pǝlɛ pǝ wɑɑlɩ kɛ́ ɑwulɑɑ nɑɑlɛ mpɛ pɑɑ ciiki ɑcɛsɑɑcɛsɑɑ ciikuɣu. Amɑ pǝ kɑɑ lɑ. Mpi tɔ, pǝ tɑ tɑtɑ tǝnɑɣɑ wɑɑtʋ nɑ pǝ́cɔ́. 28 Silii wulɑʋ kɑ mǝlǝɣɩ ɩ tɛtʋ tɑɑ nɑ toŋ sɔsɔɔŋ. Ɩlɛnɑ ɩ́ tʋ ɩ tɑɑ sɩ ɩ kɑ́ wɑkǝlɩ yǝlɑɑ mpɑ nɑ Ɩsɔ pɑ pɛɛlɑ nɔɣɔ tɔ pɑ ɩsɔ sɛɛʋ.

29 Pǝ wɑɑlɩ kɛ́ ɩ kɑ́ wɑtɩ Icipiti tɔtɔ. Amɑ pǝ kɑɑ lɑnɑ-ɩ ɩsɩɩ pɩɩ lɑpʋ tɔ. 30 Lom nyǝ́mɑ kɑ́ kɔnnɑ pɑ kpɩɩlǝŋ nɑ pɑ́ yoonɑ-ɩ. Ɩ kɑ́ lɔ ɩ ɑpɑlʋtʋ nɑ ɩ́ se nɑ ɩ́ mǝlɩ. Ɩlɛnɑ ɩ́ mʋ pɑ́ɑ́nɑ́ nɑ ɩ́ kpɛntǝnɑ mpɑ pɑ lɔ Ɩsɔ tɔ. Ɩlɛnɑ ɩ́ wɑkǝlɩ yǝlɑɑ mpɑ nɑ Ɩsɔ pɑ pɛɛlɑ nɔɣɔ tɔ pɑ ɩsɔ sɛɛʋ. 31 Ɩ kɑ́ tili ɩ yoolɑɑ nɑ pɑ́ polo pɑ́ pilisi Ɩsɔ tǝsɛɛlɛ. Pɑɑ sǝŋsɩ tɑnɑŋ nɑ tɑɑnɑɣɑ kɔtɑsɩ nɑ pɑ́ siki pɑ ɑcɑɑlǝtʋ tʋɣʋ. 32 Ɩ kɑ́ tolisi ɩsɔ sɛɛʋ tɑɑ ɑcɑmɑɑ nɑ ɩ ɑcilɑɣɑtʋ. Ɩlɛ ɩ kɑɑ pǝsɩ ɩsǝlɛ sɛɛsǝlɑɑ. 33 Amɑ mpɑ pɑ kǝlɑ lɑɣɑtʋ kɛ pɑ tɑɑ tɔ, pɑɑ sɛɣɛsɩ lɛlɑɑ pɑɣɑlɛ. Pɩɩ lɑ wɛɛ nɑɑlɛ, ɩlɛnɑ pɑ́ kʋ́ pɑ tɑɑ lɛlɑɑ, nɑ pɑ́ wɔ lɛlɑɑ kɛ kɔkɔ. Pɑɑ tʋ lɛlɑɑ kɛ sɑlǝkɑ, nɑ pɑ́ lɛɛkɩ lɛlɑɑ wontu. 34 Pǝcɔ tike kɛ pɑɑ sǝnɑ-wɛɣɛ pɑ wɑhɑlɑnɑɑ tɑɑ. Mpi tɔ, mǝnɑɑfikitʋ kɛ pɑɣɑlɛ sɔɔsɑɣɑnɑ pɑ tɔɔ. 35 Lɑɣɑtʋnɑɑ mpɛ pɑ tɑɑ lɛlɑɑ kɑ́ sɩ. Pɑ sǝm mpɩ pɩɩ tɑɣɑnnɑ yǝlɑɑ nɑ pɑ́ wɛɛ teu tǝnɑŋŋ. Hɑlǝnɑ tǝnɑɣɑ wɑɑtʋ. Mpi tɔ, wɑɑtʋ wei pɑ sɩɩwɑ tɔ ɩ kɑ́ kɔɔ.

36 Amɑ Silii wulɑʋ kɑ lɑ ɩsǝnɑ pǝ mɑɣɑ-ɩ tɔɣɔ. Ɩ kɑ́ mɑɣɑsɩ ɩ tɑɑ sɩ ɩ kǝlɑ tɩɩŋ tǝnɑ. Hɑlǝnɑ ɩ́ kpɑ Ɩsɔ mɑɣɑmɑɣɑ tɔɔ. Ḿpʋ́ɣʋ́ ɩ kɑ lɑ, hɑlǝnɑ wɑɑtʋ wei Ɩsɔ kɑ́ hɔ ɩ ŋkpɑŋʋɣʋ tɔ. Ɩsǝnɑ Ɩsɔ sɩɩkɩ tɔ mpʋ pǝ lɑkǝnɑ. 37 Ɩ kɑ́ nyǝnɩ yem kɛ́ ɩ cɑɑnɑɑ tɩɩŋ nɑ ɑlɑɑ tʋɣʋ Tɑlɑmusi. Ɩ kɑ́ hɔ ɩ tǝɣɩ nɑ ɩ́ footi tɩɩŋ tǝnɑ. 38 Pɑɑ nɑ mpʋ ɩ kɑ́ lɑɑ koloosi ɑcɑlɛɛ tʋɣʋ ŋku ɩ cɑɑnɑɑ tɑɑ nyɩ tɔ. Hɑlǝnɑ ɩ́ hɑ-kʋɣʋ wʋlɑ nɑ nyǝɣǝlʋɣʋ kʋsɛɛmʋɣʋ nɑ liɣitee pɛɛ nɑ wontu kʋpɑntʋ. 39 Tʋɣʋ ŋkʋ kʋ toŋ kɛ ɩ kɑ́ yoonɑ koloosi ɑcɑlɛɛ nɑ ɩ́ kʋsɩ kʋ tǝŋlɑɑ nyɔɔŋ. Ɩ kɑ́ kpɑ pɑ tɑɑ pɑɣɑlɛ kɛ nyʋɣʋ nyǝ́mɑ, nɑ ɩ́ hɑ-wɛɣɛ tɛtʋnɑɑ.

40 Icipiti wulɑʋ kɑ́ kʋlɩ Silii nyǝŋ tɔɔ kɛ́ tǝnɑɣɑ wɑɑtʋ. Amɑ Silii nyǝŋ kɑ́ sǝŋɩ-ɩ nɑ ɩ yoou kɛɛkɛnɑɑ, nɑ kpɑɣɑnǝŋ nɑ pǝ kpɩɩlǝŋ kɛ pɑɣɑlɛ. Ɩ kɑ́ wɑtɩ tɛtʋnɑɑ ɩsɩɩ pɔɣɔ lʋm. 41 Ɩ kɑ́ tii Ɩsɛɣɛlɩ tɛtʋ tɔɔ nɑ ɩ́ kʋ yǝlɑɑ iyisi nɑɑnʋwɑ. Amɑ Ɩtɔm nɑ Mowɑpʋ pǝ yǝlɑɑ nɑ Amoni yoolɑɑ sɔsɑɑ kɑ́ fiti. 42 Ɩ kɑ́ tʋ niŋ kɛ ɑcɑlɛɛ pɑɣɑlɛ tɔɔ. Icipiti tɛtʋ kɑɑ fiti pɑɑ pǝcɔ. 43 Ɩ kɑ́ kuu Icipiti wʋlɑ nɑ liɣitee nyǝɣǝlʋɣʋ nɑ kɑcɔkɑ wontu. Ɩ kɑ́ ŋmɑkǝlɩ Lipii nɑ Ɩtiyopii nyǝ́mɑ. 44 Ɩ kɑ́ nɩɩ sɩ ilim tǝlɩɩlɛ nɑ pǝ ntɔɣɔŋ nyǝ́mɑ kɔmɑ-ɩ yoonɑʋ. Ɩlɛnɑ ɩ́ mǝlɩ pɑ wɑɑlɩ nɑ pɑ́ɑ́nɑ́ nɑ ɩ́ kʋ pɑɣɑlɛ. 45 Ɩ kɑ́ siki ɩ kɑwulɑɣɑ cokǝle kɛ teŋku nɑ pʋɣʋ Siyɔŋ pɑ hɛkʋ tɑɑ. Timpi tɛtʋ kǝlɑ teu tɔ. Pǝlɛ pǝ wɑɑlɩ kɛ́ pɩɩ tɑlɑ ɩ tǝnɑɣɑ. Pǝyele nɔɣɔlʋ kɑɑ wɑɑsɩ-ɩ.