1 Ḿpʋ́ɣʋ́ ɩsɔtɑɑ tillu heelɑ-m tɔtɔ sɩ: Wɑɑtʋ ɩnǝɣǝlɛ ɩsɔtɑɑ tillu sɔsɔ Mikɑyɛɛlɩ wei ɩ tɑŋǝɣɩ mɑ yǝlɑɑ tɔ ɩ kɑ́ kʋlɩ. Wɑhɑlɑ wei too yǝlɑɑ kʋlɑɑ pɑ tɑ nɑtɑ tɔ, ɩ kɑ́ kɔɔ wɑɑtʋ ɩnɩ. Ɩlɛnɑ pǝ yɑ mɑ yǝlɑɑ mpɑ pɑ hǝlɑ wɛ weesuɣu tɑkǝlɑɣɑ tɑɑ tɔ pɑ nyɔɔŋ. 2 Mpɑ pɑ tooki tɔ, pɑ tɑɑ pɑɣɑlɛ kɑ́ fe. Lɛlɑɑ kɑ́ hiki weesuɣu ŋku kɩɩ tɛŋ tɔ. Ɩlɛnɑ lɛlɑɑ kɛ fɛɛlɛ sɔsɔɔlɛ tɑm nyǝntɛ. 3 Lɑɣɑtʋnɑɑ mpɑ pɑɑ sɛɣɛsɑ yǝlɑɑ sɑmɑɑ kɛ tɑmpɑnɑ tǝŋʋɣʋ tɔm tɔ pɑɑ te kɔkɔ ɩsɩɩ ɩsɔtʋlʋŋɑsɩ kɛ tɑm tɔɔ.

4 Tɔʋ, Tɑniyɛɛlɩ, sɩɩ tɔm tǝnɛɣɛ nyɑ́ tɑɑ. Nmɑɑ-tǝɣɩ tɑkǝlɑɣɑ tɑɑ nɑ ń tɑɑlɩ kɑ tɔɔ. Yʋsɩ-kɛ hɑlǝnɑ tǝnɑɣɑ wɑɑtʋ. Pɑɣɑlɛ kɑ kɑlɑ-kɛ nɑ pɑ́ sɔɔsɩ nyǝm.

5 Ḿpʋ́ɣʋ́ Tɑniyɛɛlɩ mɑ́, mɑ nɑwɑ mɑ toosee ɑnɩ ɑ tɑɑ kɛ́ ɑpɑlɑɑ lɛlɑɑ kɛ nɑɑlɛ. Lɛlʋ sǝŋɑ pɔɣɔ kʋteŋ nɑ cǝnɛ nɑ lɛlʋ nɑ cǝnɛ. 6 Ḿpʋ́ɣʋ́ pɑ tɑɑ lɛlʋ pɔɔsɑ ɩsɔtɑɑ tillu wei ɩ suu kponkpontu toŋ nyǝntʋ wontu nɑ ɩ́ sǝŋɑ pɔɣɔ nɔɣɔ tɔ sɩ: Pǝlee kɛ́ piti tǝmɑ ɑnɛ ɑ kɑ tɛ? 7 Ḿpʋ́ɣʋ́ ɩsɔtɑɑ tillu kpɑɑsɑ ɩ niŋ nɑ ɩsɔ nɑ ɩ́ tɔ sɩ: Mɑ tuunɑ Tɑm tɔɔ Ɩsɔ hǝtɛ tɑɑ. A kɑ́ tɑɑŋɩ pɩɩsɩ tooso nɑ hɔɣɔlʋɣʋ. Wɑɑtʋ wei pɑɑ hɛɛsɩ Ɩsɔ yǝlɑɑ kɛ ŋmɑkǝlʋɣʋ tɔɣɔ mpʋ ɩnɩ pɩɩ tɛ.

8 Mɑ nɩɩ tɔm tǝnɛ, ɩlɛ mɑ tɑ cɛkǝnɑ-tɩ. Pǝ tɔɔ kɛ́ mɑ pɔɔsɑ mɑ sɔsɔ sɩ ɩsǝnɑɣɑ pɩɩ tɛnɑ? 9 Ḿpʋ́ɣʋ́ ɩ cɔ-m sɩ: Tɑniyɛɛlɩ, tɑɑ nǝɣǝsɩ. Mpi tɔ, pǝ wɛɛ sɩ pɑ́ ŋmɛsɩ tɔm ntǝɣɩ, nɑ pɑ́ yʋsɩ hɑlǝnɑ tǝnɑɣɑ wɑɑtʋ. 10 Mɑɣɑsǝŋ kɑ́ tɑɣɑnɩ yǝlɑɑ pɑɣɑlɛ nɑ pɑ́ te. Amɑ ɑsɑɣɑɑ nɑ kɑɑ cɛkǝnɑ. Ɩlɛnɑ pɑ́ kɑ́ nyʋɣʋ kɛ tǝ tɑɑ. Ɩlɛnɑ lɑɣɑtʋnɑɑ nɑ́ɑ́ cɛkǝnɑ. 11 Pǝ kpɑɣɑʋ wɑɑtʋ wei pɑ sǝŋsɑ tɑnɑŋ nɑ tɑɑnɑɣɑ kɔtɑsɩ nɑ pɑ́ siki tʋɣʋ tɔ. Pǝ kʋyɛɛŋ wɛ iyɑɣɑ nɑ ŋmʋnʋɣʋ nɑ nɩɩnɑɑsɑ nɑ nɑɑnʋwɑ (1290). 12 Leleŋ nɩɩlʋ ntɛ́ wei ɩ kɑ kɑɑsɩ ɩ tɩ nɑ ɩ́ tɑŋ nɑ ɩ́ tɑlɑ kʋyɛɛŋ iyɑɣɑ nɑ ŋmʋnʋɣʋ nɩɩnʋwɑ nɑ hiu nɑ nɑɑnʋwɑ nɑ kɑkpɑsɩ (1335) tɔ. 13 Ye nyɑ́ ɩlɛ, kɑɑsɩ nyɑ́ tɩ nɑ ń sʋʋ pʋ́ʋ́ɣʋ́ nɑ ń hɛɛsɩ. Pǝlɛ pǝ wɑɑlɩ n kɑ́ fe nɑ Ɩsɔ kɑ́ hɑ-ŋ nyɑ́ kɑsǝyɑɣɑ.