1 Aɑɑ, Kɑlɑtɩ kʋmɛlɛmǝŋ mɛ, ɩlɛ nɔɣɔlʋ nyɑlɑ-mɛɣɛ kʋnyɑlʋ yɑɑ ɩsǝnɑ? Anɩ mɛɣɛ pɑ tɛmɑ kɛɛsʋɣʋ kɛ Kilisiti tesikɑ tɔɔ sǝm tɔm tǝkelekele kɛ teu. 2 Ɩlɛ tɔm kʋlʋmtʋ tǝkoŋ kɛ́ mɑ pɔɔsǝɣɩ-mɛ, sɩ ɩ́ tǝŋʋɣʋ Ɩsɔ kʋsǝsɩɩtʋ tɔɣɔ ɩ́ hikɑ Ɩsɔ Feesuɣu yɑɑ ɩ́ nɩɩʋ Lɑɑpɑɑlɩ Kʋpɑŋ nɑ ɩ́ mʋ-ɩ tɔɣɔ ɩ́ hikɑɑ? Ɩ́ cɔ-m nɑ mɑ́ nɩɩ. 3 Mǝ kʋmɛlɛntʋ tɔɔ ḿpʋ́ɣʋ́? Ɩsɔ Feesuɣu toŋ kɛ ɩ́ hikinɑ mǝ tǝɣɩ kɑncɑɑlɑɣɑ, ɩlɛnɑ nɔɔnɔɔ ɩ́ cɑɑ ɩ́ tɛɛsǝnɑ mǝ mɑɣɑmɑɣɑ mǝ toŋ nɑ? 4 Pǝ lɑpɑ pǝ lɑpɑ mǝ hɛkʋ nɑ ɩ́ hii lɑɣɑtʋnɑɑ mpɑ tɔ pɛlɛ pɑ pǝsɑ yem kɛlɛ yɑɑ? Aɑɩ, pǝ kɑɑ pǝsɩ yem kɛ́ mpʋ mɛɛ. 5 Ɩsɩɩ Ɩsɔ cɛlʋɣʋʋ-mɛɣɛ ɩ Feesuɣu nɑ ɩ́ lɑkɩ piti tǝmɑ kɛ mǝ hɛkʋ kɛ mpʋ tɔ, mǝ kʋsǝsɩɩtʋ tǝŋʋɣʋ tɔɔ, yɑɑ mǝ Lɑɑpɑɑlɩ Kʋpɑŋ nɩɩʋ nɑ ɩ mʋɣʋ tɔɔ kɛ́ pǝ lɑkɩ mpʋ?

6 Mpʋ ɩnɩ pǝ yelinɑ nɑ pɑ́ ŋmɑɑ Apǝlɑhɑm tɔm kɛ Ɩsɔ Tɔm tɑɑ sɩ: Ɩ tɛmɑ Ɩsɔ nɑ ɩ tɑɑ, nɑ ɩ tɑɑ tɛm mpǝɣɩ Ɩsɔ nɑ́ nɑwɑ nɑ ɩ́lɛ́ ɩ́ yɑɑ-ɩ yʋlʋpɑŋ nɑ ɩ́ mʋ-ɩ. 7 Pǝ tɔɔ kɛ́ ɩ́ kɑ́ nyɩ teu sɩ, mpɑ pɑ tɛmɑ pɑ tɑɑ nɑ Ɩsɔ tɔɣɔlɛ Apǝlɑhɑm piyɑ tǝsiɣisiɣi. 8 Pǝ mɑɣɑmɑɣɑ pǝ tɩɩ wɛ Ɩsɔ Tɔm tɑɑ kɛ́ mpʋ sɩ: Mpɑ pɑ tɑ kɛ Yutɑ nyǝ́mɑ tɔ pɑɑ kɔɔ nɑ pɑ́ tɛ pɑ tɑɑ nɑ Ɩsɔ, ɩlɛnɑ pɑ́ pǝsɩ yʋlʋpɑmɑ. Nɑ pǝ tɔɔ ɩnǝɣɩ hɑtuu lɔŋ Ɩsɔ heelɑ Apǝlɑhɑm kɛ tɔm kʋpɑntʋ tǝnɛ nɑ tǝ́ wɛ ŋmɑɑtʋ tɑɑ sɩ: Nyɑ́ tɔɔ kɛ́ Ɩsɔ kɑ́ lɑ ɑtɛ yǝlɑɑ tǝnɑɣɑ kʋpɑntʋ. 9 Apǝlɑhɑm tɛmɑ Ɩsɔ nɑ ɩ tɑɑ nɑ Ɩsɔ lɑpɩ-ɩ kʋpɑntʋ. Nɑ mpʋ tɔtɔɣɔ pɑ tǝnɑ mpɑ pɑ tɛŋ pɑ tɑɑ nɑ Ɩsɔ tɔ, ɩ́lɛ́ ɩ lɑkɩ-wɛɣɛ kʋpɑntʋ kɛ mpʋ tɔtɔɣɔ.

10 Mpɑ pɑ wɛɛ nɑ pɑ́ tɛɛlǝɣɩ sɩ pɑ kʋsǝsɩɩtʋ tǝŋʋɣʋ tɔɔ kɛ́ pɑ hikiɣi kʋpɑntʋ tɔ pɑ́ nɑ mpusi kɛlɛ. Tǝ mɑɣɑmɑɣɑ kɛ pɑ yɔɣɔtɑ Ɩsɔ Tɔm tɑɑ sɩ: Mpusi tʋ ntɛ wei ɩɩ tǝŋǝɣɩ pǝ tǝnɑ mpi pɑ ŋmɑɑwɑ kʋsǝsɩɩtʋ tɑkǝlɑɣɑ tɑɑ tɔɣɔ tɑm tɔ. 11 Pǝ tɩɩ nɑɑkɩ mpʋ tǝkelekele sɩ nɔɣɔlʋ kɑɑ pǝsɩ yʋlʋpɑŋ kɛ Ɩsɔ ɩsɛntɑɑ kɛ́ kʋsǝsɩɩtʋ tǝŋʋɣʋ tɔɔ. Amɑ pɑ ŋmɑɑ Ɩsɔ Tɔm tɑɑ tǝkpɑtɑɑ sɩ: Wei ɩ kɛ́ yʋlʋpɑŋ kɛ Ɩsɔ ɩsɛntɑɑ sɩ ɩ tɛmɑ ɩ tɑɑ tɔ pǝ tɔɔ tɔ, pʋntʋ tike tʋlǝɣǝnɑ-tɩ. 12 Pǝ tɑɣɑ pʋlʋ tɔɔ, kʋsǝsɩɩtʋ tǝŋʋɣʋ nɑ tɑ́ɑ́ tɛmnɑʋ kɛ Ɩsɔ tɑ́ kɑɑ pʋlʋ. Amɑ pǝ wɛɛ kɛ́ ɩsɩɩ pɑ yɔɣɔtʋɣʋ Ɩsɔ Tɔm tɑɑ tɔ sɩ: Wei ɩ tɔkɑ kʋsǝsɩɩtʋ tɔmnɑɑ tǝnɑ tɔ, pʋntʋ kɑ́ tʋlɩ-tǝɣɩ tǝ tɔɔ.

13 Ɩsǝnɑ Kilisiti lɑpɑ nɑ ɩ́ sǝɣǝlɩ tɑ́ mpusi kɛ ɩ mɑɣɑmɑɣɑ ɩ nyʋɣʋ tɑɑ tɔ pǝ tɔɔ kɛ́ ɩ pǝsɑɑ nɑ ɩ́ lǝsɩ kʋsǝsɩɩtʋ mpusi ɩnǝɣɩ tɑ́ tɔɔ. Tǝ mɑɣɑmɑɣɑ kɛ pɑ yɔɣɔtɑ Ɩsɔ Tɔm tɑɑ sɩ: Ye pɑ lɑɑlɑɑ nɑ pɑ́ pusi wei nɑ tʋɣʋ, mpusi tʋ kɛ́. 14 Pǝ lɑpɑ ḿpʋ́ɣʋ́ sɩ kʋpɑntʋ nti Ɩsɔ kɑ tɔmɑ sɩ ɩ lɑkɩ Apǝlɑhɑm tɔ, ɩ́ lɑ-tǝɣɩ mpɑ pɑ tɑ kɛ Yutɑ nyǝ́mɑ tɔɣɔ Yesu Kilisiti tɔɔ. Nɑ tɑ́ tɑ́ɑ́ tɛmnɑʋ kɛ Ɩsɔ yelinɑ nɑ tǝ́ hiki Feesuɣu Nɑŋŋtʋ wei Ɩsɔ kɑ tɔmɑ sɩ ɩ kɑ́ hɑ-tʋ tɔ.

15 Mɑ tɑɑpɑlɑɑ mɑ kɛɛsǝɣɩ-mɛɣɛ yǝlɑɑ tɑ́ tɑ kʋlɑpʋtʋ nɑ ɩ́ cɛkǝnɑ. Ye yʋlʋ cɑɣɑɑ nɑ ɩ́ tɑɣɑnɩ pǝ tǝnɑ tǝmɑmɑm kɛ́ ɩsǝnɑ ɩ cɑɑ pɑ́ lɑnɑ ɩ wɛnɑʋ kɛ ɩ sǝm wɑɑlɩ, nɑ ɩ́ tʋ tɑkǝlɑɣɑ tɑɑ nɑ ɩ́ sɩɩ, nɔɣɔlʋ ɩɩ pǝsǝɣɩ nɑ ɩ́ kʋ-tɩ yɑɑ ɩ́ sɔɔsɩ ɩ nyǝntʋ kɛ tǝ tɔɔ. 16 Aŋhɑ, ḿpʋ́ɣʋ́ pǝ wɛɛ nɑ nti Ɩsɔ kɑ tɔmɑ sɩ ɩ kɑ́ lɑ Apǝlɑhɑm nɑ ɩ pǝyɑɣɑ tɔ. Pɑ tɑ ŋmɑɑ Ɩsɔ Tɔm tɑɑ sɩ ɩ piyɑ, sɩ pǝ tɑɑ kɔɔ nɑ pǝ́ lɑ́ ɩsɩɩ yǝlɑɑ pɑɣɑlɛ. Amɑ pɑ tɔmɑɣɑ sɩ: Nyɑ́ pǝyɑɣɑ, sɩ pǝ́ hʋ́lɩ́ sɩ yʋlʋ kʋlʋm kɛ pɑ pɑɑsǝnɑɑ, nɑ yʋlʋ ɩnǝɣǝlɛ Kilisiti. 17 Nti mɑ cɑɑ mɑ hʋ́lɩ́ tɔɣɔlɛ sɩ: Ɩsɔ kɑ tɑɣɑnɑ nti ɩ cɑɑ ɩ́ nɑ ɩ yǝlɑɑ pɑ́ lɑ tɔ, hɑlǝnɑ ɩ́ tɔ sɩ ɩ kɑ́ tɔkɩ ɩ nɔɣɔ sɩɩʋ. Pǝ kɔmɑ nɑ pɩɩsɩ lɑ nɑsǝlɛ nɑ hiu nɑ nɑɑnʋwɑ (430) kɛ́, ɩlɛnɑ kʋsǝsɩɩtʋ tɔm lɩɩ. Kʋsǝsɩɩtʋ tɔm lɩɩʋ mpʋ tɔ, pǝ fɛɩ sɩ tǝlɛ tǝ́ kʋ nti Ɩsɔ tɛmɑ tɑɣɑnʋɣʋ tɔ, nɑ mpi mpi ɩ tɔmɑ sɩ ɩ kɑ́ lɑ yǝlɑɑ tɔ tǝlɛ tǝ sɑɑlɩ yem. 18 Pǝ tɑɣɑ pʋlʋ, ye ɩsɩɩ kʋsǝsɩɩtʋ tɔkǝlɑɑ kɛ Ɩsɔ tǝŋǝɣɩ nɑ ɩ́ hɑɑ ɩ kʋcɔɔŋ wei ɩ kɑ sɩɩwɑ ɩ yǝlɑɑ tɔɔ tɔ, ɩlɛ pǝ tɑɣɑ nɔɣɔ sɩɩʋ ntɛ́. Amɑ cǝnɛ ɩlɛ Ɩsɔ kɑ tɔmɑ sɩ ɩ kɑ́ lɑ Apǝlɑhɑm kɛ kʋpɑntʋ tɔɣɔ ɩ lɑpɑ-ɩ-tǝɣɩ fɑɑlɑɑ.

19 Pepe nyʋɣʋ tɔɔ kɛ́ pɑ sɩɩ kiiŋ ɩlɛ? Pɑ sɔɔsɑ ɩlɛɣɛ sɩɩʋ kɛ́ sɩ pǝ́ hʋ́lɩ́ yǝlɑɑ kɛ pɑ kʋlɑpʋtʋ nti Ɩsɔ ɩɩ cɑɑ tɔ. Pǝ wɛɛ sɩ kʋsǝsɩɩtʋ ntɩ tǝ́ cɑɣɑ mpʋ, hɑlǝnɑ Apǝlɑhɑm pǝyɑɣɑ ŋkɑ kɑ tɔɔ Ɩsɔ kɑ tɔmɑ sɩ ɩ kɑ́ lɑ kʋpɑntʋ ntɩ tɔ kɑ́ kɔɔ. Nɑ ɩsɔtɑɑ tillɑɑ kɛ Ɩsɔ tilinɑ kʋsǝsɩɩtʋ ntɩ, nɑ yʋlʋ kɛ pɛlɛ pɑ cɛlɑɑ sɩ ɩ́ tɛlǝsɩ ɩ lɛlɑɑ. 20 Amɑ ye timpi pǝ kɛ́ sɩ yʋlʋ kʋlʋm tɔm kɛ pǝ pɑɑsǝnɑɑ, ɩlɛ tɛlǝsǝlʋ nɔɣɔlʋ ɩ kɑɑ wɛɛ pǝ tɑɑ tɔtɔ. Nɑ mpʋ ɩnǝɣɩ pǝ tɩɩ wɛɛ, Ɩsɔ wɛ kʋlʋm kɛ́.

21 Ɩlɛ pǝ lɩɩwɑ sɩ kʋsǝsɩɩtʋ nɑ mpi mpi Ɩsɔ tɔmɑ sɩ ɩ kɑ́ lɑ tɔ pɩɩ kpɛntǝɣɩ kɛlɛ? Aɑɩ, pǝ tɑɣɑ mpʋ se, pɑɑ pǝcɔ. Ye pɑɑ tʋ kʋsǝsɩɩtʋ nɑtǝlɩ nti tǝ pǝsǝɣɩ nɑ tǝ́ lɑ́ nɑ yǝlɑɑ hiki weesuɣu, ɑŋhɑɑ, ɩlɛ kʋsǝsɩɩtʋ tǝŋʋɣʋ kɑ yekɑɣɑnɑ ntɛ́ nɑ yʋlʋ pǝsǝɣɩ kʋpɑŋ kɛ Ɩsɔ ɩsɛntɑɑ. 22 Amɑ pɑ ŋmɑɑwɑ Ɩsɔ Tɔm tɑɑ sɩ ɩsɑɣɑtʋ ŋmɑkǝlɑ yǝlɑɑ tǝnɑ tǝpɑɩ. Nɑ pǝ wɛ mpʋ, sɩ mpɑ pɑ tɛmɑ pɑ tɑɑ nɑ Yesu Kilisiti tɔ, pɑ́ hiki kʋcɔɔŋ wei Ɩsɔ kɑ tɔmɑ sɩ ɩ kɑ́ hɑ tɔɣɔ pɑ tɑɑ tɛmnɑʋ tɔɔ.

23 Tɑ́ɑ́ tɛmnɑʋ kɛ Ɩsɔ tɑɑ kɔntɑ ɩlɛ, kʋsǝsɩɩtʋ kɑ tɔkǝnɑ-tʋ ɩsɩɩ sɑlǝkɑtʋnɑɑ, nɑ pǝ́ tɑŋɑɑ sɩ pǝ́ kɔɔ pǝ́ kuli-tʋɣʋ Ɩsɔ tɑ́ɑ́ tɛmnɑʋ tɔm ntɩ tǝ tɔɔ. 24 Ḿpʋ́ɣʋ́ pǝ lɑpɑ nɑ kʋsǝsɩɩtʋ wɛɛ ɩsɩɩ tɑ́ tɔɔ nyǝnlʋ hɑlǝnɑ Kilisiti kɔɔ, sɩ tǝ tɛ́ tɑ́ tɑ́ɑ́ nɑ Ɩsɔ nɑ pǝ́ lɑ́ nɑ tǝ́ pǝsɩ kʋpɑmɑ kɛ Ɩsɔ ɩsɛntɑɑ. 25 Pǝnɛntɛ Ɩsɔ tɑ́ɑ́ tɛmnɑʋ tɔm ntɩ tǝlɛ tǝ kɔmɑ ɩlɛ kʋsǝsɩɩtʋ nɑ́ fɛɩ ɩsɩɩ tɑ́ tɔɔ nyǝnlʋ tɔtɔ.

26 Tɔʋ, mɛ mǝ tɛmɑ mǝ tɑɑ nɑ Ɩsɔ tɔɣɔ ɩ́ pǝsɑ ɩ piyɑ kɛ mǝ nɑ Yesu Kilisiti mǝ kpɛntʋɣʋ tɔɔ. 27 Pǝ tɑɣɑ pʋlʋ, mǝ tǝnɑ tǝpɑɩ pɑ sɔ-mɛɣɛ Ɩsɔ lʋm sɩ mǝ nɑ Kilisiti ɩ́ kpɛntɩ nɑ ɩ́ kpɑɣɑ Kilisiti kiŋ kɛ yɑɑsi kʋfɑlʋ nɑ ɩ́ tɔkɩ. 28 Wɑɑtʋ ɩnɩ, pǝ fɛɩ sɩ Yutɑ tʋ ntɔ, ɩnɛ ɩ́lɛ́ ɩ tɑ kɛ Yutɑ tʋ. Yɑɑ yom ntɔ, kɑsɑɣɑmpu ntɔ. Yɑɑ ɑpɑlʋ ntɔ, ɑlʋ ntɔ. Amɑ mǝ nɑ Yesu Kilisiti ɩ́ kpɛntɑ mǝ tǝnɑɣɑ kʋlʋm kɛ́, fɑɣɑʋ fɛɩ. 29 Ye Kilisiti tǝnnɑ-mɛ ɩlɛ ɩ́ kɛ́ Apǝlɑhɑm piyɑ kɛ́, nɑ ɩ́ kɑ́ hiki kʋpɑntʋnɑɑ mpɑ Ɩsɔ tɔmɑ sɩ ɩ kɑ́ hɑ-mɛ nɑ pǝ́ pǝsɩ mǝ nyǝm tǝkpɑtɑɑ tɔ.