1 Nti mɑ wɛnɑ nɑ mɑ́ cɑɑ mɑ tɑsǝnɑ-mɛɣɛ kilisinɑʋ tɔɣɔlɛ sɩ, pǝyɑɣɑ ŋkɑ kɑ wɛɛ nɑ kɑ́ɑ́ tɛ nɑ kɑ́ tɔɣɔ kɑ cɑɑ wɛnɑʋ tǝnɑ tɔ, kɑ pǝcɑɑtʋ kɑ wɛɛ kɛ́ ɩsɩɩ yom wɛʋ tɔ. Pǝyele ŋkɛ kɑɑ tɛnɑ nɑ kɑ́ tɩ pǝ tǝnɑ. 2 Kɑ pǝcɑɑtʋ tǝnɑ tɑɑ kɑ wɛ pɑɑsǝnlɑɑ niŋ tɑɑ, nɑ pɛlɛ pɑ lɑkǝnɑ-kɛɣɛ pǝ tǝnɑ hɑlǝnɑ kɑ́ kɔɔ kɑ́ tɑlɑ pɩɩsɩ ɩsǝnɑ kɑ cɑɑ kɑ sɩɩwɑ tɔ. 3 Tɑ́ tɔtɔ wɑɑtʋ wei tɩɩ wɛ ɩsɩɩ piyɑ tɔ, tɩɩ wɛ ɑntulinyɑ ɩnɛ ɩ pǝ tǝnɑ pǝ kɑncɑɑlɑɣɑ nyǝm tɑɑ kɛ́ nɑ pǝ́ kpɑ-tʋɣʋ yomɑɑ. 4 Amɑ pǝ kɔmɑ pǝ tɑlɑ sɑɑ wei Ɩsɔ kɑ sɩɩwɑ tɔ, ɩlɛnɑ ɩ́ tili ɩ pǝyɑɣɑ, nɑ ɑlʋ lʋlǝnɑ-kɛ, nɑ kɑ́ tǝŋ Yutɑ nyǝ́mɑ kʋlɑpʋtʋ. 5 Kɑ kɔmɑ mpʋ sɩ kɑ cɛkɩ mpɑ kʋsǝsɩɩtʋ kɑ tɔkɑɑ tɔ nɑ tǝ hiki mpɑɑʋ nɑ tǝ́ pǝsɩ Ɩsɔ piyɑ.

6 Ɩsɔ tʋ ɩ Pǝyɑɣɑ Feesuɣu kɛ tɑ́ tɑɑ sɩ pǝ́ hʋ́lɩ́ teu sɩ tǝ kɛ́ ɩ piyɑ mɑɣɑmɑɣɑ, nɑ Feesuɣu ŋkʋ kʋ yelinɑ nɑ tǝ́ yɑɑ Ɩsɔ sɩ mɑ Cɑɑ Pɑɑpɑ. 7 Ye mpʋ ɩlɛ n tɑ kɛ yom tɔtɔ, ɑmɑ n pǝsɑ pǝyɑlʋ kɛ. Nɑ ɩsɩɩ n kɛʋ ɩ pǝyɑlʋ kɛ mpʋ tɔ, Ɩsɔ kɑ́ hɑ-ŋ kʋpɑntʋnɑɑ mpɑ ɩ sɩɩ ɩ piyɑ tɔɔ tɔ.

8 Tuu lɔŋ ɩ́ tɑɑ nyɩ Ɩsɔ, nɑ ɩ́ tǝŋɑɣɑ mpi pǝ tɑ kɛ Ɩsɔ mɑɣɑmɑɣɑ tɔ nɑ ɩ́ pǝsɩ pǝlɛ pǝ yomɑɑ. 9 Amɑ pǝnɛntɛ ɩsɩɩ ɩ́ nyǝmɑ́ Ɩsɔ, yɑɑ ɩsɩɩ Ɩsɔ ɩ́lɛ́ ɩ nyǝmɑ-mɛ tɔ, pepe tɔɔ kɛ́ ɩ́ cɑɑ ɩ́ mǝlɩ pǝ tǝnɑ pǝ kɑncɑɑlɑɣɑ nyǝm mpi pǝ tɑɑ fɛɩ wɑɑʋ nɑ pǝ́ wɛ yem kɛ́ mpʋ tɔ pǝ tɑɑ? Nɑ pǝ kɔmɑ suwe tɔtɔ nɑ ɩ́ cɑɑ ɩ́ tɑsɑ pǝ yomɑɑ lɑpʋ? 10 Mǝ ɩsɛ sɛɛnɑ mǝ kʋyɛɛŋ kʋpɑmpɑŋ fɑɣɑsʋɣʋ nɑ mǝ ɩsɔtʋnɑɑ kʋpɑmɑ nɑ mǝ wɑɑtʋnɑɑ kʋpɑmɑ nɑ mǝ pɩɩsɩ kʋpɑŋsɩ fɑɣɑsʋɣʋ kɛ teitei. 11 Mǝ tɔm cɛpɑ mɑ lɑŋlɛ kɛ teu kɛ́. Ɩsɩɩ mɑ ɩwɩɩlɛ ntɛ́ tǝ tǝnɑɣɑ mǝ tɔɔ kʋlɑ hʋntʋ ntɛ́ yɑɑ?

12 Mɑ tɑɑpɑlɑɑ, mɑ wiikinɑ-mɛ sɩ ɩ́ tǝŋ mɑ ɩkpɑtɛ ɩsɩɩ mɑ mɑɣɑmɑɣɑ mɑ tǝŋɑ mǝ ɩkpɑtɛ tɔ. Ɩ́ tɑ lɑ-m ɩsɑɣɑtʋ nɑtǝlǝɣɩ tiili se. 13 Nɑ ɩ́ nyǝmɑ́ teu sɩ mɑ kʋtɔŋ tɔɔ kɛ́ mɑ heelɑ-mɛɣɛ Lɑɑpɑɑlɩ Kʋpɑŋ kɛ tɔm kɑncɑɑlɑɣɑ nyǝm. 14 Nɑ ɩ́ nɑ́ cɔɔsɛɛ kɛ sɔsɔm kɛ mɑ wʋsɑsɩ nsɩ sɩ tɑɑ, pɑɑ nɑ mpʋ ɩ́ tɑ́ cʋtɩ sɩ mɑ tɔm ntɩ tǝ nɩɩ-mɛ. Pǝyele ɩ́ tɑ lɔ-m, ɑmɑ ɩ́ tɔkɑ-m teu kɛ́ ɩsɩɩ ɩsɔtɑɑ tillu nɔɣɔlʋ, yɑɑ ɩsɩɩ Yesu Kilisiti mɑɣɑmɑɣɑ. 15 Wɑɑtʋ ɩnɩ mǝ lɑŋhʋlʋmlɛ tɔ pɑɑ pɔɔsǝɣɩ. Ɩlɛ kɑɣɑnɑ ɩ́ nɑ-we tɔtɔ? Hɑlɩ mɑ pǝsǝɣɩ mɑ́ lǝsɩ mǝ nyɩɩlʋɣʋ sɩ wɑɑtʋ ɩnɩ ɩ tɑɑ, pɩɩ lɑkɑɣɑ mpʋ, pɑɑ mǝ ɩsɛ mɑɣɑmɑɣɑ ɩ́ kɑ lǝsɑɑ nɑ ɩ́ tʋ-m. 16 Ɩsɩɩ mɑ heeluɣu-mɛɣɛ tɑmpɑnɑ tɔɣɔlɛ mɑ pǝsɑ mǝ kolontu yɑɑ?

17 Yǝlɑɑ pɑnɛ pɑ lɑkɩ kɛ́ nɑ n nɑwɑ n tɔ sɩ pɑ sɔɔlɑ-mɛɣɛ teu. Aɑɩ, pǝ tɑɣɑ mpʋ se, pɑɑ pǝcɔ. Pɑ cɑɑkɩ kɛ́ sɩ mɑ́ nɑ-mɛ tǝ́ wɑkǝlɩ, nɑ ɩ́ mǝlǝnɑ mpɛ pɑ tɔɔ nɑ ɩ́ nyǝnǝɣɩ pɑ tike. 18 Pǝ wɛ teu sɩ yʋlʋ ɩ́ sɔɔlǝɣɩ ɩ lɛlʋ kɛ mpʋ yɑɑ. Amɑ kʋpɑntʋ lɑpʋ tɑɑ kɛ́ ɩ́ kɑ́ sɔɔlǝɣɩ ḿpʋ́ɣʋ́ tɑm, pǝ́ tɑɑ wɛɛ wɑɑtʋ wei mɑ wɛ mǝ kiŋ tɔ tike. 19 Mɑ piyɑ kʋpɑmɑ, mɑ tɑɣɑnɑ wʋsɑsɩ tɑɑ kɛ́ sʋʋʋ kɛ mǝ tɔɔ. Nɑ wʋsɑsɩ nsɩ sɩ nǝɣǝsǝnɑ ɩsɩɩ lʋlʋɣʋ wʋsɑsɩ tɑkʋɣʋ ɑlʋ tɔ, sɩ pǝ́ lɑ nɑ ɩ́ kpɑɣɑ Kilisiti yɑɑsi nɑ mǝ nɑ-ɩ́ ɩ́ nǝɣǝsǝnɑ tǝmɑɣɑ teu. 20 Pepe pukinɑ-m mǝ hɛkʋ kɛ nɔɔnɔɔ ɩsǝntɔ nɑ mɑ́ heeli-mɛɣɛ kʋfɑtʋnɑɑ. Pǝ tɑɣɑ pʋlʋ tɔɔ, mǝ tɔm cɑɑlɑ-m sɔsɔm kɛ cǝnɛɣɛ.

21 Mɛ mpɑ ɩ́ cɑɑ kʋsǝsɩɩtʋ ɩ́ tɔkɩ-mɛ tɔ, mɑ pɔɔsǝɣɩ-mɛ sɩ ɩ́ nɩɩwɑ nti pɑ ŋmɑɑwɑ kʋsǝsɩɩtʋ ntɩ tǝ tɑkǝlɑsɩ tɑɑ tɔ, yɑɑ ɩ́ tɑ́ nɩɩ? 22 Pɑ ŋmɑɑwɑ sɩ Apǝlɑhɑm kɑ wɛnɑ piyɑ nɑɑlɛɣɛ, kɑsɑɣɑmpu nɑ́ lʋlɑ-ɩ lɛŋkɑ nɑ yom nɑ́ɑ́ lʋlɩ-ɩ lɛŋkɑ. 23 Ɩsɔ kɑ tɔmnɑ sɩ kɑsɑɣɑmpu kɑ́ lʋlɩ. Ḿpʋ́ɣʋ́ kɑsɑɣɑmpu kɔmɑ nɑ ɩ́ lʋlɩ nɑ pǝ mʋ Ɩsɔ nɔɣɔ tɑɑ tɔm tǝkɛlɛ. Amɑ yom nɑ́ lʋlɑ ɩ nyǝŋkɑ kɛ yem kɛ́ pʋlʋ fɛɩ. 24 Tɔm tǝnɛ tǝ hʋ́lǝ́ɣɩ́-tʋɣʋ yɑɑsi nɔɣɔlʋɣʋ. Alɑɑ mpɛ pɑ wɛ kɛ́ ɩsɩɩ Ɩsɔ nɔɔsɩ nsi ɩ́ nɑ ɩ yǝlɑɑ pɑ kpɛntɑɑ nɑ pɑ́ pɛɛlɩ tɔm nɑɑlɛ tɔ. Kɑncɑɑlɑɣɑ nɔɣɔ ntɛ́ Akɑɑ, nɑ ŋkɛ kɑ kɛnɑ Sinɑyi pʋɣʋ nyǝŋkɑ, nɑ kɑ́ lʋlǝɣɩ yomɑɑ. 25 Akɑɑ ɩnɩ ɩ kɛnɑ ɩsɩɩ Alɑpʋ Sinɑyi pʋɣʋ, nɑ ɩ nǝɣǝsǝnɑ Yosɑlɛm ɩcɑtɛ nte tǝ wɛ sɑŋɑ ɩsǝntɔ tɔ, nɑ tǝ nɑ tǝ yǝlɑɑ tǝnɑ mpɑ pɑ kɛ́ yomɑɑ tɔ. 26 Yosɑlɛm wei ɩ́lɛ́ ɩ wɛ ɩsɔtɑɑ nɑ ɩ́ kɛ́ tɑ́ tǝnɑ tɑ́ too tɔ ɩ́lɛ́ ɩ kɛ́ kɑsɑɣɑmpu kɛ́. 27 Tǝ mɑɣɑmɑɣɑ kɛ pɑ ŋmɑɑwɑ Ɩsɔ Tɔm tɑɑ sɩ:

28 Mɑ tɑɑpɑlɑɑ, ye mɛ ɩlɛ Ɩsɔ kɑ tɔmɑ sɩ pɑɑ lʋlɩ-mɛ tɔɣɔ pɑ lʋlɑ-mɛ. Nɑ pǝ lɑpɑ teitei ɩsɩɩ ɩ kɑ tɔmɑ sɩ pɑɑ lʋlɩ Ɩsɑɑkɑ nɑ tɑmpɑnɑ pɑ́ lʋlɩ-ɩ tɔ. 29 Pǝyɑɣɑ ŋkɑ pɑɑ lʋlɑ yem kɛ́ mpʋ tɔ kɑ tʋkɑɣɑ ŋkɑ pɑ lʋlǝnɑ Ɩsɔ Feesuɣu toŋ tɔɣɔ kʋnyɔŋ. Nɑ mpʋ ɩnǝɣɩ pǝ wɛ sɑŋɑ wʋlɛ tǝnɛ tɔtɔ. 30 Nɑ ntiɣi pɑ ŋmɑɑwɑ Ɩsɔ Tɔm tɑɑ yee? Pɑ ŋmɑɑwɑɣɑ sɩ: Tɔɣɔnɩ ɑlʋ yom ɩnɩ nɑ ɩ pǝyɑɣɑ nɑ pɑ́ tɛɛ. Pǝ tɑɣɑ pʋlʋ tɔɔ, yom pǝyɑɣɑ nɑ kɑsɑɣɑmpu pǝyɑɣɑ pɑ kɑɑ kpɛntɩ nɑ pɑ́ tɑlɑ pɑ cɑɑ wontu. 31 Pǝ tɔɔ ɩlɛ mɑ tɑɑpɑlɑɑ, tǝ tɑ kɛ yom piyɑ se, ɑmɑ tǝ kɛ́ kɑsɑɣɑmpu piyɑ kɛ́.