1 Ḿpʋ́ɣʋ́ kʋyɑkʋ nɑkʋlɩ Tɑcɑɑ heelɑ Apǝlɑm sɩ: Lɩɩ nyɑ́ tɛtʋ tɑɑ kɛ́ nyɑ́ nyǝ́mɑ hɛkʋ kɛ nyɑ́ cɑɑ tǝyɑɣɑ tɑɑ, nɑ ń polo tɛtʋ nti mɑɑ hʋlɩ-ŋ tɔ tǝ tɑɑ. 2 Mɑɑ yele nɑ nyɑ́ piitim lɑ sɔsɔɔm nɑ mɑ́ kooli-ŋ kʋpɑntʋ, nɑ nyɑ́ hǝtɛ yɑɑ, nɑ ń pǝsɩ kʋpɑntʋ tiipiiu. 3 Mɑɑ kooli kʋpɑntʋ kɛ nyɑ́ kʋpɑntʋ koollɑɑ nɑ mɑ sʋkɩ mpusi kɛ́ mpɑ pɛlɛ pɑɑ sʋkɩ-ŋ mpusi tɔ. Nyɑ́ tɔɔ kɛ́ ɑtɛ piitimnɑɑ kɑ́ hiki nyʋleleŋ nɑ pǝ́ kooli-wɛɣɛ koolee kʋpɑnɑ.

4-5 Mpʋɣʋlɛ Apǝlɑm kpɑɣɑ ɩ ɑlʋ Sɑlɑɩ nɑ ɩ tɑɑlʋ pǝyɑɣɑ Lɔɔtɩ nɑ ɩ wɛnɑʋ tǝnɑ nɑ ɩ tǝmlɛ nyǝ́mɑ mpɑ ɩ hikɑ Hɑlɑŋ tɔ nɑ ɩ́ lɩɩ tǝnɑ ɩsɩɩ Tɑcɑɑ kɑ heeluɣu-ɩ tɔ nɑ ɩ́ tɛɛ Kɑnɑɑŋ tɛtʋ tɑɑ.

Wɑɑtʋ ɩnɩ ɩ pɩɩsɩ kɑ wɛ nɩɩtoso nɑ nɑɑnʋwɑ nɑ kɑkpɑsɩ. Ɩ tɑpɑ tɛtʋ ntɩ ɩlɛnɑ 6 ɩ́ fɑɣɑ tǝ tɑɑ nɑ ɩ́ polo Molee tɩɩŋ sɔsɔɔŋ tɛɛ kɛ́ timpi pɑ yɑɑ sɩ Sikɛm tɔ. Wɑɑtʋ ɩnɩ Kɑnɑɑŋ nyǝ́mɑ kɑ́ wɛnnɑ hɔɣɔlʋɣʋ ŋkʋ kʋ tɑɑ.